Izaya 38
Mwami Hezekiya mbwaakaciswa akupona
1 Lino ciindi eeco, mwami Hezekiya wakaciswa calufu. Eelyo Izaya musinsimi, mwana wa Amozi, wakasika kulinguwe wati, “Mboobu mbwaamba Mwami Leza, ‘Bamba kabotu zyoonse nkaambo ulafwa ncobeni, totipone pe.’”
2 Mpoonya Hezekiya wakafutatuka, walanzya kubwaanda, wakomba ku Mwami Leza wati, 3 “O Mwami Leza, koibaluka lino mbuli mbundakakutobela cakusyomeka akulipa kulinduwe cakumaninina, alimwi ambundakacita zikubotela.” Amane wakalila kapati.
4 Lino majwi aa Mwami Leza akasika kuli Izaya aakuti, 5 “Piluka alimwi waambile Hezekiya kuti, ‘Mboobu mbwaamba Mwami Leza wa Devedi sikale wako’ ulati, ‘Ndamvwa kukomba kwako alimwi ndabona misozi yabuumba bwako, ndilayungizizya buumi bwako kwamyaka iili kkumi aisanu.’ 6 Ndilakuvuna yebo amunzi ooyu kuzwa ku mwami waku Asiliya. Ndiluukwabilila munzi ooyu.
7 “Nceeci citondezyo cakuti Mwami Leza uyoocita mbwaasyomezya. 8 Ndacita kuti ndipilusye cimvule ntaamo zili kkumi nzicakaindide cipimyo ca Ahazi.” Nkaako mumuni wakapilukila musule ntaamo zili kkumi eezyo cipimyo nzicakaindide kale.
9 Lino mboobu Hezekiya mwami wa Juda mbwaakalemba naakapona akulimvwa kabotu.
10 Ndakati, “Ndali kuyeeya kuti ndafwa nkecilimvwide, ndanyangwa myaka yangu.”
11 Ndakati, “Nsiciyoomuboni limbi Mwami Leza munyika yabaumi,
nsiciyoobaboni limbi bantu, akukkala akati kabaabo bacili munyika eeyi.
12 Buumi bwangu bwakakosolwa, bwamana bwaba mbuli tente lyamwaigwa,
mbuli ntali yakosolwa kuzwa kucisamu cakulusya. Ndali kuyeeya kuti Leza uyanda kunditola.
13 Ndakalindila cakukkazika camba mane kusikila kubucedo, pele mbubonya mbuli
syuumbwa wakatyoloola mafuwa aangu. Sikati amasiku wandimaninizya.
14 Ndakalila mbuli kamembya naa tuleze, ndakalila mbuli nziba.
Meso aangu oomfoka kuululala kujulu ndapenga O Mwami, kondigwasya.”
15 Pele ino ono ndaambe nzi? Nguwandaambila,
alimwi lwakwe mwini nguwacita ceeci.
Ndinooenda cakulibombya munyika yangu yoonse,
akaambo kakupenga kwamoyo wangu.
16 O Mwami, zintu eezi nzeziponya bantu,
mulinzizyo momubede buumi bwamoyo wangu.
Wandiponya, ono mpaawa ndapona.
17 Kasimpe kupenga kwangu kwandiletela zibotu.
Muluyando wakandikwabilila
kuti ntawidi mudindi lyalunyonyooko,
zibi zyangu zyoonse wazisowela kusule lyako.
18 Uuli mucuumbwe takonzyi kukulumbaizya,
uufwide takonzyi kwiimba nyimbo zyakukutembaula,
aabo bazikkwa tabakonzyi kulangila zyakusyomeka kwako.
19 Baumi balikke mbabatembaula mbuli mbwendicita mebo sunu,
bamatata baambila bana babo zyakusyomeka kwako.
20 Mwami Leza nguundifutula,
nkaako tuyooimba azingwali-ngwali
muŋanda ya Mwami Leza mubuumi bwesu boonse.
21 Mpoonya Izaya wakati,
“Amubambe cibunge cankuyu mwamana mucibikke acuute, eelyo ulapona.”
22 Hezekiya wakabuzizye kuti,
“Ino kuyooba citondezyo nzi cakuti ndiyooinka kuŋanda ya Mwami Leza?”