Izaya 23

Makani aaamba zya Taya

¹ Ngaaya makani aaamba zyamunzi wa Taya. Amulilile nywebo nobasimato aaku Taasyisyi! Nkaambo Taya yanyonyoonwa, kucinyina ŋanda nociba cito casyaala. Mwamvwa makani aazwida kunyika ya Saipulasi lyapiluka mato aanu. ² Amuumune nywebo nobasambazi baku Sidoni mwakatuma bantu, kuunka mutala lyalwizi, ³ kuti bakaule akuuzya maila aazwa kucisi ca Syihoo, butebuzi bwamulonga wa Nailo mbubwakamuvubya nimwakasambalana makwebo amisyobo yoonse. ⁴ Kofwa nsoni omunzi wa Sidoni! Ayebo ocikwabilizyo calwizi, nkaambo lwizi lulati, “Nsinamyongedwe nikuba kuzyala, nsinalelede bana basankwa nikuba kukomezya basimbi pe.” ⁵ Baijipiti bayoogambwa akuusa nobatikamvwe kuti munzi wa Taya wakanyonyoonwa. ⁶ Amukoswede ku Taasyisyi, amulile nywebo nobantu bamunsumbu. ⁷ Mwati ooyu ngomunzi waciindi-aciindi ooyo wakali kutuma bantu bawo mutala lyalwizi kuti ukatole masi aamwi? ⁸ Ino nguni ooyo wakakanza kucita zintu zili boobu kumunzi wa Taya, munzi wakali wabami, munzi wakajisi basambazi bana babami, uuli aabasimakwebo badumide munyika? ⁹ Mwami Leza Singuzuzyoonse nguwakakanza ceeci! Wakakanza oobu kutegwa amanizye kulikankaizya kwabo akaambo kazeezyo nzebakacita, akubanyanga bulemu baalumi aabo badumide munyika. ¹⁰ Kolima myuunda, yebo omwana musimbi waku Taasyisyi, mbuli mulonga wa Nailo mbuufwasuka taakwe cikasya pe. ¹¹ Mwami Leza watandabika janza lyakwe atala aalwizi, wacita kuti malelo aawo akankame. Walailila kuti zikwabilizyo zyaku Kenani zinyonyoonwe. ¹² Omunzi wa Sidoni, kubotelwa kwako lino kwamana. Bantu bako badyamininwa. Nikuba kuti naa batijile ku Saipulasi, tabakooyoolikkalila pe. ¹³ Amulange kunyika ya Bababuloni, bantu tabaciboneki limbi! Baasiliya bakacita kuti ibe nkanda yabanyama bamusokwe. Bakanungilila maanda aabo malamfu akwiisinkilizya, bakapwayaula zikwabilizyo zyayo, sunu lyakaba tongo. ¹⁴ Amulile nywebo nomweenzya mato aaku Taasyisyi zikwabilizyo zyanu zyanyonyoonwa. ¹⁵ Kuciindi eeco munzi wa Taya uyoolubwa kwamyaka iili makumi aali ciloba, eeyi njemyaka yakupona kwamwami. Pele yaakumana myaka iili makumi aali ciloba, ciyoocitika kumunzi wa Taya ciyooba mbuli bwaamba lwiimbo lwa mukaintu mwaamu nati, ¹⁶ “Bweza kalumbu, endeenda mumunzi, yebo omukaintu mwaamu wakalubwa, kalizye kabotu kalumbu, imba nyimbo zinji, kutegwa uyeeyegwe.”

¹⁷ Myaka iili makumi aali ciloba yaakumana, Mwami Leza uyoosubula Taya. Uyoopilukila kuli yooyo wakamubwezede, unooya buvuula amalelo oonse aali aanyika. ¹⁸ Nikuba boobo mpindu eeyo njaanooya bujana uzooipa ku Mwami Leza, takiiyoboli nikuba kwiibamba. Mpindu eeyo iyoopegwa baabo bakomba Mwami Leza, kuti bajane zyakulya zinji amasani mabotu.