Izaya 66
Mwami Leza wabeteka misyobo yoonse
1 Mboobu mbwaamba Mwami Leza ulati, “Julu ncecuuno cabwami ayalo nyika ncilyatilo camaulu aangu, ino niŋanda iili buti eeyo njomunga mwandiyakila? Buli kuli busena mbwenga ndalyookezezya? 2 Sena nsili ndime nindakalenga zintu zyoonse eezi kumane zyakaba mbubonya? Mbwaamba Mwami Leza. Mbaaba bantu mbendibotelelwa, aabo babombe myoyo bausa mumyoyo yabo akaambo kazinyonyoono zyabo, bakankama nobamvwa majwi aangu. 3 Pele kufumbwa ooyo uupaizya mupoho, uuli mbuli ooyo uupaizya muntunyina. Nkabela kufumbwa uupaizya kabelele, uli mbuli yooyo uutyola nsingo yamubwa. Kufumbwa uuumpa cituulo camaila, uli mbuli yooyo uutuuzya bulowa bwangulube. Kufumbwa uumupa tununkilizyo twaciibalusyo, uli mbuli yooyo uukomba mutuni. Batobela nzila nzyobayanda beni, myoyo yabo ilabotelelwa muzisesemyo zyabo, 4 aboobo ndiyoobapa mapenzi mapati, ndiyoobaletela zeezyo nzyobayoowa. Nkaambo nindakabaita kunyina wakamvwa pe, nindakakanana kulimbabo kunyina wakaswiilila. Bakacita zintu zibi nkelibwenene, bakasala zintu eezyo nzyetabotelwi anzizyo pe.” 5 Amuswiilile majwi aa Mwami Leza, nywebo nomukankama aambaula. “Bana bokwanu aabo bamusulaika akumusalulula akaambo kazina lyangu, baamba cakusabula kabati, ‘Mwami Leza aabonye bulemu bwakwe kutegwa tubone kutangala kwanu!’ Nikuba boobo bayoousigwa nsoni. 6 Amumvwe lupyopyongano lwamunzi uulya, amumvwe kuyobeka kuŋanda iikombelwa! Mwami Leza nguubweedezezya basinkondonyina bubi bubeelede.” 7 “Ziyoni uli mbuli mukaintu uutumbuka katanamvwa nsungo, katanaminingana watumbuka mwana mulombe. 8 Nguni wakamvwide kale cintu cili boobo? Nguni wakabwene kale cili boobu? Sena cisi cilakonzya kuzyalwa mubuzuba bomwe naa musyobo ulakonzya kuba mukaindi kasyoonto? Pele walo Ziyoni uuyoozyala bana mukaindi kasyoonto katanamyongwa pe. 9 Sena inga ndimumyonzya buyo kwamana nsimutumbusyi? Mbwaamba Mwami Leza. Sena ndaanga mukaintu ciindi nemutumbusya?” Mbwaamba Leza wanu.
10 Amusekelele antoomwe a Jelusalemu
mutangale nywebo nyoonse nomuuyanda,
amusekelele kapati anguwo nywebo nomuulila.
11 Muyoonyonka akukkuta kunkolo zyawo zyuumbulizya,
muyoonywa kapati, akuyoobotelwa muli zyoonse nzyuujisi.
12 Mboobu mbwaamba Mwami Leza ulati, “Luumuno lwawo luyoopaya mbuli mulonga, buvubi bwamisyobo imwi buyookunka mbuli kalonga kapaya, muyonyonka, muyobbalilwa akasolo, muyootansikwa amaulu aawo. 13 Mbubonya mbuli mukaintu mbwaumbulizya mwanaakwe, mbubonya oobo ambebo mbwendiyoomuumbulizya, muyooumbulizigwa mu Jelusalemu. 14 Mwaakubona ceeci, myoyo yanu iyoosekelela, muyoosyuuka mbuli bwizu, nguzu zyajanza lya Mwami Leza ziyoobonwa ababelesi bakwe, pele aabo bamulwana uyoobatondezya bukali bwakwe.” 15 Amubone, Mwami Leza ulaboola amulilo, nkalaki zyakwe zilabilima mbuli kambizi kuti bukali bwakwe buvutuke, kutapatila kwakwe kuzwa mulilo uuvwilima. 16 Mwami Leza uyoobeteka bantu boonse amulilo apanga, nkabela banji bayoojaigwa a Mwami Leza. 17 “Aabo balisalazya akulibambilila kuya kumyuunda batobela umwi uuli akati kabaabo balya nyama yangulube abasikoswe azintu zimwi zisesemya boonse bayoolobela antoomwe. Mbwaamba Mwami Leza. 18 Lino akaambo kamicito amiyeeyo yabo, ndaboola kuzooyobolola misyobo amilaka yoonse, bayooboola kuzoobona bulemu bwangu. 19 Ndiyoobikka citondezyo akati kabo, ndiyootuma bamwi babaabo basyeede kumisyobo imwi, ku Taasyisyi, ku Puti a Ludi basimata badumide, ku Tubali aku Javani, mane kuyoosika kusumbu zyakulaale ooko nkobatanamvwide zyampuwo zyangu nikuba kubona bulemu bwangu.
20 “Bayooleta bana bokwanu boonse bali mumasi oonse kucilundu cangu cisalala mu Jelusalemu kuti bazoopegwe ku Mwami Leza, kabatantide amabbiza, nkalaki, zikwiliba, mamyuulu, ankamela. Mbwaamba Mwami Leza. Bayoobaleta mbubonya mbuli Baisilayeli mbobaleta maila aakutuuzya kuŋanda ya Mwami Leza muzibiya zisalala camulawo. 21 ‘Ndiyoonomoona bamwi babo kuti bakabe bapaizi a Balevi, Mbwaamba Mwami Leza. 22 Mbubonya mbuli julu pya anyika eeyo njooyoolenga mboziyookkalilila kumbele lyangu, mbwaamba Mwami Leza, mbubonya oobo zina lyangu abalunyungu lwangu mbobayookkalilila. 23 Kuzwa kumwezi mupya kuyoosika likkala uumbi, kuzwa ku Sabata imwi kuyoosika kuli iimbi, bantu boonse bayooboola akuzoondikotamina. Mbwaamba Mwami Leza. 24 Eelyo bayoonyamuka akuyooinka kuyoobona mitumba yabaabo bakali kundizangila, oomo mvunyu zyabo mozitafwi, alimwi mulilo muutazimi pe. Nkabela bayoosesemya bantu boonse.’”