Jelemiya 14
Zyaciyuma-yuma cibyaabi
1 Ngaaya majwi aa Mwami Leza ngaakaambila Jelemiya azyaciyuma-yuma wakati,
2 “Cisi ca Juda cilalila, milyango yaco ili gwee,
bantu baco balalila bakkede ansi, kulila kwabantu ba Jelusalemu kwamvwigwa.
3 Basololi batuma babelesi babo kuti balete maanzi,
balainka kuzitelekezyo, pele taakwe maanzi ngobajana.
Balaboola anongo zyabo mbuboobu, baliyoowede akutyompwa, balijata kumitwe.
4 Nyika ilaandaukide nkaambo kwabula mvula mucisi, balimi baliyoowede, akulijata kumitwe.
5 Cakuti ayalo mbaambi yasiya kana kayo kakazyalwa onoono, nkaambo kunyina bwizu.
6 Bacibize baliimvwi mutulundu tunyina bwizu,
balafwekemba mbuli bamwaaba, tabacibonesyi, bagonkelwa akaambo kakubula macelelo.”
7 Nikuba kuti azyalo zinyonyoono zyesu zilatuzula,
O Mwami Leza kocita cintu cimwi akaambo kazina lyako.
Nkaambo kuwa kwesu nkupati, twakakubisizya.
8 Yebo olulangilo lwa Baisilayeli, yebo oobavuna nobali mumapenzi,
nkaambo nzi noli mbuli mweenzu munyika, mbuli silweendo woona buyo busiku bomwe?
9 Ino nkaambo nzi nooba mbuli mwaalumi uuzingidwe wavundumukilwa,
mbuli silumamba uutakonzyi kuvuna?
Uli akati kesu O Mwami Leza, swebo notubandwa zina lyako, Utatulekelezyi pe.
10 Mboobu mbwaamba Mwami Leza ulati, “Kasimpe balayandisya kwiingaila tabaleki kweenda. Aboobo Mwami Leza tabatambuli pe, ono ulaibaluka bubi bwabo akubasubula akaambo kazinyonyoono zyabo.”
11 Mpawo Mwami Leza wakati kulindime, “Utakombeli bantu aaba kuti zintu zibeendele kabotu pe. 12 Nikuba kuti baliimya kulya, nsikooswiilila kuli nzyobandililaukila, nikuba kuti kabapa zipaizyo zyakutenta azituuzyo zyamaila, nsikoozitambula pe. Pele mucilawo cakuzitambula ndabanyonyoona munkondo, nzala alimwi acuumo.”
13 Pele mebo ndakati, “Akaka, O Mwami Leza, basinsimi babaambila kuti, ‘Tamukaboni nkondo nokuba kufwa nzala. Kasimpe njoomupa luumuno lutakamani muno mubusena.’”
14 Mpoonya Mwami Leza wakati kulindime, “Basinsimi basinsima zyakubeja muzina lyangu. Tiindakabatuma nikuba kubanomoona, nokuba kwaambaula kulimbabo pe. Bamusinsimina zilengaano zyakubeja, alweeno lwamanjezeezya aabo beni.” 15 Nkaako mboobu mbwaamba Mwami Leza azya basinsimi aabo basinsima muzina lyakwe ulati, “Aabo tiindakabatuma, nikuba boobo baamba kuti, ‘Taakwe nkondo noiba nzala iizosika mucisi muno.’ Basinsimi aabo mbabonya bayooloba munkondo anzala. 16 Bantu aabo mbobasinsimina bayoosowelwa mumigwagwa yamu Jelusalemu akaambo kanzala ankondo. Taakwe uuyoobazikka nobaba bakaintu babo, nobaba bana babo balombe naa basimbi. Njoobatilila mapenzi aayo aabeelede.” 17 Mwami Leza wakandilailila kuti ndaambile bantu kuti,
“Meso aangu aakunke misozi, masiku asikati cakutaleka,
nkaambo mwanaangu musimbi uutana ziba mwaalumi, ooyu mbantu bangu,
walicisa cilonda cipati, cilonda cini.
18 Kuti naa ndainka musokwe, ndibona baabo bakajazigwa panga,
naa ndanjila mumunzi, ndibona bagonkedwe anzala.
Boonse bobilo musinsimi amupaizi balabeleka kabatazi ncobacita.”
Bantu mbubakakombelezya Mwami Leza
19 Sena O Mwami Leza wacikakila limwi cisi ca Juda? Sena wasampaula Ziyoni?
Nkaambo nzi nootupenzya boobu cakuti tatukonzyi kuponyezegwa?
Twali kulangila luumuno, pele taakwe cibotu ncitwabona,
twali kulangila ciindi cakuponyezegwa, pele kwaboola buyo ziyoosya.
20 O Mwami Leza, twaziba bubi bwesu, amulandu wabasikale besu, kasimpe twakakubisizya.
21 Akaambo kazina lyako utasampauli, utaubausyi cuuno cako cabulemu.
Koyeeya cizuminano cesu ncookapangana andiswe, utacityoli pe.
22 Sena kuli mutuni buyo wamisyobo eeyi imwi uuleta mvula?
Sena julu lilikke lilakonzya kuwisya lunywaanywa?
Peepe, nduwe olikke O Mwami Leza wesu. Nkaako lulangilo lwesu luli mulinduwe,
nkaambo nduwe buyo uucita zintu zyoonse eezi.