Jelemiya 17
Cinyonyoono akusubulwa kwabantu bamu Juda
1 Cinyonyoono cabantu bacisi ca Juda cilisimbidwe acibelesyo calubulo cililembedwe ampela yabbweluuma, acilembelo camyoyo yabo, aameja aazipaililo zyabo. 2 Nobaba bana babo balayeeya zipaililo zyabo azikozyanyo zya Asyela mumbali aamasamu aavwevwede aatala aatulundu, 3 amuzilundu musokwe. Ndiyoolekela basinkondonyoko kuti bakatole lubono lwanu aziyobwedo zyanu akaambo kazibi nzimwacita mucisi coonse. 4 Kwiindila mukubisya kwanu nobeni muyoosweekelwa lukono ndundakamupa. N joomucita kuti mukabe bazike babasinkondonyoko munyika eeyo njomutazi, nkaambo kakuti mwakabusya bukali bwangu, nkabela bunoopya kwalyoonse alyoonse.
5 Mboobu mbwaamba Mwami Leza ulati, “Ulisinganyizidwe ooyo uusyoma muntunyina,
muntu buyo kuti amugwasilizye, ooyo uusiya Mwami Leza.
6 Uyooba mbuli citeyo munkanda takazwidilili ciindi caakusika.
Uyookkala mumasena aacimpayuma munkanda, munyika iibyuuka mutakkali muntu naba omwe.
7 “Pele ulilelekedwe muntu uusyoma mu Mwami Leza, ooyo uubikkide moyo wakwe mulinguwe.
8 Uyooba mbuli musamu uumenede munsi aamaanzi, ooyo uujisi miyanda iiyandalila mukalonga.
Tuupusami nokupya buti, matu aawo matete lyoonse.
Tuulibiliki nuuba mwaka waciyuma-yuma, taakwe nuutazyali micelo pe.
9 “Moyo wamuntu ulacenga kwiinda zintu zyoonse, mubi kapati, ino nguni uukonzya kuumvwisya.
10 Mebo nde Mwami Leza ndalanga-langa moyo wamuntu, akulingula mizeezo yakwe,
kuti ndilumbule muntu kweendelana anzila zyakwe, abweelede milimo yakwe.”
11 Mbuli kwale uukumba mayi ngaatakatula, mbwabede muntu ooyo uujana lubono munzila iitaluzi.
Kacilimvwide buyoomusiya eelyo kumamanino uyoolangika kuti mufuba-fuba.
12 Iŋanda ya Mwami Leza wesu ili mbuli cuuno cabulemu cakasumpulwa kuzwa kumatalikilo.
13 O Mwami Leza olulangilo lwa Isilayeli, boonse bakusiya bayoousigwa nsoni.
Boonse aabo bakufutatila bayoolembwa muvu, nkaambo basiya Mwami Leza kasensa kamaanzi aapa buumi.
Jelemiya mbwaakakumbila lugwasyo ku Mwami Leza
14 Kondiponya O Mwami Leza, eelyo ndaponyezegwa, ndifutule aawo ndafutulwa, nkaambo nduwe olikke ngwentembaula.
15 Lyoonse baamba kuti kulindime, “Ino ngali majwi aa Mwami Leza? Aazuzikizigwe ono tubone!”
16 Taakwe nindakatijide kuti ndisiye mulimo wabweembezi ngookandipa, ulizi kuti taakwe nindali kuyanda kubona buzuba bwakutyompwa. Eeco ncekanana aamulomo wangu, ulicibwene antangalala. 17 Utandiyoosyi pe, nduwe matijilo aangu mubuzuba bwamapenzi. 18 Aabo bandipenzya bausigwe nsoni, pele mebo utanduusyi nsoni pe, balekele kuti bayoosegwe, pele mebo cita kuti ntayoowi pe. Baletele buzuba bwamapenzi banyonyoone, mane ubanyonyoone kobilo.
Kubamba Sabata
19 Mboobu mbwaakandaambila Mwami Leza wakati, “Koya ukaimine amulyango wabantu, aawo aanjilila akuzwida bami bamu Juda. Ukaime aamilyango imwi yamunzi wa Jelusalemu. 20 Ukabaambile kuti, ‘Amumvwe majwi aa Mwami Leza, nywebo nobami abantu bamu Juda, antoomwe abaabo boonse bakkala mu Jelusalemu banjila mumilyango eeyi.’ 21 Mboobu mbwaamba Mwami Leza ulati, ‘Amubonesye kuti tamunyamuni mukuli mubuzuba bwa Sabata, nokuba kuunjizya mumilyango ya Jelusalemu. 22 Tamweelede kugwisya mukuli mumaanda aanu, nokuba kubeleka mulimo uuli buti mu Sabata, pele amubambe Sabata mwiisalazye mbubonya mbuli mbundakalailila basikale banu. 23 Nikuba boobo tiibakaswiilila nokuba kucenjeka matwi aabo, bakali basicinguni tiibakali kuswiilila nokuba kulaika pe.’”
24 Pele kuti naa kamundiswiilila, mbwaamba Mwami Leza, kamutanjizyi mikuli mumilyango mubuzuba bwa Sabata alimwi akuti kamubamba buzuba bwa Sabata akubusalazya kwiindila mukutabeleka mulimo nuuba buti, 25 eelyo bami bayookkala acuuno ca Devedi cabwami bayoonjila mumilyango yamunzi ooyu antoomwe abalupati-pati babo. Balo antoomwe abalupati-pati babo bayooboola kabatantide nkalaki amabbiza kabasindikilwa abantu bacisi ca Juda abaabo bakkala mu Jelusalemu. Aawo munzi ooyu uyookkalwa kwalyoonse alyoonse. 26 Bantu bayooboola kuzwa kuminzi yacisi ca Juda, tunzi tuzingulukide Jelusalemu, kuzwa kucisi ca Benjamini, akunselelo lyatulundu twakumbo, kuzwa kunyika yatulundu-lundu, akumusanza ku Negevu kabaletelezya zipaizyo zyakutenta, zituuzyo, zyamaila, tununkilizyo azipego zyakulumba kuŋanda ya Mwami Leza. 27 Pele kuti naa mutakandiswiilili kuti mutakabambi buzuba bwa Sabata akubusalazya kwiindila mukutabweza mikuli iili yoonse ciindi nomunjila mumilyango ya Jelusalemu mubuzuba bwa Sabata, njookutula mulilo uutazimi mumilyango ya Jelusalemu ooyo uuyoosyukuta mayubilo aawo.