Izaya 45
Mwami Leza mbwaakabikka Sailasi kuba mwami
1 Lino mboobu mbwaamba Mwami Leza kumunanike wakwe,
kuli Sailasi ooyo ngwajisilizi janza lyakwe lyalulyo
kuti amuzundile misyobo akuti atebezye nkute zyabami,
kuti amujalwide zitendele kutegwa milyango itajalwi.
2 Ulati, “Ndiyookusolweda nkabambasike zilundu.
Ndiyoopwaya milyango yamukuba, akutyoloola zipingizyo zyalubulo.
3 Ndiyookupa lubono luzwa mumasena aasiya aasisikidwe,
luzwa mumasena aasisikidwe kutegwa muzibe
kuti ndendime Mwami Leza wa Isilayeli ooyo uukwiita azina.
4 Lino akaambo kamubelesi wangu Jakobo, kamusale wangu Isilayeli,
ndakwiita kuti nkupe zina lyakukulemekezya nokuba kuti tondizi pe.
5 “Ndime Mwami Leza, taakwe uumbi pe, kunze lyangu taakwe leza uumbi.
Ndiyookuyumya-yumya nikuba kuti toondiziba pe,
6 kutegwa bantu boonse kuzwa kumapaswido kusikila nkolibbilila zuba
bakazibe kuti taakwe uumbi kunze lyangu.
Ndime Mwami Leza, taakwe uumbi pe.
7 Ndime uubamba mumuni akulenga mudima,
ndime eeleta kuzwidilila alimwi akuleta mapenzi.
Mebo nde Mwami Leza eecita zintu eezi zyoonse.”
8 Yebo ojulu kujulu,
leta balulami mbuli makumbi mbwaalosya mvula.
Nyika aijaluke, lufutuko aluboneke,
zibonwe antoomwe abululami.
Mebo nde Mwami Leza ndacita eezi.
Mwami Leza wakalenga zyoonse
9 “Maawe kuli yooyo uuzwangana a Mubumbi wakwe,
ooyo walo uuli mbuli lukaye ansi.
Sena bulongo inga bwati kumubumbi,
‘Ino ubumba nzi?’ Naa kwaamba kuti, ‘Tocizi?’
10 “Maawe kuli yooyo waambila wisi kuti, ‘Wakandizyalila nzi?’
Naa kwaambila banyina kuti, ‘Mwakantumbukila nzi!’”
11 Mboobu mbwaamba Mwami Leza,
Uusalala wa Isilayeli, Mubumbi wakwe ulati,
“Kwaamba zintu ziboola,
sena mulandibuzya azyabana bangu,
naa kundilailila azeezyo nzindakacita mebo?
12 Ndime ndakalenga nyika akulenga bantu aabo mbindakabikka alinjiyo.
Mebo lwangu ndime ndakalandabula julu,
ndime ndakalailila makamu-makamu aalyo.
13 Njooimika Sailasi mubululami bwangu,
njoocita nzila zyakwe kuti kaziluzi.
Uyooyakulula munzi wangu,
akwaangununa bantu mubwaange,
pele takaciti oobo nkaambo kakuyanda mbbasela naa bulumbu,
mbwaamba Mwami Leza Singuzuzyoonse.”
14 Mboobu mbwaamba Mwami Leza, “Lubono lwaku Ijipiti,
amakwebo aaku Kusyi, a Basaboya balamfu,
bayooboola kulindinywe, bayooba banu,
bayoomutobela, kabaangidwe nketani.
Bayoomukotamina akumukombelezya kuti,
‘Kasimpe Leza ulaandinywe,
taakwe uumbi, taakwe leza uumbi pe.’”
15 Kasimpe uli Leza uulisiside,
yebo O Leza, Mufutuli wa Isilayeli.
16 Boonse aabo balipangila mituni bayoousigwa nsoni,
akunyana, boonse bayoousigwa bweeme.
17 Pele Baisilayeli bayoofutulwa a Mwami Leza alufutuko lutamani,
tamukafwi nsoni nokuba kufwisigwa bweeme mane kukabe kutamani.
18 Lino mboobu mbwaamba Mwami Leza, wakalenga julu,
ooyo wakabumba nyika akwiipanga waiimika,
taakailengela kuti kiili mbuboobu buyo,
pele wakaibambila kuti bantu kabakkede mulinjiyo.
Leza ulati, “Ndime Mwami Leza, taakwe uumbi pe.
19 Ndaamba antangalala, kutali munyika yamudima.
Tiindakaambila balunyungu lwa Jakobo kuti,
‘Amundiyandaule aatuba bu!
Mebo nde Mwami Leza ndaamba zyamasimpe,
ndaamba eeco ciluzi.’”
Zya Mwami Leza wanyika azyamituni yaku Babuloni
20 Mwami Leza ulati, “Amulibunge-bunge muboole,
amuswaangane nywebo nomuciliwo kuzwa mumasi.
Bantu bafuba-fuba mbaabo bayumuna mituni yazisamu, bakomba baleza batakonzyi kufutula.
21 Amwaambe eeco citicitike, amulungulule.
Amubuzyanye makani mulicanu.
Ino nguni wakaambide makani aaya kale-kale?
Nguni wakaaluula kaindi-kaindi?
Sena nsili ndime nde Mwami Leza?
Taakwe Leza uumbi kunze lyangu,
Leza Uululeme, Mufutuli.
Taakwe uumbi, pele ndime endikke.”
22 Amupilukile kulindime mufutulwe,
nywebo nomuli mumagolelo aanyika oonse!
Nkaambo mebo ndendime Mwami Leza, taakwe uumbi pe.
23 Ndakonkezya muzina lyangu ndemwini,
ndakaamba amulomo wangu mubululami,
majwi aayo aatakabooli buyo pe.
“Mazwi oonse ayoondifugamina
milaka yoonse iyookonkezya muzina lyangu.
24 “Mu Mwami Leza alikke momuli bululami anguzu.
Boonse bakali kumulwana bayooboola kulinguwe, nkabela bayoousigwa nsoni.
25 Pele mu Mwami Leza boonse balunyungu lwa Isilayeli bayoolulamikwa,
nkaako bayoomulumbaizya.”