Jelemiya 13
Mulembo wandeketela
1 Mboobu mbwaakaamba Mwami Leza kulindime wakati, “Koya uule mulembo wandeketela, uusame mucibuno pele utaunyiki mumaanzi.” 2 Mpoonya ndakaula mulembo, mbubonya mbuli Mwami Leza mbwaakalailila akuusama mucibuno.
3 Aawo majwi aa Mwami Leza akandisikila lwabili, 4 akati, “Bweza mulembo ooyo ngookaula ngosamide mucibuno, uunke lino kumulonga wa Yufuletisi, ukausise ooko mulwaanzi lwamumpangala lwamyaala.” 5 Nkaako ndakainka ndaakuusisa ku Yufuletisi mbubonya mbuli Mwami Leza mbwaakandaambila.
6 Nikwakainda mazuba manji Mwami Leza wakandaambila kuti, “Lino koya ku Yufuletisi, ukalete mulembo ngundakakwaambila kuti ukuusise kuya.” 7 Aboobo ndakainka ku Yufuletisi akuyoofumuna mulembo ooyo nduugwisya aawo mpundakausiside, pele ciindi eeci wakali nyonyookede, kuutacikwe mulimo naaba aasyoonto.
8 Mpoonya majwi aa Mwami Leza akandisikila akati, 9 “Mboobu mbwaamba Mwami Leza ulati, ‘Munzila njoonya eeyi njoozimaanya kulisumpula kwacisi ca Juda, akulisumpula kupati kwabamu Jelusalemu.’ 10 Bantu babi aaba bakaka kuswiilila majwi aangu, batobela cinguni camyoyo yabo akutobela baleza bambi kuti babamanine milimo akubakomba, bayooba mbuli mulembo ooyu, taakwe ancobaciyookonzya kucita pe! 11 Mbubonya mbuli mulembo wangu mucibuno camuntu, mbubonya oobo ndakalyaangilila baluzubo lwa Isilayeli boonse abaluzubo lwa Juda. Mbwaamba Mwami Leza, kuti babe bantu bangu kutegwa ndidume, nditembaulwe akulemekwa. Pele tiibakaswiilila pe.”
Nkomo zyawaini zyakabbotolwa
12 Baambile kuti, “Mboobu mbwaamba Mwami Leza, wa Isilayeli ulati, ‘Nkomo zyawaini zyoonse zizuzigwe.’ Nkabela kuti naa bakaambe kuti, ‘Sena swebo tatuzi naa kuti nkomo zyawaini zyeelede kuzuzigwa waini?’ 13 Mpawo yebo ukabaambile kuti, Mboobu mbwaamba Mwami Leza ulati, ‘Ndiyanda kuti bantu boonse bakkala munyika eeyi bakolwe, kubikkilizya abamami aabo bakkala acuuno cabwami ca Devedi, bapaizi, basinsimi, aabo boonse bakkala mu Jelusalemu.’ 14 Njoobapwazyanya antoomwe, abalo bamawisi abana babo balombe mbubonya. Mbwaamba Mwami Leza. Nsikabeeteleli, nikuba kubeengelela nikuba kubabeda aankumbu kutegwa ntakabanyonyooni pe.”
Jelemiya mbwaakacenjezya zyakulisumpula
15 Amuswiilile mucenjeke matwi, mutabi basikulisumpula, nkaambo Mwami Leza nguwaamba.
16 Amulemeke Mwami Leza wanu, natanaleta mudima, kamutana lifumpula musiya-siya.
Mulangila mumuni, pele uyoousandula kuba mudima mulemu, uyooucita musinze.
17 Pele kuti naa kamutaswiilili njoolila cakusisikizya akaambo kakulisumpula kwanu,
meso aangu ayoolilisya, ayooenda misozi, nkaambo butanga bwa Mwami Leza buyootolwa mubwaange.
18 Koambila mwami abanyina kuti, “Amuseluke azyuuno zyanu zyabwami, nkaambo misini yanu yabulemu iyooloka kuzwa amitwe yanu.” 19 Minzi yakumusanza ku Negevu iyoojalwa nkabela taakwe muntu uuyooijalula. Bantu bamu Juda boonse bayootolwa mubwaange, bayoomaninina kutolwa mubwaange.
20 Amutambye meso mubone baabo baboola kuzwida kulubazu lwakunyika. Ino buli kuli butanga oobo mbomwakapedwe kuti kamubulanga, mbelele eezyo nzimwakali kulisumpwida? 21 Ino muzooamba kuti nzi Mwami Leza nazoomubikkila baabo mbumwali kuti mbalongwe banu beni-beni kuti bamulele? Sena tamuzoomyongwi mbuli mukaintu uuyanda kutumbuka? 22 Kuti naa mwalibuzya-buzya lwanu nobeni kuti, “Ino nkaambo nzi eezi ncizyakacitika kulindiswe?” Zyacitika akaambo kazinyonyoono zyanu zinji, ncizyazapukila zifunga zyanu mwajatwa. 23 Sena muntu uusiya ulakonzya kusandula lukanda lwakwe? Naa siluwe tubala-bala twakwe? Mbubonya oobo anywebo tamukonzyi kucita zibotu, nkaambo muzibide kucita zibi. 24 Ndiyoomumwaisya mbuli bungu bupupululwa aluuwo lwamunkanda. 25 Eeci ncecaabilo canu, caabilo eeco ncindakalailila kuti mupegwe. Mbwaamba Mwami Leza. Nkaambo mwakandiluba, akusyoma baleza bakubeja. 26 Njoomuvumbula zifunga zyanu mane zikasike kumutwe kutegwa mukabonwe zinswe zyanu, 27 ndibone mbomulila mubumambe bwanu amuzisusi, bwaamu bwanu butamujazyi nsoni pe! Ndakabona milimo yanu iisesemya mutulundu amumyuunda. Maawe kulinduwe omunzi wa Jelusalemu! Ino ulakkala ciindi cilamfu cili buti kocisofweede?