Izaya 8

Zya mwana mulombe wa Izaya

¹ Lino Mwami Leza wakati kulindime, “Bweza cilembelo cipati, nkabela ulembe majwi aaya mubulembo bupati alincico uti, ‘Mahasyalalihasyibazi nkokuti, fwanzya kunyanzya, fwambaana kusaala.’ ² Kotola baalumi bobilo basyomeka, ba Uliya mupaizi a Zekaliya mwanaa Jebelekiya kuti bakabe bakamboni bako.”

³ Musule akooku, mukaintu wangu musinsimi wakamita akuzyala mwana mulombe. Mpoonya Mwami Leza wakandaambila kuti, “Muulike kuti, ‘Fwanzya kunyanzya, fwambaana kusaala.’ ⁴ Nkaambo mwana mulombe ooyu katanakomena akuziba kwaamba kuti, ‘Baama naa Taata,’ lubono loonse lwaku Damasikasi alwaku Samaliya luzoosaalwa, akutolwa amwami waku Asiliya.”

Mwami waku Asiliya ulaboola

⁵ Mwami Leza alimwi wakandaambila kuti, ⁶ “Nkaambo kakuti Baisilayeli bakaka maanzi aabateme aakalonga ka Syilowa bakkomanina Lezini amwanaa Lemaliya, ⁷ mebo nde Mwami Leza njooleta mwami waku Asiliya abasinkondo bakwe boonse kuti bazoolwane cisi ca Juda. Bazoopompa mbubonya mbuli fwipi-fwipi lyamaanzi lifwasukila mulonga wa Yufuletisi.” ⁸ Bazookukula cisi ca Juda coonse akumana bantu mbubonya mbuli bukukula mulonga nuusika mububiya akubbizya zintu zyoonse. Aalo maanzi aawo ayoobaama mbuli mababa aamuyuni akuzuzya nyika yako yoonse. Akaka Imanuweli, yebo O Leza koba aandiswe. ⁹ Amuzyangame, nywebo nomisyobo yabantu, nikuba boobo mulapwaigwa! Amuswiilile anywebo nomuli mumasi aali kulaale. Amulibambilile nkondo, pele mulapwaigwa! Iiyi, amulibambile, pele mulapwaigwa! ¹⁰ Amuyeeye mbomuticite, pele tamutizwidilile. Amupangane mbomunga mwacita, pele taakwe ncocitigwasye pe, nkaambo Leza ulaaswe.

Mwami Leza mbwaakacenjezya musinsimi

¹¹ Munguzu zyakwe mpati Mwami Leza wandicenjezya kuti intabi netobela nzila zyabantu aaba pe. Wati, ¹² “Yebo utanoonjili muli nzyobapangana, alimwi utanooyoowi zintu eezyo nzyobayoowa balo pe. Utanookankami. ¹³ Koyeeya kuti mebo nde Mwami Leza Singuzuzyoonse ndilasalala, ndime ngoelede kuyoowa ngoelede kulemeka. ¹⁴ Uyooba busena busalalisya, pele kulibaaba ndiyooba bbwe lileba bantu, mwaala uufumpula. Kubantu baku Jelusalemu ndiyooba cisilazya akakole. ¹⁵ ‘Bunji bwabo bayoolifumpula, bayoowa akutyoka bayooteegwa akucegwa.’”

Bantu mbubakacenjezegwa zyakusonda

¹⁶ Lino nywebo nobasikwiiya bangu amwaambe kabotu makani aaya Leza ngaandipa. ¹⁷ Ndalangila Mwami Leza ooyo uulisiside kuli balunyungu lwa Jakobo. Alikke ngwendisyoma.

¹⁸ Tee kayi mwandibona mebo abana bangu aaba Mwami Leza mbaakandipa? Ndendiswe zigambya azitondezyo mu Isilayeli eezyo zyazwa ku Mwami Leza Singuzuzyoonse, ooyo uukkazikide cuuno cakwe cabwami mucilundu ca Ziyoni.

¹⁹ Ciindi bantu nobamwaambila kuti amukabuzye zyamapenzi aanu kubasondi abamukabami bapetekezya akuvuta-vuta mukwaamba kwabo, mutakainki. Tee kayi mweelede kabuzya Leza wanu. Ani inga mwaya buti kubafu kubuzya zyabaumi? ²⁰ Kuti kabataambi zyanjiisyo abumboni bwa Leza nkokuti kunyina mumuni mulimbabo.

Ciindi camapenzi

²¹ Bantu bayooingaila munyika, kabatyompedwe akufwa nzala. Nkabela muciindi canzala amukunyema kwabo bayoosinganya mwami wabo a Leza wabo. Bayoolungumana mujulu, ²² akusinama kutongomwena ansi, nikuba boobo taakwe ancobatikabone pe, pele buyo mapenzi amudima uusiya mbi, uuyoosya mumudima mumonya mobayootonkelwa.