Jelemiya 20
Jelemiya bakazyanya a Pasyuu
1 Lino Pasyuu mupaizi mwana wa Ima mupati waŋanda ya Mwami Leza, naakamvwa Jelemiya kasinsima zintu eezi, 2 wakaumya Jelemiya musinsimi akumwaanzya wabikkwa muntolongo kumulyango wakutala wa ŋanda ya Mwami Leza. Mulyango uutegwa Benjamini. 3 Mubuzuba bwakatobela ciindi Pasyuu naakamugwisya muntolongo, Jelemiya wakati kulinguwe, “Mwami Leza wati tocili Pasyuu pele nduwe Magomisabibu. 4 Kayi mboobu mbwaamba Mwami Leza ulati, ‘Ndacita kuti ube ciyoosyo kulinduwe omwini akubeenzinyoko boonse. Koyoolangilide uyoobabona kabajaigwa munkondo abasinkondonyina. Boonse bamu Juda njoobaaba kumwami waku Babuloni, ooyo uyoobatola ku Babuloni nokuba kubajaya munkondo. 5 Lubono loonse lwamunzi ooyu njoolwaaba kuli basinkondonyina, nkokuti zyoonse nzyuupanga, zyoonse ziyandika, aziyobwedo zyoonse zyabamami bamu Juda. Bayoozisaala akuzitola ku Babuloni. 6 Yebo lwako Pasyuu, abaabo bakkala muŋanda yako muyootolwa mubwaange ku Babuloni. Ooko nkoyoofwida akuzikkwa yebo abeenzinyoko aabo mbookasinsimina zyakubeja.’”
Jelemiya mbwaakatongookela Mwami Leza
7 O Mwami Leza wakandoongelezya, nkaako ndakafubaala wakandikoma akuzunda.
Buzuba boonse ndafubaazigwa, boonse balandinonga.
8 Kufumbwa ciindi nendikanana ndapozomoka cakwaambilizya zyalupyopyongano alunyonyooko.
Nkaako majwi aa Mwami Leza andiletela kusampaulwa kunongwa buzuba boonse.
9 Pele kuti naa ndaamba kuti, “Nsicaambauli limbi zyanguwe, nokuba kukanana muzina lyakwe.”
Majwi aakwe mumoyo wangu ali mbuli mulilo uuyaka wajalilwa mumafuwa aangu.
10 Ndamvwa banji kabavwiya-vwiya balati kuli koonse, “Aambwe! Atumwaambe!”
Beenzuma boonse balindila kuti ndibe newa balati, “Ambweni inga wacengwa,
eelyo inga twamuzunda, tumupilusizye bubi.”
11 Pele Mwami Leza ulaandime mbuli silumamba sintanze,
aboobo bandipenzya bayoolifumpula,
tabakazundi. Bayookacilwa akuusigwa nsoni mpati, bweeme bwabo tabukalubwi.
12 O Mwami Leza Singuzuzyoonse, yebo oolingula baluleme, oolangisya amizeezo,
andibone ciindi nobabweedezezya bubi, nkaambo ndilipede kulinduwe.
13 Amwiimbile Mwami Leza! Amutembaule Mwami Leza! Ulavuna babulide kuzwa kubantu babi.
14 Abusinganyizigwe buzuba oobo mbundakazyalwa!
Buzuba oobo baama mbubakandizyala butalelekwi!
15 Asinganyizigwe muntu ooyo wakaletela taata makani,
ooyo wakamubotezya naakati, “Wazyalilwa mwana mulombe!”
16 Muntu ooyo abe mbuli minzi eeyo Mwami Leza njaakoola cakutiiengelela.
Amvwe kulila cifumo-fumo, amvwe mweembo wankondo acilungu-lungu.
17 Nkaambo taakandijaila mwida, baama kababa cuumbwe cangu, da lyabo kalindijata kwalyoonse alyoonse.
18 Ino ndakazwida nzi mwida kuti ndizoobone mapenzi abuusu, akuti mazuba aangu amanine mukuusa?