Izaya 59

Musinsimi mbwaakasinganya zinyonyoono zyabantu

¹ Kasimpe janza lya Mwami Leza talili fwiifwi, cakuti talikonzyi kufutula pe, nikuba kutwi kwakwe kuti takonzyi kumvwa. ² Pele zibi zyanu nzizyakamwaandaanya kuzwa kuli Leza wanu, zinyonyoono zyanu nzizyakamucita kuti Leza alisise kuzwa kulindinywe kutegwa atamumvwi pe. ³ Nkaambo maanza aanu abijide bulowa, minwe yanu ijisi milandu. Milomo yanu yaamba zyakubeja, milaka yanu igwisya zibi zyalo. ⁴ Taakwe uubeteka mubululami, taakwe uubeteka mulusinizyo. Basyoma buyo zyakukazyanya akwaamba zyakubeja. Bamita mapenzi akuzyala bubi. ⁵ Bakonkona mayi aabacipile, basuma luubilili. Kufumbwa uulya mayi aabo ulafwa, ji lyomwe lyabbotoka, kuzwa cipile. ⁶ Luubilili lwabo talukonzyi kubambya zyakusama, tabakonzyi kusama zeezyo nzebalisumina. Milimo yabo mmilimo mibi, lyoonse mbabaleta manyongwe. ⁷ Maulu aabo azuzaanina muzinyonyoono, balafwambaana kutila bulowa bwabatakwe milandu. Miyeeyo yabo mmibi, nzila zyabo nkunyonyoona akusinya. ⁸ Nzila yaluumuno tabiizi, munzila zyabo kunyina bululami. Bakazisandula kuba migwagwa iipilingene, taakwe weendela mulinzizyo uuzi luumuno pe.

Bantu mbubakalyaamba zinyonyoono zyabo

⁹ Lino bantu bakati, “Ono twabona ncokutakwe lubeta luluzi, ancokutakwe bululami. Twalangaula mumuni, pele koonse-koonse mudima walo, twalangaula kumweka ndendilyo notweendela mumusinze. ¹⁰ Tulaampaampa bwaanda mbuli boofu, Tulaampaampa mbuli bantu batakwe meso. Acilungu-lungu tulalifumpula mbuli kuti nkuulubundu-bundu. Akati kabasintanze tuli mbuli bafwide kale. ¹¹ Toonse tulavuluma mbuli munyama wabutambo, tulalila cakupululuzya mbuli nziba. Tulangaula bululami. Pele tatubujani, tulangaula kufutulwa pele kuli kulaale.

¹² “Nkaambo kakuti milandu yesu minji kulinduwe O Leza, azyalo zibi zyesu zilatuzula. Milandu yesu ilituyeeme lyoonse, tulizi zibi zyesu. ¹³ Zinyonyoono zyesu nkuzanga, zyakudyaminina akubukila, twaamba zyakubeja zili mumyoyo yesu. ¹⁴ Aboobo twabona kuti buluzi bwatutantamuka, bululami buli kulaale. Taakwe bwini buboneka mubbuwa, kusyomeka kwasinkilwa muminzi. ¹⁵ Taacikwe kucita zyabwini woonse uukasya bubi ulalyeetelezya.” Mwami Leza naakalanga wakabijilwa kubona kuti kunyina ziluleme.

Mwami Leza uyanda kufula bantu bakwe

¹⁶ Wakabona kuti kunyina muntu naba omwe wakagambwa kubona kuti kwakanyina muntu naba omwe, uukonzya kubaiminina. Aboobo wakayeeya buyo kuti abafutule ajanza lyakwe, kwiindila mubululami bwakwe wakacita oobo. ¹⁷ Wakasama bululami mbuli cikwabilizyo caacamba, akusama ngowani yalufutuko kumutwe. Wakasama cisani kakanzide kapati kuti acite zintu kuti zyeende kabotu, akusubula bantu aabo bakali kupenzya bamwi. ¹⁸ Kweendelana azeezyo nzibakacita, awalo uyoobabweedezezya mubukali basinkondonyina. Uyoobapilusizya aabo bamulwana. Bantu aabo bakulaale uyoobabweedezezya zyeelede. ¹⁹ Kuzwa kumbo bantu bayoolemeka zina lya Mwami Leza, aabo bali kuzwida zuba bayooyoowa bulemu bwakwe. Nkaambo uyooboola mbuli mulonga uufwasauka, uutonkwa aguwo lya Mwami Leza. ²⁰ “Munununi uyooboola ku Ziyoni, kuli baabo baluzubo lwa Jakobo beempa kuzinyonyoono zyabo,” mbwaamba Mwami Leza.

²¹ Mboobu mbwaamba Mwami Leza ulati, “Lino mebo nceeci cizuminano cangu ncetipangane ambabo. Muuya wangu uuli mulinduwe, majwi aangu ngindakabikka mumulomo wako tokaalubi pe, abana bako tabakaalubi, lunyungu lwabo talukaalubi kuzwa sunu mane kukabe kutamani,” mbwaamba Mwami Leza.