Izaya 28

Bwami bwakunyika mbubwakacenjezegwa

¹ Maawe kubwami bwabakolwi baku Efulemu! Maawe kubalemenede bawo balo babbuluka mbuli maluba-luba. Munzi uuli kutala lyakkuti lyambolezi lyamisaansa zyakupanzya waini uubakola. ² Amubone Mwami Leza wabona kale muntu umwi muyumu, singuzu. Uyooboola mbuli civulamabwe, mbuli guwo lityoloola, mbuli mulonga uuzwide cakufwasuka uukunkisya, uyoonyonyoona cisi cabo. ³ Kulisumpula kwabasololi bakolwi kuyoolyataulwa kunsi aamaulu. ⁴ Bulemu bwabo bwabbuluka mbuli maluba-luba, munzi uuli kutala lyakkuti lyambolezi, uyoomana mbuli nkuyu ntaanzi kubizwa, bantu balazicela akuzilya mbuzyabizilwa buyo. ⁵ Mubuzuba oobo Mwami Leza Singuzuzyoonse uuyooba mbuli musini wabulemu, maluba-luba aaebeka kubantu bakwe basyeede. ⁶ Uyoobapa babetesi maanu aakubeteka buluzi akupa camba kuli baabo balindilila milyango yamunzi.

Izaya abasinsimi bakolwi bamu Juda

⁷ Alimwi abalo aaba baladadalika akaambo kawaini akuzeeleka akaambo kabukoko. Bapaizi abasinsimi baladadalika akaambo kabukoko, waini wabanzinzilisya, balazeeleka akaambo kabukoko, basinsimi tabamvwisyi zilengaano akaambo kakukolwa, tabakosoli bweelede twaambo ntobaletelwa. ⁸ Matebule ngobabelesya oonse abijide malusi, taakwe aatalibonyi kubija ooku pe. ⁹ “Ino usoleka kwiisya bani? Ino mbaani mbalungulwida makani? Sena twaba balesi aabo bakaleka onoono kunyonka? ¹⁰ Usoleka kutwiisya asyoonto-syoonto, ijwi ajwi, muzila amuzila, ciiyo aciiyo. Moonse oomu ulati, ‘Aawa awaawa.’” ¹¹ Kuti naa tamundiswiilili, ncobeni Leza uyoobelesya bazwamasi baambaula musyobo uumbi-umbi kuti bazoomwiisye. ¹² Mbambabo mbaakaambila kuti, “Oobu mbusena bwakulyookezezya, aabo bakatede abalyookezye, mboobu busena bwakulyookezezya, pele balo tiibakaswiilila.” ¹³ Nkaako majwi aa Mwami Leza ayooba aakuti, “Asyoonto-syoonto, ijwi ajwi, muzila amuzila, Ciiyo aciiyo. Moonse oomu ulati aawa, awaawa, kutegwa bakawe busaleme, bakacisigwe akujatwa.”

Ibbwe lyacooko lya Ziyoni

¹⁴ Lino amuswiilile nywebo nobantu basikantu-kantu, nomulela bantu omuno mu Jelusalemu. ¹⁵ Mulalisumpula mulati, “Twakapangana cizuminano alufu, tatuyoowi cuumbwe. Mapenzi aakuboola taakoozootuguma, mukuti kubeja caba citijilo cesu, bubeji bwaba ciyubilo cesu.” ¹⁶ Lino mboobu mbwaamba Mwami Leza, “Amubone ndabikka mu Ziyoni bbwe jumu, bbwe lyacooko bbotu kuti libe lyantalisyo njumu, ooyo uusyoma takatyompwi. ¹⁷ Buluzi buyooba nentambo yakupimya, bululami buyooba nceceelesyo. Maanzi acivulamabwe ayookukula matijilo aanu, nkokuti kubeja kwanu, maanzi avumpa mayubilo aanu. ¹⁸ Cipangano canu alufu eeci ciyooba cabuyo, cizuminano canu acuumbwe tacikamugwasyi. Mapenzi aakuboola ayoomusikila anywebo. ¹⁹ Kufumbwa mapenzi anooboola anoomukukulizya, cifumo-fumo, sikati asikati, masiku amasiku anoomukukulizya. Mwaakumvwa makani aaya muyooyoowa.” ²⁰ Bulo mbufwiifwi cakuti tamukonzyi kulyoolweda mpawo, ayalo ngubo ninsyoonto cakuti tamukonzyi kulivungaila. ²¹ Mwami Leza uyoonyamuka mbuli mbwaakacita acilundu ca Pelazimu, uyoonyamuka mbuli mbwaakacita kukkuti lya Gibiyoni, kuti acite mulimo wakwe, mulimo uutanabwenwe, mulimo mupya, mulimo uumbi-umbi. ²² Lino amuleke kusampaula kwanu, mwatacita boobo mulaangwa anketani ndemu, Mwami, Mwami Leza Singuzuzyoonse wandaambila zyakunyonyoonwa kwanyika yoonse.

Busongo bwa Leza

²³ Amuswiilile mumvwe jwi lyangu, amuteye matwi mumvwe nzendaamba. ²⁴ Ciindi mulimi nalima kuti alibambilile kusyanga sena inga wiide kulima ciindi coonse? Sena inga wiide kupandaula akupwasyaula makomwe? ²⁵ Namana kupwayaula makomwe, sena tasyangi mbuto yamabele akuminza mbuto yabwengo? Sena tasyangi maila mwaaelede, bulotwe mumuunda wabo, amaila muceme mumuunda wawo? ²⁶ Leza wakwe ulamulailila, ulamwiisya nzila mbotu. ²⁷ Mabele taapolwa cilayi, nociba cikwiliba kupola kumini, mabele apolwa aacisako, kumini upolwa aakasako. ²⁸ Kuti koyanda kupanga cinkwa weelede kuziya maila, caamba kuti topoli maila mane kusikila apandauke. Nikuba kuti wainzya cikwiliba amaila aayo, mabbiza aakwela cikwiliba taakaapandauli pe. ²⁹ Zyoonse eezi zizwa ku Mwami Leza Singuzuzyoonse, uugambya mukulailila kwakwe, ulagambya mubusongo bwakwe.