Jelemiya 15
Mapenzi aaboolela bantu bacisi ca Juda
1 Mpoonya Mwami Leza wakati kulindime, “Nikuba kuti Mozesi a Samuyele kabaima kumbele lyangu, kundikombelezya nindataboozya moyo wangu kubantu aaba. Batande bazwe kumbele lyangu! Kabaya!
2 Kuti naa bakubuzye kuti, ‘Ino tuye kuli?’ Ubaambile kuti,
Mboobu mbwaamba Mwami Leza ulati, ‘Aabo babambilidwe lufu balafwa,
aabo babambilidwe kujaigwa munkondo balajaigwa, aabo banzala, nzala ilabatola,
aabo babambilidwe kutolwa mubwaange balatolwa mubwaange.’”
3 “Njootuma zinyonyoona zyamisyobo yone. Mbwaamba Mwami Leza. Munkondo bayoojaigwa, babwa bayoobakwelaanya, bayuni bamuluuwo, abanyama babutambo munyika bakabalume akubanyonyoona. 4 Njoocita kuti bakasesemye kumalelo oonse aamunyika akaambo kaceeco Manase mwanaa mwami Hezekiya mwami wa Juda ncaakacita mu Jelusalemu.
5 “Nguni uuyookubeda aankumbu o Jelusalemu?
Nguni uuyookulila? Nguni uunga waima kuti akujuzye?
6 Wakandikaka, Mbwaamba Mwami Leza. Lyoonse ujokela munsi.
Nkaako ndakujata ndakunyonyoona, nsicikweeteleli limbi pe.
7 Njoobapululula acipupuluzyo kumilyango yaminzi yacisi.
Njoocita kuti bakafwidwe akuletela bantu bangu lunyonyooko, nkaambo tabanaleka nzila zyabukkale bwabo.
8 Njoocita kuti bamukabafu bakavule kwiinda musenga wankomwe yalwizi.
Acilungu-lungu njooleta sikunyonyoona uzoojaya bamanyina abakubusi babo, njoobaletela macise akuyoowa cakufwambaana.”
9 Mukaintu uujisi bana bali ciloba uyoonetuka akupefula.
Liyoomubbilila walo zuba nokuba kuti linoocili sikati,
uyoofwa nsoni akusampuka. Basyeede bayoojaigwa munkondo,
kumbele lyabasinkondonyina. Mbwaamba Mwami Leza.
Jelemiya mbwaakatongookela Mwami Leza
10 Maawe baama, nomwakandizyala, ndimuntu uulwanwa akukanzigwa mucisi coonse! Nsikweletezezye muntu nikuba kukweleta pe, nikuba boonse buyo balandisinganya. 11 Nkaako O Mwami Leza acibe boobo kuti naa tiindakabakombelezezya kulinduwe, kuti zintu zibeendele kabotu, kuti naa tiindakakombela basinkondoma muciindi camapenzi amuciindi camakatazyo. 12 Sena muntu ulakonzya kutyola lubulo, lubulo luzwa kubbazu lyakunyika nuuba mukuba?
13 Lubono lwako aziyobwedo zyako ndiyoozyaaba kuti zibe zisaalo zyakubweza buyo, akaambo kazinyonyoono zyako mucisi coonse. 14 Ndiyookucita kuti ukabe muzike wabasinkondonyoko munyika eeyo njotazi, nkaambo bukali buyooyasya mulilo ooyo uuyookutenta.
15 O Mwami Leza ulindizi, kondiyeeya akundibamba. Ndilwanine baabo bandipenzya. Mulweengelelo lwako utanditandi, koyeeya mbondisampaulwa akaambo kanduwe. 16 Majwi aako naakasika ndakaalya akali kunditangazya akundibotezya mumoyo, nkaambo ndibandwa zina lyako O Mwami Leza Singuzuzyoonse. 17 Tiindakkede munkamu yabasampaula, kunyina nindakasekelela ambabo, ndakali kukkala endikke buyo nkaambo janza lyako lyakali alindime, alimwi wakandizuzya bukali. 18 Lino nkaambo nzi kuciswa kwangu takumani, cilonda cangu candoombya tacisilikiki? Sena uyanda kundibeda mbuli kalonga, mbuli kasensa kayuminina?
19 Nkaako mboobu mbwaamba Mwami Leza ulati, “Kuti naa weempa, ndakubukulusya kuti undimanine milimo, kuti naa waambe cimvwigwa, kutali majwi aabuyo, unooli musinsimi wangu. Bantu aaba bapilukile kulinduwe, pele yebo utapilukili kulimbabo pe. 20 Njoocita kuti ukabe bwaanda bwabantu aaba, lukwakwa lwabwaanda lwamukuba, bayookulwana, pele tabakooyookuzunda, nkaambo ndili aanduwe kuti nkuvune nkufutule, Mbwaamba Mwami Leza. 21 Njookuvuna kuzwa kumaanza aabantu babi akukunununa kuzwa kubantu basilunya.”