Izaya 20

Musinsimi wacintanda

¹ Mumwaka umwi mwami Saagoni wacisi ca Asiliya, wakatuma mupati waba silumamba kuti azoolwane munzi wa Asyidodi, nkabela wakaboola wazooulwana akuuzunda. ² Myaka yotatwe yakaindide Mwami Leza wakaambilide Izaya mwana wa Amozi kuti, “Samununa zisani zyamasaka nzyosamide andyasyo kumaulu aako.” Nkaako wakacita oobo, wakainka kaya bweenda acintanda katasamide andyasyo.

³ Ciindi munzi wa Asyidodi niwakazundwa, Mwami Leza wakati, “Mbubonya mbuli mubelesi wangu Izaya mbwaali kweenda cintanda kanyina andyasyo kwamyaka yotatwe, kuti cibe citondezyo cazintu ziyoocitika kucisi ca Ijipiti aca Kusyi, ⁴ mwami waku Asiliya uyootola Baijipiti a Bakusyi mubwaange kabali cintanda kabanyina andyasyo. Uyooenzya baniini abapati matako kaalibonya, kuti Baijipiti bakafwe nsoni. ⁵ Aabo bakali kusyoma cisi ca Kusyi akulikankaizizya cisi ca Ijipiti bayooyoowa akuusigwa nsoni. ⁶ Mubuzuba oobo bantu bakkala mumbali lyankomwe yalwizi bayooti, ‘Amubone cacitika kuli baaba mbutwasyomede, aabo nkutwali kutijila kuti batuvune kuzwa kumwami wacisi ca Asiliya! Ino ono swebo tulatija buti?’”