Izaya 55
Leza mbwayoobeengelela
1 “Amuboole nyoonse nomufwide nyota, amuboole kumaanzi.
Anywebo nomutajisi mali amuboole muzooule mulye.
Amuboole muule waini amukupa uutaulwi amali pe, uupegwa buyo!
2 Ino musowela nzi mali aanu azintu zitaligwi?
Ino mubelekela nzi zintu zitakkutyi?
Amuswiilile, amuswiilile,
kuti mulye zibotu mulakonzya kulibotezya kwiindila mukulya zilyo zibotu.
3 “Amuteye matwi, muboole kulindime,
amundiswiilile kutegwa myoyo yanu ipone.
Ndizoopanga cizuminano citamani andinywe,
kuti nditondezezye luzyalo lwangu lutamani ndundakasyomezya Devedi.
4 Amubone, ndakamucita kuti abe kamboni wangu kubantu boonse,
kuti abe musololi weendelezya bantu boonse.
5 Kasimpe uyooita misyobo njotazi,
ayalo misyobo eeyo iitakuzi iyooboola cakufwambaana kulinduwe,
akaambo ka Mwami Leza wako Uusalala wa Isilayeli,
nkaambo ulikupede bulemu.”
6 Amulangaule Mwami Leza nacijanika,
amumwiite nacili aafwiifwi.
7 Sizinyonyoono aasiye nzila zyakwe zibi
awalo muntu mubi asiye miyeeyo yakwe iilubide.
Apilukile ku Mwami Leza eelyo walo ulamweengelela,
amuboole kuli Leza wesu ulamulekelela ncobeni.
8 Nkaambo miyeeyo yangu tiili mbuli miyeeyo yanu pe,
azyalo nzila zyanu tazili mbuli nzila zyangu pe, Mwaamba Mwami Leza.
9 Mbubonya mbuli julu mbolili kule kuzwa anyika,
mbubonya oobo azyalo nzila zyangu zilikule kwiinda nzila zyanu, amiyeeyo yangu ilainda miyeeyo yanu.
10 Mbubonya mbuli mvula acaanda mboziwa kuzwa kujulu,
ambozitakonzyi kupilukila kulindilyo zilatilila nyika,
zilasyuusya akumeneka zisyango,
kutegwa zisyango zizyale mbuto eezyo ziyoobelesya sikusyanga
akuti muntu ajane zyakulya,
11 mbubonya aalo majwi aangu ngendaamba mbwaabede.
Taakooyooboola buyo mbuboobu kulindime,
pele aayoocita eeco ncendiyanda
ayoocicita eeco ncendikanzide
akuzwidilila muli ceeco ncindaatumina.
12 Muyoosiya munzi wa Babuloni cakutangala,
nkabela muyooenzegwa muluumuno,
zilundu atulundu ziyooyooma munyimbo kumbele lyanu,
masamu oonse aamusokwe ayookambilila.
13 Mubusena bwamamvwa kuyookomena mipulanga,
mubusena bwamasonso kuyookomena mikumbuzu.
Makani aaya ayoocita kuti Mwami Leza akadume,
ayooba citondezyo citamani kukabe kutamani.