Izaya 22

Makani aaamba zyamunzi wa Jelusalemu

¹ Ngaaya makani aaamba zya kkuti lya cilengaano, ino ono ncinzi camupenzya cakuti nyoonse mwatalika kutanta atala aanduli. ² Yebo omunzi oozwide manyongwe, yebo omunzi wamazwanga akupampana? Aabo bakajaigwa tiibafwida munkondo pe. ³ Basololi bako boonse batijila antoomwe, bajatwa kakunyina kulivuna. Boonse aabo bakajatwa bakatolwa mubwaange, mukuti bakatija basinkondonyina kulaale. ⁴ Nkaako ndakati, “Amundileke, ndilile kapati, mutanduumbulizyi, akaambo kakunyonyoonwa kwabantu bokwesu.” ⁵ Mwami, Mwami Leza Singuzuzyoonse, uyooleta buzuba bwamanyongwe bwakulyataukwa, akuyoowa mukkuti lyacilengaano, buzuba bwakupwayaula bwaanda bwamunzi, akulila muzilundu. ⁶ Baelamu babweza mikutu, basinkalaki amabbiza. Bakii bagwisya ntobo mucikutu cayo. ⁷ Makkuti ngoyandisya azwide nkalaki zyalo, basimabbiza balalindilila mumilyango yamunzi, ⁸ zikwabilizyo zyamu Juda zyakawida ansi. Mubuzuba oobu wakalanga kuzisaka kuyobwedwe zilwanyo zyaŋanda yabwami, ⁹ eelyo wakabona kuti bwaanda bwamunzi wa Devedi bwakali azibbanga-zibbanga, mpawo wakasinkula maanzi kuziba lyakunsi. ¹⁰ Wakabala maanda aamu Jelusalemu, amane wakaamwaya kuti asinke-sinke bwaanda. ¹¹ Wakayaka ciziba akati kamalambo obilo abwaanda kuti kacijata maanzi aazwa kuziba lyakale-kale, pele tiimwacebukila kuli yooyo wakalipanga, nikuba kumulemeka ooyo wakapa muzeezo wambolyeelede kuba. ¹² Mwami, Mwami Leza Singuzuzyoonse, wakamwiita buzuba buya kuti mulile, mweeme mulijwe masusu, musame masaka. ¹³ Pele ono bona, kuli kusekelela akukondwa kujaya ŋombe ambelele, mwiide kulya nyama akunywa waini, mulati, “Atulye, tunywe nkaambo junza tulafwa.” ¹⁴ Mwami Leza Singuzuzyoonse wakandiyubunwida makani aaya aakuti, cinyonyoono canu eeci tacikoolekelelwa pe. “Mane kusikila mukafwe.” Mbwaamba Mwami Leza Singuzuzyoonse.

Mbwaakacenjezegwa Syebina

¹⁵ Mboobu mbwaamba Mwami Leza Singuzuzyoonse ulati, “Koya kuli yooyo mubanzi wamali, kuli Syebina mupati waŋanda yabwami. ¹⁶ Ino ucita nzi kuno alimwi nguni wakuzumizya kuti uliside cuumbwe kuno? Nguni wakakuzumizya kuti ulikolwede cuumbwe mundomba, akukwezulula moyoolala mumwaala?

¹⁷ “Kocenjela, Mwami Leza uyanda kuti akujate akusowele kulaale, yebo omuntu sintanze. ¹⁸ Uyookuvunga mane ukabe mbuli kabbudu akukusowela munyika mpati. Ooko uyoofwa, nkabela ankalaki zyako nkoziyoosyaala, yebo oosesemya kuli simalelo wako! ¹⁹ Ndakutanda amulimo wako, ndakwaatula aabusena bwako.”

²⁰ Mubuzuba oobo ndiyooita mubelesi wangu Elikimu mwanaa Hilikiya. ²¹ Ndiyoomusamika jansi lyako akumwaanga lutambo lwako mucibuno akumupa bweendelezi bwako. Nguunooyoolela baabo bakkala mu Jelusalemu balunyungu lwa Juda. ²² Ndiyoomupa makkii aaŋanda ya Devedi, eeco ncatikajalule taakwe uuyoocijala, eeco ncatikajale taakwe uuyoocijula. ²³ Ndiyoomukkazikizya kuti akajate mbuli nembe mubusena bwakwe nkabela uyooletela mukwasyi wakwe bulemu. ²⁴ Bulemu bwamukwasyi wakwe boonse bunooli alinguwe, kubikkilizya abwanzubo zyakwe. Boonse banooyeeme alinguwe mbuli mitiba miniini mbwiibikkwa akasanza.

²⁵ “Mubuzuba oobo,” mbwaamba Mwami Leza Singuzuzyoonse, “Nkanka iikankamidwe kapati iyoozungaana, iyoozyulwa akuwa ansi, eezyo zibiya zibikkidwe alinjiyo ziyoowa,” Mwami Leza nguwaamba.