Izaya 24

Mwami Leza uyoosubula nyika

¹ Amubone, Mwami Leza uyoonyonyoona nyika, uyooitataula, uyooimwayaula, akumwaisya bantu bakkala mulinjiyo. ² Ciyoobasikila boonse ncimwi, ciyoocitika kumupaizi akubantu mbubonya, kuli simalelo akumuzike, kuli mukasimalelo akumusimbi mubelesi, kuli uuuzya akuli sikuula, kuli sikukweleta akuli sikukweletesya, kuli simpindu akuli sicikoloto. ³ Nyika iyoonyonyoonenwa limwi, akusaalilwa limwi. Mwami Leza nguwaamba majwi aaya. ⁴ Insi yayuma yaangana, nyika yoonse iluuside yaangana bulemu bwanyika bwapusama. ⁵ Nyika yasofwaazigwa abantu bayo tabaswiilili milawo basotoka mbeta akutyola cizuminano citamani. ⁶ Nkaako nyika yamana akaambo kakusinganyizigwa, bantu bamumo bapenga akaambo kamulandu wabo. Bantu bakkala munyika bamana, mbace buyo basyeede. ⁷ Misaansa yayuma nkaako takucikwe waini, boonse bayandisya kulikkomanisya ono balasyolooka. ⁸ Kulila kwansakalala takucimvwigwi, kuyoba kwakusekelela kwamana, kulila kwakalumbu kwamana. ⁹ Nyimbo nzyobaimba nobanywa waini zyamana, bukoko bwabapapila. ¹⁰ Munzi walupyopyongano waba tongo, milyango yamaanda ilipingidwe. ¹¹ Mumigwagwa boompolweda waini. Lutangalo lwamana kuyobeka koonse kwazimaana ansi. ¹² Munzi waba tongo, milyango yawo yapwaigwa. ¹³ Eeci nceciyoocitika anyika amumasi oonse aanyika. Ciyooba mbuli ciindi muoliva nuutikaanyizigwa naa mbuli buvululwa nsaansa bantu nibamana kale kutebula. ¹⁴ Balapozomoka, balaimbisya cakukondwa kuzwa kumbo batembaula bulemu bwa Mwami Leza. ¹⁵ Nkaako nywebo nobakujwe amulemeke Mwami Leza, Leza wa Isilayeli. Amumulemeke nywebo nomuli munsumbu zyalwizi. ¹⁶ Kuzwa kumagolelo aanyika tumvwide nyimbo yakuti, “Alemekwe ooyo Uululeme.” Pele mebo ndakati, “Ndamana, ndamana, maawe kulindime! Silweeno ulaamba, mulweeno silweeno ulaamba!” ¹⁷ Ziyoosya, mulindi akakole zilamulindilila nywebo nobantu bamunyika. ¹⁸ Kufumbwa ooyo uutikatije ziyoosya, uyoowida mumulindi, kufumbwa uutikazwe mumulindi, uyoowida mukakole. Mpulungwido zyakujulu zilijulidwe, ntalisyo zyanyika zilazungaana. ¹⁹ Nyika yaandauka, nyika yapanduka, nyika yazungaanyizigwa. ²⁰ Nyika izeeleka mbuli mukolwi, itenkaana mbuli kaanda libbubbula guwo, yalemenwa milandu yabuzangi bwabo nkabela yawa, tiikaimi limbi pe. ²¹ Mubuzuba oobo Mwami Leza uyoosubula basinguzu bakujulu mujulu abami ansi kunsi. ²² Bayoosolwedelwa antoomwe, mbuli baange bali mumulindi, bayoobikkwa muntolongo bayoosubulwa kwaakwiinda mazuba manji. ²³ Mwezi uyoonyonganyizigwa, zuba liyoousigwa nsoni, nkaambo Mwami Leza Singuzuzyoonse nguuyoolela acilundu ca Ziyoni mu Jelusalemu. Uyoolela cabulemu kumbele lyabapati bawo.