Jelemiya 19

Nongo yakapwaigwa

¹ Mboobu mbwaamba Mwami Leza ulati, “Koya ukaule nongo kumubumbi. Ukatolelele abamwi bapati babantu ababapaizi, ² ukainke kukkuti lya Benihinomu kumbali aamanjililo aamulyango walukaye. Ooko ukaambilizye majwi ngendikwaambila ukati, ³ ‘Amumvwe majwi aa Mwami Leza nobamami bamu Juda, anywebo nobantu bamu Jelusalemu.’ Mboobu mbwaamba Mwami Leza Singuzuzyoonse, wa Isilayeli ulati, ‘Amuswiilile! Ndiyooleta mapenzi kubusena oobu aayo aaticite kuti kufumbwa uutimvwe makani matwi aakwe ayooba aabunyangulukwa.’ ⁴ Nkaambo bakandisiya akucita busena oobu kuti bube bwabaleza babamasi, bakatentela baleza bambi zipaizyo mubusena oobo, baleza aabo balo nobaba basikale babo naa bamami bamu Juda mbubatakazi, mubusena oobu bajaya bantu batakwe milandu. ⁵ Bakayaka malende aaba Baali kuti kabatenta bana babo mumulilo kuti babe zipaizyo kuli ba Baali, cintu eeco ncindatakalailila nokuba kucaamba, ncindatakali kuyeeya pe. ⁶ Aboobo amucenjele, mazuba alasika, mbwaamba Mwami Leza, bantu nobataciyooiti limbi busena oobu kuti Tofeti naa kkuti lya Benihinomu, pele bayooliita kuti kkuti lyakujailwa.

⁷ “Mubusena oobu njoonyonyoona mizeezo yabamu Juda abamu Jelusalemu. Njoocita kuti basinkondonyina babajaye munkondo, eelyo njoopa mitumba yabo kuti ikabe cilyo cabayuni bamuluuwo abanyama bamunyika. ⁸ Njooola munzi ooyu akuucita kuti ukabe cisesyo, boonse bayooinda munsi bayoogambwa, akuusampaula akaambo kamapenzi aawo woonse. ⁹ Ndiyoocita kuti bakalye mibili yabana babo balombe abasimbi, bayoolyana muciindi camapenzi aakusinkilizigwa aayooletwa abasinkondonyina aabo bayanda kubajaya.”

¹⁰ Mpawo Mwami Leza wakaambila Jelemiya kuti, “Pwaya nongo eeyo aabo mbooinka limwi kabalangilide, ¹¹ ubaambile kuti, Mboobu mbwaamba Mwami Leza ulati, ‘Njoopwaya musyobo ooyu amunzi ooyu mbubonya mbuli nongo eeyi mboyapwaigwa cakuti tiikonzyi kubumbululwa pe. Bayoozikka bafu babo mu Tofeti mane kusikila kukabule abusena.’ ¹² Mbombubo oobu mbwendiyoocita kubusena oobu akuli baabo bakkala mumo. Mbwaamba Mwami Leza. Njoocita munzi ooyu kuti ukabe mbuli wa Tofeti. ¹³ Maanda aamu Jelusalemu ayaayo aabamami bamu Juda ayoosofwaala akuba mbuli busena oobu bwa Tofeti, nkokuti maanda oonse nkubakali kutentela tununkilizyo atala aaziluli, kutentela makamu aakujulu akutuuzya zyazyakunywa kuli baleza bambi.

¹⁴ “Kumane waawo Jelemiya wakapiluka kuzwa ku Tofeti ooko Mwami Leza nkwaakamutumide kuti akaakusinsime, wakazooima mubbuwa lyaŋanda ya Mwami Leza akuti kubantu boonse, ¹⁵ Mboobu mbwaamba Mwami Leza Singuzuzyoonse, wa Isilayeli ulati, ‘Amuswiilile ndiyanda kweetela munzi oonse ooyu atunzi tuuzingulukide mapenzi oonse aaya ngindakaambilizya kuli mbabo, nkaambo bakali basicinguni, tiibakaswiilila majwi aangu.’”