Jelemiya 16

Mwami Leza mbwaakayandisisya buumi bwa Jelemiya

¹ Mpawo majwi aa Mwami Leza akandisikila akati, ² “Toelede kukwata kuti ube abana balombe abasimbi mubusena oobu pe.” ³ Mboobu mbwaamba Mwami Leza azyabana balombe abasimbi aabo bazyalilwa omuno munyika alimwi azyabamakaintu bali mbabamanyina, azyabaalumi bali mbabamawisi ulati, ⁴ “Bayoojaigwa amalwazi mabyaabi. Tabakooyoolilwa nikuba kuzikkwa, pele bayooba mbuli mankwisyila aaalabene anyika. Bayooolobezegwa munkondo anzala, nkabela mitumba yabo iyooba cilyo cabayuni bamuluuwo abanyama bamusokwe.”

⁵ Nkaako mboobu mbwaamba Mwami Leza ulati, “Utakanjili muŋanda oomo muli cakulya caadilwe, utakainki kuti ukalile nokuba kweetela nkaambo kakuti mebo ndalesya zileleko zyangu, nsicibayandi nokuba kubabeda aankumbu bantu aaba, mbwaamba Mwami Leza. ⁶ Balemenede abantu buyo boonse bayoofwa munyika eeyi. Tabakooyoozikkwa nokuba kulilwa, taakwe muntu naba omwe uyoolinengaula nokuba kukulula mutwe akaambo kabo. ⁷ Taakwe muntu uuyoosomba cakulya kuli baabo balila bafu, kuti abaumbulizye, taakwe nobaba banyina naba wisi, alimwi taakwe amuntu uuyoobapa cakunywa kuti abatontozye.

⁸ “Alimwi utakanjili muŋanda oomo muli pobwe kuti ukkale ulye akunywa. ⁹ Kayi mboobu mbwaamba Mwami Leza Singuzuzyoonse wa Isilayeli ulati, Uyoolibonena ameso, iiyi kocili muumi ndiyoomanizya nguluulu zyakutangala akubotelwa, amajwi aanabwiinga asibwiinga mubusena oobu.”

¹⁰ “Waakubaambila bantu aaba zintu zyoonse eezi, naa bakakubuzye kuti, ‘Ino nkaambo nzi Mwami Leza naalailila kuti tusikilwe mapenzi mapati aali boobu? Ino mbubi nzi oobo mbutwakacita? Ino ncinyonyoono nzi eeco ncitwakabisizya Mwami Leza wesu?’ ¹¹ Ukabaambile kuti, ‘Nkaambo kakuti basikale banu bakandisiya.’ Mbwaamba Mwami Leza. ‘Akutobela baleza bambi, bakabamanina milimo akubakomba. Bakandisiya, tiibakabamba mulawo wangu pe. ¹² Pele nywebo mwabisya kwiinda basikale banu. Amubone umwi aumwi wanu utobela basicinguni bwamoyo wakwe muciindi cakuti kaswiilila ndime. ¹³ Nkaako njoomutanda munyika eeyi, mukaye kunyika eeyo nywebo nobaba basikale banu njobatazi, ooko muyoomanina baleza bambi milimo sikati amasiku, nkaambo nsikoomweengelela pe.’”

Mbubayooboola kuzwa mubwaange

¹⁴ “Nikuba boobo mazuba alasika, mbwaamba Mwami Leza, bantu nobataciyooambi limbi kuti, ‘Mbubonya mbuli Mwami Leza mbwali muumi, ooyo wakagwisya Baisilayeli mu Ijipiti,’ ¹⁵ pele bayooti, ‘Mbubonya mbuli Mwami Leza mbwali muumi, ooyo wakagwisya Baisilayeli kuzwa mucisi cakunyika, amuzisi zyoonse ooko nkwaakabatandilide.’ Nkaambo nzoobabukulusya munyika njindakapa basikale babo.”

Cisubulo ciboola

¹⁶ “Pele kwalino ndatuma bazubi banswi banji, mbwaamba Mwami Leza, nkabela bayoobajata. Eeci caakumana njootuma bavwimi banji, nkabela bayoobalangaula muzilundu zyoonse amutulundu amumpangala zyamyaala. ¹⁷ Ndilizibwene nzila zyabo zyoonse, tazisisidwe pe, alimwi taakwe cinyonyoono cisisidwe kumbele lyangu. ¹⁸ Njoobapilusizya kobilo akaambo kabubi bwabo azinyonyoono zyabo, nkaambo basofwaazya nyika yangu azikozyanyo zyabo zitakwe buumi zivundausya kumoyo akuzuzya nyika yangu amituni yabo iisesemya.”

Kukomba kwa Jelemiya kwakusyoma kuti Mwami Leza ulamucitila ncayanda

¹⁹ O Mwami Leza, O Singuzu wangu olukwakwa lwangu, omatijilo aangu ciindi camapenzi, misyobo yoonse iyooboola kulinduwe, kuzwa kumagolelo aanyika izooti, “Basikale besu taakwe ncobakajisi ccita baleza bakubeja, mituni yabuyo eeyo yatakabacitila zibotu pe. ²⁰ Sena bantu balakonzya kulipangila baleza babo beni? Iiyi, pele tabali baleza beni pe!”

²¹ Mwami Leza ulati, “Nkaako ndabaiisya, ciindi cino ndabaiisya nguzu ansana zyangu mbozibede. Eelyo balaziba kuti Mwami Leza ndezina lyangu.”