Izaya 37

Mwami mbwaakakumbila kulaililwa a Izaya

¹ Lino mwami Hezekiya naakamvwa zyamakani aaya, wakazapaula zisani zyakwe, wasama masaka, amane wakanjila muŋanda ya Mwami Leza. ² Wakatuma Eliyakimu wakali mweendelezi waŋanda yabwami a Syebina mulembi abapaizi basilutwe kabasamide masaka, kuli Izaya musinsimi mwana wa Amozi. ³ Bakati kulinguwe, “Mboobu mbwaamba Hezekiya, ‘Sunu mbuzuba bwamapenzi mbutwasubulwa akuusigwa nsoni, twaba mbuli bakaintu bayanda kutumbuka, pele babula nguzu zyakutumbuka. ⁴ Mwami Leza wako ulimvwide majwi aawalupati-pati ooyu mwami waku Asiliya ngwaatuma kuzoosampaula Leza muumi. Mwami Leza asubule majwi aaya ngaalimvwida mwini. Akaka kombela bantu aaba bacisyeede.’”

⁵ Lino balupati-pati bakatumwa amwami Hezekiya nibakaakusika kuli Izaya, ⁶ Izaya wakabaambila kuti, “Amukaambile simalelo wanu kuti mboobu mbwaamba Mwami Leza, ‘Utayoowi akaambo kamajwi ngomvwa aayo balupati-pati bamwami waku Asiliya ngobandisampaula. ⁷ Swiilila uyoomvwa mavwambukila, akupilukila kucisi cakwe, ooko nkweyoocita kuti akajaigwe apanga.’”

Baasiliya mbubakapingila munzi wa Jelusalemu

⁸ Ciindi mulailili wabasikulwana amaulu naakamvwa kuti mwami waku Asiliya wakazwa ku Lakisyi wakapilukila akuyoojana kuti mwami ulwana munzi wa Libuna. ⁹ Lino Senakelibu wakatambula makani aakuti Tilihaka Mukusyi mwami wa Itiyopiya wakali kuza kuzoomulwana. Amvwe boobo wakatuma batumwa kuli Hezekiya amajwi aakuti, ¹⁰ “Amukaambile Hezekiya mwami wa Juda kuti, ‘Utacengwi aleza ooyo ngosyoma,’ naakwaambila kuti, ‘Jelusalemu tuukaabwi kumwami waku Asiliya.’ ¹¹ Yebo omwini wakalimvwida zyakacita bami baku Asiliya kumanyika oonse ngibakanyonyweeda limwi. Ani yebo inga wavunwa buti? ¹² Sena baleza bamisyobo eeyo basikale besu njibakanyonyoona bakakonzya kubavuna? Aaba mbaaleza ba Bagozani, Bahalani, Balezefu abaabo baku Edeni bakali mumunzi wa Teliasa. ¹³ Ino mwami waku Hamati awaku Aapadi kubikkilizya amwami wamunzi wa Sefavaimu naa Hena naaba Iva bali kuli?”

¹⁴ Lino Hezekiya wakatambula lugwalo lwakaleta batumwa akulubala. Mpawo wakainka kuŋanda ya Mwami Leza akuyooluvungununa kumbele lya Mwami Leza. ¹⁵ Amane Hezekiya wakakomba ku Mwami Leza. ¹⁶ Wakati, “O Mwami Leza Singuzuzyoonse, O Leza wa Isilayeli ookkede akati kabakelebu, yebo olikke ndonduwe Leza wamalelo aanyika oonse. Nduwe wakalenga julu anyika. ¹⁷ Ndiswiilila O Mwami Leza, ndimvwa. Langa O Mwami Leza ubone. Mvwa majwi Senakelibu ngaatuma kusampaula Leza muumi.

¹⁸ “Masimpe O Mwami Leza, bami Babaasiliya bakanyonyoona misyobo amanyika aayo. ¹⁹ Bakasowa baleza babo mumulilo akubanyonyoona, nkaambo tiibakali baleza ncobeni, zyakali buyo zisamu amabwe zyakabambwa amaanza aabantu balya maila. ²⁰ Lino O Mwami Leza wesu tuvune kuzwa kulinguwe, kutegwa malelo oonse aanyika azibe kuti nduwe Mwami Leza olikke.”

