Izaya 25
Lwiimbo lwakutembaula
1 O Mwami Leza, nduwe wangu,
ndakulumbaizya akutembaula zina lyako,
nkaambo kwiindila mukusyomeka wakacita zintu zigambya
zintu eezyo nzyookakanza kale-kale.
2 Wakacita kuti munzi ube zilwi buyo,
munzi wankwakwa ube tongo,
matijilo aabamasi aba munzi uumwaidwe,
tuukayakululwi alimwi pe.
3 Nkaako misyobo yanguzu iyookulemeka,
minzi yamisyobo iiteengeleli iyookulemekezya.
4 Nduwe nkubalikutijila bacete,
wali citijilo cababula mumapenzi aabo,
nduwe cilawo cakuyubila nolibbubbula, nduwe ciyusilo nokupya.
Nkaambo kufweta kwabateeteleli kuli mbuli guwo nolibbubbwida abwaanda,
5 ambuli kupya kwamunkanda. Waumuzya kupyopyongana kwabamasi,
mbuli kupya mbokutontozegwa ciindi nolivumba,
mbubonya oobo lwiimbo lwabateeteleli lwaumuzigwa.
Leza wabamba pobwe
6 Acilundu eeci Mwami Leza Singuzuzyoonse, uyoopangila bantu boonse pobwe lyazilyo zinono, linooli pobwe lyawaini uulweela, nyama mbotu awaini mubotu kwiinda. 7 Acilundu eeci uyoonyonyoona ceeco civumbilide bantu boonse, sani eelyo livumbilide misyobo yoonse. 8 Uyoomanya lufu kwalyoonse alyoonse. Mwami Leza uyoosansamuna misozi munyika yoonse, uyoogwisya mapenzi abantu bakwe, munyika yoonse mbwiibede Mwami Leza nguwaamba.
9 Mubuzuba oobo bayooti, “Kasimpe ooyu ngo Leza wesu, twakamusyoma nguwakatufutula. Ooyu ngo Mwami Leza ngotwakasyoma, atutangale tukondwe mulufutuko ndwapa.”
Sikuyoobasubula ba cisi ca Mowabu
10 Leza uyookwabilila cilundu eeci, pele bacisi ca Mowabu bayoolyataulwa mbuli bulyataukwa bufumba. 11 Bayootandabika maanza aabo mbuli bantu badubbuka. Leza uyoolesya kantu-kantu kabo nikuba kuti kabacibwene kuyamba. 12 Uyoomwaya zikwabilizyo zyabo zilamfu akuzibambasika, uyooziwisizya ansi, mulusuko.