Izaya 49
Isilayeli ngomumuni wabamasi
1 Amundiswiilile nywebo nobantu bakkala kulaale,
amundimvwe anywebo nobantu nomukkala kumasi aali kulaale.
Mwami Leza wakandiita nketanazyalwa,
nguwakanduulika zina nkecili mwida.
2 Wakacita majwi aangu kuti kaayasa,
mbuli panga likwengedwe.
Wakandisisa mucinziinzimwa cajanza lyakwe.
Wakandicita kuti ndibe mbuli muvwi uuŋaima,
akundisisa mumukutu wamivwi yakwe.
3 Wakandaambila kuti,
“Uli mubelesi wangu, Isilayeli mulinduwe bantu bayoondilumbaizya.”
4 Pele mebo ndakati, “Ndakabelekela cabuyo,
ndakasowa buyo nguzu zyangu kaatakwe ancondijana pe.
Nikuba boobo Mwami Leza ulandipa ceelelo cangu,
bulumbu bwangu buli kuli Leza wangu.”
5 Lino mboobu mbwaamba Mwami Leza ooyo wakandibumba mwida
kuti ndibe mubelesi wakwe kuti aboozye Jakobo kulinguwe,
akuti ayobolole Baisilayeli,
nkaambo Mwami Leza ulindipede bulemu.
Leza wangu nguundipa nguzu.
6 Ulati, “Mulimo ngondiyookupa yebo omubelesi wangu, mmupati,
tauli buyo wakuyoobukulusya balunyungu lwa Jakobo,
akuyooleta Baisilayeli aabo bakasyeede.
Pele uyooba mumuni wabamasi
kutegwa bantu boonse bakumagolelo aanyika bakafutulwe.”
7 Lino mboobu mbwaamba Mwami Leza,
Munununi Uusalala wa Isilayeli,
kuli yooyo ngubakali kusampaula akusulaika bamusyobo woonse,
mubelesi wabaleli ulati,
“Bami bazisi bayookubona eelyo bayoonyamuka mukukulemeka,
Baleli bayookubona akukukotamina akaambo ka Mwami Leza Uusyomeka,
Uusalala wa Isilayeli wakakusala.”
Munzi wa Jelusalemu mbuyoobukulusigwa
8 Lino mboobu mbwaamba Mwami Leza ulati,
“Caakusika ciindi cangu cakumufutula,
njoomufwida luzyalo, mubuzuba bwalufutuko, ndiyoomugwasya.
Ndiyoomubamba akupanga cizuminano kubantu boonse kwiindila mulindinywe,
kuti mukabukulusye nyika kutegwa muzookkale mumatongo aanu.
9 Ndiyooambila aabo bali mubwaange kuti,
‘Amuzwe muntolongo’ akuli baabo bali mumudima kuti,
‘Amwaangunuke.’ Eelyo bayooliiba
akulikkalila antangalala mbuli mbelele zicela mutulundu.
10 Tabakafwi noiba nyota,
nokuba kupya kwamunkanda noliba zuba tazikabaumpi.
Ooyo uubeetelela uyoobasolweda
akuyoobasisya kumbali aatusensa twamaanzi.
11 “Zilundu zyoonse ndiyoozipwayaula
kuti ikabe migwagwa yabantu bangu,
ndiyoobabambila nzila.
12 Amubone bayooboola kuzwa kulaale,
bamwi bayoozwa kunyika,
bamwi kumbo, bamwi bayoozwida kulubazu lwaku Sinimu.”
13 Kopozomoka cakutangala ojulu. Kosekelela onyika.
Nozilundu amuyoome munyimbo!
Nkaambo Mwami Leza ulaumbulizya bantu bakwe,
uyoobeetelela bantu bakwe bapenzegwa.
14 Pele bamu Ziyoni bakati,
“Mwami Leza watulekelezya Mwami watuluba.”
15 “Sena mukaintu ulakonzya kuluba mwanaakwe uunyonka,
akutamweetelela mwana ngwaakazyala?
Ambweni mukaintu ulakonzya kuluba,
pele mebo nsikamulubi pe.
16 Amubone ndakamusimba mumaanza aangu,
bwaanda bwamaanda aanu ndibubwene lyoonse.”
17 Aabo baboola kuzookuyakulula o Jelusalemu,
bali munzila, aabo bakakoola balazwa mulinduwe.
18 Langa ubone, bantu bako boonse babungana kuti baboole.
“Mbuli mbwendi muumi.” Mwaamba Mwami Leza,
“Uzoosakatila bantu bako, mbuli nabwiinga mbwalisakatizya.”
19 Nokuba kuti wakalikolomwedwe akuba tongo,
nyika yako yakalisampukide.
Lino bantu bako bayooata, aabo bakakunyonyweede banooli kulaale.
20 Bantu bako aabo bakazyalilwa mubwaange bazookwaambila kuti,
“Busena oobu bwatuceela amutupe busena bumbi.
21 Eelyo uyooti mumoyo wako, ‘Nguni wakandizyalila baaba?
Ndakafwidwa, nketazyali, ndakali mubwaange, nkendikatazidwe.
Ino nguni wakakomezya baaba? Mebo ndakali buyo endikke, ino aaba ono bazwida kuli?’”
22 Mboobu mbwaamba Mwami Leza,
“Amubone njooyobolola bamasi,
njooimikila bantu ndembela,
bayooleta bana bako balombe kababafukete
banooyoosumpwide bana bako basimbi amakuko,
23 Bami bayoomulela mbuli uso,
bami bakaintu bayooba mbuli banyoko.
Bayookukotamina, bayoomyankuta lusuko lwakumaulu aako mukuzundwa.
Ndendilyo noyooziba kuti ndendime Mwami Leza,
aabo bali alulangilo mulindime tabakatyompwi!”
24 Sena basilumamba balakonzya kunyangwa lubono ndubasaala
naa baange kuvunwa kuzwa kubakali?
25 Pele mboobu mbwaamba Mwami Leza,
“Iiyi, baange bayooboozegwa kuzwa kuli basilumamba,
lubono lusaalidwe luyooletwa kuzwa kubakali.
Ndiyoobalwana aabo bakulwana, ndiyoofutula bantu bako.
26 Ndiyoocita kuti aabo bamudyaminina bakalilye beni
bayookolwa bulowa bwabo mbuli nobakolwa waini.
Eelyo bantu boonse bayooziba kuti mebo nde Mwami Leza,
ndime Mufutuli wako, ndime Munununi wako,
ndime Sintanze wa Jakobo.”