Jelemiya 2

Leza mbwabamba Baisilayeli

¹ Lino Majwi aa Mwami Leza akandisikila akati,

² “Koya ukaambilizye bantu bamu Jelusalemu kabamvwide,

ukati, ‘Ndayeeya mbuli mbookalipede mubukubusi bwako,

ambuli mbookali kundiyanda kocili nabwiinga,

wakanditobela nitwakainda munkanda munyika iitanasyangidwe.

³ Isilayeli wakali kusalala ku Mwami Leza,

wakali mbuli micelo mitaanzi kubizwa yabutebuzi bwakwe,

boonse bakamucisa bakajana mulandu, mapenzi akabasikila.’” Mbwaamba Mwami Leza.

Zinyonyoono zyabasikale ba Baisilayeli

⁴ Amuswiilile majwi aa Mwami Leza, nywebo nolunyungu lwa Jakobo, nyoonse noziinga zya Isilayeli.

⁵ Mboobu mbwaamba Mwami Leza ulati,

“Ino mbubi nzi basikale banu mbubakajana mulindime cakuti bakandiyaamuka baya kulaale?

Bakatobela mituni yabuyo cakuti abalo bakaba babuyo.

⁶ Tiibakabuzya kuti, ‘Ino uli kuli Mwami Leza ooyo wakatugwisya mu Ijipiti

akutwiinzya mucimpayuma, munkanda, munyika yankanda amalindi,

munyika yacilanga amudima uusiya mbi, nyika iitaindi bantu,

oomo mutakwe amuntu uukkala mumo pe?’

⁷ Ndakamuleta munyika yambolezi kuti mulye micelo yayo azilyo zyayo zibotu.

pele mwakaboola mumane mwakasofwaazya nyika yangu akucita kuti lukono lwangu lusesemye.

⁸ Bapaizi tiibakabuzya kuti, ‘Uli kuli Mwami Leza?

Aabo babelesya mulawo tiibakandizi, basololi bakandizangila.’

Basinsimi bakasinsima muzina lya Baali, bakali kutobela mituni yabuyo.

Mwami Leza ujisi twaambo abantu bakwe

⁹ “Nkaako ono ndamupa twaambo alimwi, mbwaamba Mwami Leza,

abalo bana banu njoobapa mulandu mbubonya.

¹⁰ Amuzubukile kunkomwe zyamilonga yaku Kitimu,

mubone, amutumizye ku Kedaa mulangisisye,

amubone naa kuli camusyobo ooyu cakabwenwe kale.

¹¹ Sena kuli cisi nociba cimwi cakasowa baleza baco? Nikuba kuti tabali baleza beni pe.

Pele bantu bangu balisowede bulemu bwangu mukutobela mituni yabuyo.

¹² Kogambwa kumakani aaya yebo ojulu, kankamanisya cakuyoowa kapati. Mbwaamba Mwami Leza.

¹³ Bantu bangu bajisi zibi zyobilo, bakandisiya mebo ndekasensa kamaanzi aabuumi,

bakasya zitelekezyo zyabo beni, zitelekezyo zifwide zitakonzyi kujata maanzi.

Ciyoocitika akutasyomeka kwa Baisilayeli

¹⁴ “Sena Isilayeli mubelesi? Wakazyalwa kali muzike na?

Ino kayi nkaambo nzi naaba cisaalo?

¹⁵ Basyuumbwa balavuluma balamutimbila. Banyonyoona nyika yakwe,

minzi yakwe yatentwa yaba matongo.

¹⁶ Minzi yaku Memfisi aku Taapenesi ayalo mbubonya bakulula bulemu bwamutwe wako.

¹⁷ Sena tiimwaliletela mapenzi aaya nobeni nimwakasiya Mwami Leza wanu

kali ngowakamusolweda munzila yoonse?

¹⁸ Ino kayi muunkila nzi ku Ijipiti kuyoonywa maanzi aakalonga ka Syihoo?

Ino muunkila nzi ku Asiliya kuyoonywa maanzi aamulonga wa Yufuletisi?

¹⁹ Bubi bwanu nobeni bulamuletela cisubulo, kuwa kwanu kulamutapatizya.

Lino amuyeeye mutelaike mbocili cibyaabi akulula kuli ndinywe kusiya Mwami Leza wanu,

tamundiyoowi pe, mbwaamba Mwami, Mwami Leza Singuzuzyoonse.”

