Izaya 44
Mwami Leza ngo Leza alikke
1 Mwami Leza ulati, “Lino swiilila yebo Jakobo,
omubelesi wangu, yebo Isilayeli ngwindakasala.
2 Mboobu mbwaamba Mwami Leza,
ooyo wakakulenga, ooyo wakakubumba mwida,
ooyo uuyookugwasya. Utayoowi pe yebo Jakobo omubelesi wangu, yebo Jesyuluni ngwindakasala.
3 Mebo ndiyootila maanzi acimpayuma,
ndiyoobikka milonga munyika njumu.
Ndiyootila Muuya wangu alunyungu lwako,
alimwi lunyungu lwako ndiyooluleleka.
4 Nkabela bayookomena mbuli bwizu mubuntoolo,
mbuli mikumbuzu mumbali aatulonga tukunka maanzi.
5 “Umwi uyooti, ‘Mebo ndiwa Mwami Leza,’
umwi uyooliita zina lya Jakobo,
nikuba boobo umwi uyoolilemba akuboko uyooti,
‘Ndiwa Mwami Leza,’ nkabela uyoolyuulika zina lya Isilayeli.”
6 Mboobu mbwaamba Mwami Leza,
Mwami Leza wa Isilayeli, munununi,
Mwami Leza Singuzuzyoonse ulati,
“Ndime mutaanzi alimwi ndime wamamanino,
kunze lyandime kunyina Leza uumbi.
7 Ino nguni uuli mbuli ndime? Ngooyo alyaambe?
Aambilizye alungulule kumbele lyangu,
aambe aceeco cakacitika,
kuzwa ciindi nindakabikka bantu bangu,
aambe aceeco ciyoocitika,
iiyi aambe eeco ciyooboola.
8 “Mutakankami, mutayoowi.
Sena tiindakacaambilizya akucilungulula kale-kale eeci?
Ndinywe bakamboni bangu.
Sena kuli leza uumbi kunze lyandime?
Peepe, kunyina mwaala uumbi, taakwe ngwezi pe.”
Bufuba-fuba bwakukomba mituni
9 Boonse aabo bapanga mituni mbabuyo, zintu eezyo nzyobayobola nzyabuyo. Aabo bayaambila mboofu, tabakwe maanu, baliletela buyo mause. 10 Ino cigwasya nzi kulumba leza akubeza mutuni uutaleteli mpindu? 11 Walo aceeco ncajisi bayoousigwa nsoni, babezi mbantu balyamaila, takwe ambobabede. Ababoole boonse bazooime, bazooyoowa alimwi bazoosampuka. 12 Mufuzi ulabweza cibelesyo cakwe, ulacibamba-bamba mumakala, ulafula mutuni ooyo ansando, ulaupetulula ajanza munguzu zyakwe. Wamana wafwa nzala akugonkelwa, kuti tanywi maanzi ulawizuka. 13 Mubezi uleeleka akatambo, akweenga-enga, ulaufwala-fwala akuupokoola muziga zyawo. Uluubeza kuti ulangike mbuli muntu mukubota kwawo kutegwa ukkale mukaanda. 14 Ulagonkaula milombe, zimwi ziindi ubweza mupulanga naa mubanga. Zimwi ziindi uluulekela kuti ukomene musokwe, naa ulasyanga, uukomezegwa amvula. 15 Muntu ulabelesya cipaanzi cimwi cacisamu kuti cibe lukuni, cipaanzi cimwi kuti abeze mutuni. Kulincico ulatyoloola tutabi twakukutuzya mulilo kuti ayote akujisya cakulaya, cimwi ulacibeza kuti ube mutuni wakwe akuukomba. 16 Amubone, cikuni nciconya ncaasikka mumulilo ncaajisya cakulya, wayoka nyama wakkuta. Amane wasasabala, wati, “Ee buya, ndakasaalilwa, wabota mulilo.” 17 Zikuni zyasyaala wabeza leza, waba mutuni wakwe, ulaukotamina akuukomba. Waukomba wati, “Ndifutula nduwe leza wangu.” 18 Taakwe ncobazi, tabamvwisyi, meso aabo alivumbidwe kutegwa batakonzyi kubona, mbaazili kooko kutegwa batakonzyi kumvwisya. 19 Taakwe auyeeya pe, taakwe auli aaluzibo nibuba busongo bwakwaamba kuti, “Cipaanzi cimwi ndacikutuzya mulilo, amakala aaco ndajika cakulya, ndayoka nyama ndalya. Sena ono kuzwa kuli ceeci casyaala mbambe cisesemyo? Sena ono ndikombe citanda cacisamu?” 20 Ncimwi buyo akulya twe, moyo wamufuba-fuba nguwamusowa, takonzyi akuziba nokuba kulibuzya kuti, “Sena cintu eeci ncejisi tacili cabuyo?”
Mwami Leza ngo Mulengi alimwi ngo Mufutuli
21 “Koyeeya zintu eezi o Jakobo, nduwe mubelesi wangu o Isilayeli.
Ndime ndakakubumba, uli mubelesi wangu,
yebo o Isilayeli, nsikoyookuluba pe.
22 Milandu yako ndiiyangulusya mbuli kkumbi,
azyalo zinyonyoono zyako ndazikunkumuna mbuli sikunku.
Pilukila kulindime nkaambo ndime ndakakunununa.”
23 Amwiimbe cakutangala nozyakujulu,
nkaambo Mwami Leza nguwakacicita eeci,
koongolola onyika kunsi.
Amwiimbe cakuyobeka nozilundu,
anywebo nozisaka amasaka oonse,
nkaambo Mwami Leza nguwanununa Jakobo
nguutondezya zyabulemu bwakwe mu Isilayeli.
24 Mboobu mbwaamba Mwami Leza,
Munununi wako, ooyo wakakubumba mwida,
ulati, “Ndime Mwami Leza, wakalenga zintu zyoonse,
mebo endikke ndime ndakalandabula julu,
mebo endikke ndime ndakalandabula nyika,
25 ndime eepilinganya zitondezyo zyabasinsimi babeji, akucita
kuti basondi bafubaale akunyanga baiide busongo, kuti bafubaale.
26 Ndime eecita kuti majwi aaamba babelesi bangu azwidilile,
ndime eezuzikizya zyaamba batumwa bangu,
aabo baamba kuti kumunzi wa Jelusalemu,
‘Uyookkalwa alimwi,’ nokuba kuminzi yacisi ca Juda,
‘Iyooyakululwa,’ naa kumatongo kuti, ‘Njooabukulusya.’
27 Ndime eeambila maanzi malamfu kuti,
‘Yuminina, alimwi ndayuminizya tulonga twako.’
28 Ndime eeamba Sailasi kuti,
‘Ngomweembezi wangu, uyoomanizya zyoonse nzyeyanda kuti acite,
uyooti kumunzi wa Jelusalemu,’ ‘Uuyakululwe.’
Kuŋanda ya Leza uyooti, ‘Ntalisyo zibikkwe.’”