Izaya 39
Batumwa bakazwa ku Babuloni
1 Ciindi eeco Melodakibaladani mwanaa Baladani mwami waku Babuloni wakatuma batumwa amagwalo acipo kuli Hezekiya, nkaambo wakamvwa kuti wakali kuciswa calufu. 2 Nkabela Hezekiya wakatambula batumwa aabo cakukondwa akubatondezya ziyobwedo zyansiliva, ngolida, tununkilizyo, amafuta akeengwa kabotu, aciyobwedo cazilwanyo coonse azimwi zyoonse zyakali muziyobwedo. Taakwe nociba comwe camuŋanda yakwe yabwami naa bulelo Hezekiya ncaatakabatondezya.
3 Mpoonya Izaya musinsimi wakasika kumwami Hezekiya akubuzya kuti, “Ino bantu aaba baamba nzi alimwi bazwida kuli?”
Lino Hezekiya wakaingula kuti, “Bazwa ku Babuloni, baboolela kuzoondibona.”
4 Musinsimi wakabuzya kuti, “Ino ncinzi ncibabona muŋanda yako?”
Hezekiya wakati, “Bazibona zintu zyoonse zili muŋanda yangu, taakwe cintu nociba comwe ncindatabatondezya muziyobwedo.”
5 Mpawo Izaya wakaambila Hezekiya kuti, “Swiilila mboobu mbwaamba Mwami Leza Singuzuzyoonse ulati, 6 ‘Bona, mazuba ayoosika zintu zyoonse basikale bako nzibakayobwede kusikila sunu ziyootolwa ku Babuloni. Taakwe ciyoosyaala, mbwaamba Mwami Leza. 7 Nkabela bamwi balunyungu lwako abamukowa wako bayootolwa, bayooba bazike muŋanda yamwami waku Babuloni.’” 8 Mpoonya Hezekiya wakaambila Izaya kuti, “Majwi aa Mwami Leza aayo ngooamba mmabotu.” Mukwaamba boobo Hezekiya wakali kuyeeya kuti, “Kunooli luumuno alukwabililo mubuumi bwangu.”