Izaya 56
Misyobo yoonse iyooba bantu ba Leza
1 Mboobu mbwaamba Mwami Leza ulati, “Kamubeleka bweelede,
alimwi kamucita ziluleme, nkaambo lufutuko lwangu luli afwiifwi,
bululami bwangu bulayubununwa cakufwambaana.
2 Ulilelekedwe muntu ooyo uucita eeci,
muntu ooyo uukakatila kuli ceeci,
uubamba Sabata cakutaisofwaazya, uulilesya kucita cibi.”
3 Wamasi ooyo uuboola kuzookkala abantu ba Mwami Leza ataambi kuti,
“Kasimpe Mwami Leza uzoondigwisya akati kabantu bakwe.”
Awalo muzibe atatongooki kuti, “Ndili mbuli cisamu cakayuma.”
4 Mboobu mbwaamba Mwami Leza ulati,
“Kumuzibe ooyo uubamba Masabata aangu,
ooyo uucita nzindibotezya, akukakatila, kucizuminano cangu,
5 muŋanda yangu amukati kabwaanda bwangu,
njoobapa ciibalusyo azina bbotu kwiinda bana balombe abasimbi.
Ndiyoobapa zina eelyo litakamani litakagwisigwi pe.
6 Bamasi aabo bakkala akati kabantu ba Mwami Leza,
aabo bayanda kumumanina mulimo, aabo bayanda zina lya Mwami Leza,
akukomba, aabo babamba Sabata cakutaisofwaazya,
bakakatila kucizuminano cangu,
7 njoobaleta kucilundu cangu cisalala,
akubasekelezya muŋanda yangu yakukombela.
Zituuzyo azipaizyo zyabo zyoonse ziyootambulika acipaililo cangu,
nkaambo ŋanda yangu iyootegwa ŋanda iikombela misyobo yoonse.”
8 Mwami Leza ooyo uuyobolola bakali baange ba Isilayeli ulati,
“Njooyobolola abaabo bamwi kunze lyabaaba bakayobololwa kale.”
Basololi ba Baisilayeli mbubakasinganyizigwa
9 Mboobu mbwaamba Mwami Leza ulati,
“Amuboole nywebo nyoonse nobanyama bamusokwe,
amuboole mubalye, nywebo nobanyama bamusaka.
10 Balindizi bamu Isilayeli mboofu, boonse tabajisi luzibo,
nzibwa ziide kulakama, tazikonzyi kukuwa,
ziide kulala akulota, ziyandisya koona.
11 Mbabwa basindya kapati,
tabakkuti, mbeembezi batakwe maanu,
umwi aumwi uyanda kulikkomanisya mwini akulijanina mpindu.
12 Umwi aumwi ulati, ‘Koboola ndilete waini.
Atunywe tukolwe bukoko!
Bwajuunza buzooba mbubonya mbuli bwasunu,
ambweni mane buzooinda buya.’”