Mulumbe wa Izaya ngwaakatumina mwami Hezekiya

²¹ Mpoonya Izaya mwana wa Amozi wakatumya makani kuli Hezekiya aakuti, “Mboobu mbwaamba Mwami Leza wa Isilayeli ulati, ‘Mukuti wakomba amakani aa Senakelibu mwami waku Asiliya, ²² lino mboobu Mwami Leza mbwaamba kujatikizya azyanguwe,’ Munzi wa Ziyoni ulakunyansya, akukuwela Senakelibu, munzi wa Jelusalemu upukusa mutwe, notija. ²³ Nguni ngotukana akusampaula? Nguni ngovulamukila akututulwida meso cakulisumpula? Uusalala wa Isilayeli! ²⁴ Kwiindila mubatumwa bako wakasampaula Mwami Leza. Alimwi wakati, ‘Ankalaki zyangu zinji ndakatanta atala lyazilundu zya Lebanoni, ndakatema milombe milamfu, mikamba mibotu kwiindilila alimwi ndakaakwaanjila magonde aaco, aasinkide.’ ²⁵ Ndakasya mikalo akunywa maanzi mumanyika aabeni. Ndakayuminizya tulonga toonse twa Ijipiti mundakainda amaulu.” ²⁶ Mebo nde Leza ndati, “Sena tookamvwa eezi nzindakakanza kale-kale? Ndakaziyeeya mazuba aansiku. Lino ndazicita ncobeni mebo ndakazumizya kunyonyoona minzi iikwabililidwe, wakayoola yaba zilwi zyamabwe.” ²⁷ Bantu bakali kukkala kooko bakanyina nguzu bakali kuyoowa akunyongana. Bakaba mbuli tusamu tufwiinyana mbuli mweemvwe, bakali mbuli twizu tumena aciluli tuyumizigwa aluuwo lupya katutanasima. ²⁸ “Pele mebo ndizi zyanduwe zyoonse, ndizi mbokkala mboenda akuboola, ambondinyemena. ²⁹ Nkaambo kakuti wakanditapatila, alimwi mukuti ndamvwa kulisumpula kwako, nzookutambya alumingwa mumpemo, acibulo mukanwa. Njookupilusya munzila eeyo njiyonya njookaletezya.”

³⁰ Lino aawo Izaya wakaambila Hezekiya kuti nceeci ciyooba citondezyo kulinduwe, “Uno mwaka muyoolya makoko, pele wabili muyoolya ciyoolimenena kuzwa kulingawo. Mumwaka watatu muyoosyanga akutebula, mukasyange misaansa akulya micelo yayo. ³¹ Nkabela aabo basyeede bamusyobo wa Juda bayoolikkalila mbuli zisyango zisimpide miyanda akulizyalila micelo ³² nkaambo mu Jelusalemu kuyooboola basyeede. Kuzwa mucilundu ca Ziyoni kuyooboola nkamu yabacipona. Bunkutwe bwa Mwami Leza Singuzuzyoonse mbubuyoocita zeezi.

³³ “Wakaindilizya akuti nkaako mboobu mbwaamba Mwami Leza zyamakani aamwami waku Asiliya. Takoozoonjila mumunzi uno nikuba kufusa muvwi mulinguwo pe, nikuba kulibonya mulinguwo kajisi antobo, nikuba kulundika citantaala cavu alinguwo. ³⁴ Uyoopiluka anzila eeyo njiyonya njaakaletezya. Takoozoonjila mumunzi oomu pe, mbwaamba Mwami Leza. ³⁵ Nkaambo mebo lwangu ndizookwabilila munzi ooyu akuuvuna nkaambo kangu akamubelesi wangu Devedi.”

³⁶ Masiku ngoonya aayo mungelo wa Mwami Leza wakainka waakujaya bantu basika kuzyuulu zili mwaanda amakumi aali lusele abasanu, muzivuka zya Baasiliya, lino bantu nibakabuka cifumo-fumo, bakajana kuti kuli milwi-milwi yamitumba. ³⁷ Mpoonya Senakelibu mwami waku Asiliya wakazwa ooko wapilukila ku Nineva nkwaakaakukkala. ³⁸ Lino bumwi buzuba naakali kukomba muŋanda ya Leza wakwe Nisiloki, bana bakwe ba Adulameleki a Syaleza bakamujaya apanga, eelyo bakatijila kunyika ya Alalati. Nkabela Esahadoni mwanaakwe wakaba ngomwami mubusena bwakwe.