Baisilayeli mbubakakaka kukomba Mwami Leza

²⁰ Mwami Leza ulati, “Yebo Isilayeli wakakaka kuti ndikweendelezye,

wakakaka kuti undiswiilile akundikomba. Tee mutulundu toonse tulamfu amunsi amasamu aavwevwede mwakali kukomba baleza bapa luzyalo.

²¹ Ndakamusyanga mbuli musaansa mubotu, wakajisi cisiko cibotu cizyandamene.

Ino kayi mwakasanduka buti kuba musaansa mubi uupapa?

²² Nikuba kuti musambe ansipa iili buti nuuba mulota munji,

cibata camulandu wanu cinoocilibonya, mbwaamba Mwami Leza.

²³ Ino mbubuti mbomunga mwati, ‘Tatusofweede,

tiitwali kutobela ba Baali?’ Amubone nzyomwakali kucita mukkuti,

kamuyeeya eezyo nzyomwakacita. Muli mbuli nkamela nzyazi iizuzisya, iinga yaakuti ooku akooku,

²⁴ mbuli cibize uuzibide munkanda,

uuteya muundwe mukupya kwaceembela cakwe,

ino nguni uunga wamulesya? Beenze bamuyanda tabakalikatazyi,

ciindi caceembela cakwe balamujana.

²⁵ Mutali kuzuzi cakulimana maulu, mutayumyi buyo moyo. Pele nywebo mwakati,

‘Peepe tatukooleka! Kayi kuyanda baleza babamasi, tweelede kubatobela!’”

Baisilayeli beelede kusubulwa

²⁶ “Mbubonya mbuli mubbi mbwausa najatwa, mbubonya oobo abalo balunyungu lwa Isilayeli bausigwa nsoni, lwabo beni, bamami babo balupati-pati, bapaizi antoomwe abasinsimi. ²⁷ Baambila cisamu kuti, Nduwe taata, akubbwe balati, Nduwe wakandizyala. Bandifutatila, ciindi nobali mumapenzi balati, Boola uzootufutule!

²⁸ “Ino kayi bali kuli baleza banu aabo mbumwakalipangila? Ababoole kuti naa kabakonzya kuzoomuvuna ciindi nomuli mumapenzi! Kayi mulijisi baleza banji mbubonya mbuli buli minzi yanu nobamu Juda. ²⁹ Ino nkaambo nzi nomunditamikizya twaambo? Nyoonse mwakandizangila, mbwaamba Mwami Leza. ³⁰ Tiicakagwasya kusubula bantu acisi, nkaambo taakwe nibakacita mbubakalailila. Panga lyako lyakajaya bapaizi mbuli syuumbwa walumina. ³¹ Nywebo nobazyalani eeli, amuyeeye majwi aa Mwami Leza, ‘Sena ndili mbuli nkanda ku Baisilayeli, naa mbuli nyika yamudima uusiya mbi?’ Ino nkaambo nzi bantu nobati, ‘Tulaangunukide kweendeenda, tatukabooli limbi kulinduwe?’” ³² Sena nakalindu ulaluba zyakulibotezya zyakwe? Sena nabwiinga ulaluba zyakulisakatizya zyakwe? Pele bantu bangu mebo bakandiluba, kwamazuba manji aatabaliki. ³³ Kasimpe nduwe oobainda kuziba zyaluyando! Nobaba bamakaintu bavuule kwiindilila balakonzya kwiiya nzila zyako. ³⁴ Azisani zyako bantu balajana bulowa bwabacete batajisi cintu mbookajaya nokuba kuti toobajanikizya kabapwaya ŋanda pe.

“Nikuba kuti wakacita zyoonse eezi, ³⁵ yebo ulati, ‘Nsikwe mulandu, Leza tandinyemenede.’ Pele njookubeteka nkaambo waamba kuti, ‘Nsibisizye.’ ³⁶ Ino nkaambo nzi ncendeenda boobu akuyabutamauka zyako? Ijipiti iyookutyompya mbubwakacita Asiliya. ³⁷ Uyoosiya busena bwako kolijisi kumutwe nkaambo Mwami Leza ulibakakide aabo mbosyoma, tabakooyookugwasya pe.”