Izaya 58

Kuliimya kwini-kwini

¹ Mboobu mbwaamba Mwami Leza ulati, “Ongolola canguzu, utaleki pe. Pozomokesya mbuli mweembo. Ambilizya kubantu bangu zyabuzangi bwabo, baambile baluzubo lwa Jakobo zyazinyonyoono zyabo. ² Buzuba abuzuba bantu aaba balandiyandaula balayandisya kuziba nzila zyangu mbuli kuti musyobo uucita ziluleme, uutanasiya malailile aa Leza wabo. Balandikumbila mbeta ziluleme, balayandisya kuswena aafwiifwi kuli Leza.” ³ Balati, “Ino nkaambo nzi ncotuliimya kulya kwamana yebo tobwene? Nkaambo nzi ncotulibombya kwamana yebo tokubwene?” Amubone mubuzuba mbomuliimya kulya, mulacita mbuli mbomuyanda nobeni, akupenzya babelesi banu boonse. ⁴ Kuliimya kulya kwanu kubusya kupampanga akulwana, mulaumana ntuku zyabubi. Kuliimya kulya kuli mbuli nkomucita sunu takukonzyi kumvwigwa kujulu pe. ⁵ Sena ooku nkokuliimya kulya ooko nkondakasala kwabuzuba bomwe kuti muntu alibombye? Sena nkwakuligogomeka mutwe buyo mbuli lubu, akulala amasaka mutwe? Sena ooku nkomunga mwati nkuliimya kulya akuti mbuzuba butambulika ku Mwami Leza? ⁶ Sena kuliimya kulya nkundakasala takuli kwakwaangununa nketani zyalusalululo, kukkulula zitolopo zyajoko lyaluciso. Kwaangununa badyaminidwe, akuleka luciso luli loonse? ⁷ Sena takuli kwaabila zilyo zyanu kuli bafwa nzala? Sena takuli kuti kamupa maanda kuli basimutuntuli? Mwabona batakwe zisani mubape, kutali kuti kamulekelezya bantu bokwanu. ⁸ Eelyo mumuni wanu uuyoolibonya, muyoofwambaana kuponyezegwa, bululami bwanu buyoomusolweda, bulemu bwa Mwami Leza buyoomukwabilila musule. ⁹ Eelyo mwaakumana kukomba, Mwami Leza uyoomuvuwa. Mwaakumulilila kuti amugwasye uyooti, “Ndime aano.” Kuti naa muleke zyakudyaminina, muleke kutondekana minwe azyakukanana kwaluciso, ¹⁰ kuti naa kamulipenzya kutegwa mwaabile bafwa nzala, akubacitila zyeelede aabo badyaminidwe, aawo mumuni uyoolibonya mumudima busiku buyoolibonya mbuli sikati. ¹¹ Mwami Leza uyoomusolweda lyoonse, uyoomucitila zyoonse nzyomuyanda munyika yacimpayuma akumuyumya. Muyooba mbuli muunda uutililwa kabotu, mbuli kasensa kamaanzi aatayuminini. ¹² Bantu bako bayooyakulula matongo aakale-kale, basikubukulusya bwaanda mbabayoobukulusya ntalisyo zyamazyalani aakale zyakooledwe, basikubukulusya maanda aakawa atuzila twawo.

Bulumbu bwakubamba Sabata

¹³ Mwami Leza ulati, “Kuti naa mwabubamba buzuba bwa Sabata, akuleka kucita nzyomuyanda mubuzuba oobu, kuti naa mwabucita mbuli buzuba bupati bulemenede ku Mwami Leza, cakuti kamuteendi nyendo akutacita mbuli mbomuyanda akwiide kukanana zyabuyo, ¹⁴ muyootangala mu Mwami Leza ndiyoomucita kuti mukalemekwe munyika, eelyo muyoolikkalila munyika eeyo njindakapa sikale wanu Jakobo kuti ibe lukono lwakwe, ‘Mebo lwangu nde Mwami Leza ndime ndaamba.’”