Jelemiya 18
Jelemiya mbwaakainka kuŋanda yamubumbi
1 Ngaaya majwi aa Mwami Leza akasikila Jelemiya aakuti, 2 “Koya kuŋanda yamubumbi waakusika ooko njookupa majwi aangu.” 3 Aboobo ndakainka kuŋanda yamubumbi, ndakamubona kabeleka avwili. 4 Pele cibiya ncaakali kubumba kuzwa kubulongo cakabija, aboobo mubumbi wakabumba cibiya cimbi kuzwa kubulongo oobo, wakacibumba mbuli mbwaakali kuyanda kuti cibe.
5 Mpawo majwi aa Mwami Leza akandisikila akuti, 6 “Nywebo noluzubo lwa Isilayeli, sena ndimucite mbuli mubumbi ooyu mbwacita? Mbwaamba Mwami Leza. Mbubonya mbuli bubede bulongo mumaanza aamubumbi mbubonya oobo anywebo mbomubede mumaanza aangu, nywebo noluzubo lwa Isilayeli. 7 Kuti naa cimwi ciindi ndaambilizya kuti musyobo na bulelo bumwi bweelede koolwa, buwisigwe akunyonyoonwa, 8 kwamana musyobo ooyo weempa kuzibi zyawo, ambebo ndaleka kuuletela mapenzi ngindakuukanzilide. 9 Kuti naa cimwi ciindi ndaambilizya kuti musyobo naa bulelo bumwi bweelede kuyakwa akwiimikwa, 10 kwamana bwatalika zibi kumbele lyangu akutandiswiilila njooleka kubucitila zibotu eezyo nzindakali kuyanda kubucitila. 11 Nkaako lino ambila bantu bamucisi ca Juda abaabo bakkala mu Jelusalemu kuti, Mboobu mbwaamba Mwami Leza ulati, ‘Amulange! Ndilibambila kumuletela mapenzi, ndiyeeya zyakumucita. Nkaako amuleke umwi aumwi nzila zyanu zibi, nzila zyanu amilimo yanu zibote.’ 12 Pele bayookwiingula kuti, ‘Tunyina makani. Swebo tunoociya kumbele amizeezo yesu tobeni, umwi aumwi wesu unootobela cinguni camoyo wakwe mubi.’”
Bantu mbubakakaka Mwami Leza
13 Nkaako mboobu mbwaamba Mwami Leza ulati, “Amubuzye-buzye akati kamisyobo imwi.
Nguni wakamvwide kale cimwi cili mbuli baceeci? Cintu cibyaabi kapati
cakacitwa a Isilayeli amwana musimbi uutazi mwaalumi.
14 Sena caanda caku Lebanoni cilayaaya kuzwa amabwe malamfu aakooko?
Sena maanzi aaco aatontola kuli naaleka kweenda?
15 Pele bantu bangu bakandiluba, batentela mituni yabuyo tununkilizyo,
munzila amutuzila twakale-kale.
Mituni eeyi yakabacitya kuti beendele mutuzila twaamumbali aamumigwagwa iiteepedwe.
16 Nyika yabo iyoonyonyoonwa, bayooba cisesyo citakamani,
boonse bayooinda waawo bayoogambwa, bayoopukusa mitwe yabo.
17 Mbubonya mbuli luuwo luzwa kujwe, njoobamwaisya kumbele lyabasinkondonyina,
njoobafutatila, nsikabalangi pe mubuzuba bwamapenzi aabo.”
Mbubakakanza Jelemiya
18 Lino bantu bakati, “Amuboole tulivwiye mbotunga twamucita Jelemiya, kayi bapaizi tabakaleki kutwiisya zyamulawo, basongo tabakaleki kutulailila, basinsimi tabakaleki kutwaambila zyamajwi aa Leza. Aboobo atumutamikizye twaambo katutacimuswiilili kuli zyoonse nzyanga waamba.”
19 Jelemiya wakati, “Kondiswiilila O Mwami Leza, komvwa nzyobaamba aabo banditamikizya. 20 Sena cintu cibotu ceelede kubbadelelwa bubi? Pele balo bandisida dindi. Koyeeya kuti ndakaima kumbele lyako akukanana mubusena bwabo, kuti uleke kubanyemena. 21 Nkaako balekele nzala bana babo, balekele kuti bajaigwe munkondo. Bamakaintu babo babule bana, babe bamukabafu, baalumi babo bajaigwe munkondo. 22 Kumvwigwe kulila mumaanda aabo waakuleta basikubasaala cakufwambaana, nkaambo bakasya dindi kuti bandijate, banditeya makole kuti bandice kumaulu. 23 Pele ulizi O Mwami Leza zyamakanze aabo aakuti bandijaye. Utabalekeleli milandu yabo, nokuba kuzimaanya zinyonyoono zyabo kumbele lyako, ukabacite muciindi cabukali bwako.”