Izaya 27

Muunda wamisaansa wa Mwami Leza

¹ Mubuzuba oobo, Mwami Leza uyoosubula apanga lyakwe, uyoobelesya panga pati jumu mubukali bwakwe, kuti ajaye citowe, nzoka iitija, citowe nzoka iilizingaila, uyoojaya cimpangaliko camumaanzi. ² Mubuzuba oobo mukaimbe nyimbo zyamuunda wamusaansa wakazyalisya, ³ mebo nde Mwami Leza nduulanga nduutilila lyoonse. Nduucingilila sikati amasiku kutegwa kubule muntu uuunyonganya. ⁴ Nsinyemede. Nicabota nikwali kuti kuli masonso naa mamvwa aandisinkilide, nindaagonkoola akwaatenta oonse. ⁵ Kwataba boobo aaboole kulindime azookwabililwe, iiyi, aaboole kulindime tuyanzane. ⁶ Mumazuba aaboola Jakobo uyoosimpa miyanda, Isilayeli uyoosyuuka akulangazya, nyika yoonse iyoozula micelo. ⁷ Sena Mwami Leza wakasubula Baisilayeli mbuli mbwaakasubula basinkondonyina? Sena Baisilayeli bajaigwa mbuli bwakajaigwa basinkondonyina? ⁸ Mwami Leza wakasubula bantu bakwe kwiindila mukubalekela mubwaange. Wakabalekela kuti batolwe aguwo kkali lizwida kujwe. ⁹ Zibi zya Baisilayeli ziyoolekelelwa buyo kuti naa bapwayaula zipaililo zyamabwe zya Asyela mane zyaba mbuli mulambo, akuti mituni yaleza mukaintu Asyela noziba zipaililo zyatununkilizyo zyoonse bazimwaya. ¹⁰ Munzi uukwabilidwe waba tongo, ooko kucelela boombe, nkobabutila, balanumpula matu mitabi iisyaala buyo mbuboobu. ¹¹ Tutabi-tabi twayuma, tulatyolwa, bamakaintu ntobakutuzya mulilo. Nkaambo mmbantu batamvwisyi zintu, nkaako wakababumba takabeengeleli pe, mulengi wabo takabafwidi luzyalo.

¹² Mubuzuba oobo Mwami Leza uyooboozya bantu bakwe kutalikila kumulonga wa Yufuletisi kuyoosika kukalonga ka Ijipiti. Uyoobabunganya omwe-omwe.

¹³ Mubuzuba oobo mweembo mupati uyoolila. Aabo bakatimane mu Asiliya abaabo bakali mubwaange mu Ijipiti bayooboola akuzookomba Mwami Leza acilundu cisalala eeci ca Jelusalemu.