Izaya 19

Leza uyoosubula cisi ca Ijipiti

¹ Ngaaya makani aaamba zyacisi ca Ijipiti. Bona Mwami Leza nguulya ulaboola ku Ijipiti utantide akkumbi lyeenda cakufwambaana. Mituni ya Baijipiti ilazyangama kumbele lyakwe abalo Baijipiti lyabaleka kapati. ² Njoocita kuti, “Muijipiti akabukile Muijipitinyina. Munyina akabukile mwanookwabo, simunzi asimunzinyina, munzi amunzinyina, bwami abwaminyina. ³ Baijipiti bayootyompwa, ndiyoocita makanze aabo kuti akabe aabuyo, bayoobuzya mituni mizimo yabo, basondi, abamukabami. ⁴ Njooaba Baijipiti kumuntu silunya, mwami mukali nguuyoobalela, mbwaamba Mwami Leza Singuzuzyoonse.” ⁵ Milonga iiyooyuminina, musena uyooyuma akuyumina limwi. ⁶ Tunkolola tuyoonunka, milonga yamu Ijipiti iyooyuminina, mabu amanyanja ayoopusama, ⁷ atusyango toonse tuli munsi aamulonga wa Nailo ooko nkuutilila. Myuunda yoonse iisyangidwe mumbali aamulonga wa Nailo iiyooyuma. Iyookukulwa aguwo, cakumaninina. ⁸ Bazubi banswi bayoosyolooka akulilauka, boonse baloba mumulonga wa Nailo, bateya tunyandi banoocinyina mulimo. ⁹ Aabo babelesya butonje bayootyompwa, baluka masani aandeketela bayoobula lulangilo. ¹⁰ Aabo baluka zisani bayoobijilwa, aabo babelekela mali bayoopenga mumyoyo. ¹¹ Bapati bamunzi wa Zowani mbafuba-fuba, balailili basongo ba Falo bamwaambila zitabujuli. Ino Falo inga wamwaambila buti kuti, “Ndime umwi wabaalumi basongo, ndakaiisigwa abamami bakale-kale?” ¹² Ino ono Falo bali kuli bantu bako basongo? Abakwaambile, bakuzibye eeco Mwami Leza Singuzuzyoonse ncakanzide kucita kucisi ca Ijipiti. ¹³ Bapati bamunzi wa Zowani mbafuba-fuba, basololi bamunzi wa Memfisi bacengwa, basilutwe bawo basowa cisi ca Ijipiti. ¹⁴ Mwami Leza wabalekela kuti kabaungilika, bacita cisi ca Ijipiti kuti kacilubizya, mbuli mukolwi mbwaziilika amalusi aakwe. ¹⁵ Taakwe naba omwe mu Ijipiti, muvubi naa mucete uulemenede naba muntu buyo uukonzya kugwasya cisi ca Ijipiti.

Baijipiti bayookomba Mwami Leza

¹⁶ Mubuzuba oobo Baijipiti bayooba mbuli bakaintu bayookankama mukuyoowa janza lya Mwami Leza Singuzuzyoonse eelyo libavuumukilide. ¹⁷ Nyika ya Juda inooyoosya Baijipiti, kufumbwa uuyoomvwa zyacisi ca Juda uyooyoowa, akaambo kazeezyo Mwami Leza Singuzuzyoonse nzyakanzide kubacita.

¹⁸ Mubuzuba oobo baminzi yosanwe yamu Ijipiti bayoocaamba Cihibulu, bayookonkezya muzina lya Mwami Leza Singuzuzyoonse. Umwi waminzi eeyo uyooitwa kuti, “Munzi wa Zuba.”

¹⁹ Mubuzuba oobo kuyooba cipaililo ca Mwami Leza mukati kacisi ca Ijipiti, kuyoobikkwa kabwe kaciibalusyo ca Mwami Leza kumunyinza waco. ²⁰ Kayooba citondezyo cakuzibya kuti Mwami Leza Singuzuzyoonse mwali mucisi ca Ijipiti. Baakulilila Mwami Leza akaambo kabaabo babadyaminina uyoobatumina mufutuli, muvuni, nkabela uyoobafutula. ²¹ Mwami Leza uyoolizibya lwakwe mwini ku Baijipiti, nkabela abalo mubuzuba oobo bayoomuziba Mwami Leza. Bayoomukomba mukumupa zipaizyo azituuzyo zyamaila, bayookonkezya ku Mwami Leza akuyoocita mbuli mbubakonkezya. ²² Mwami Leza uyoosubula Baijipiti acuumo, uyoobauma amana uyoobaponya. Bayoopilukila ku Mwami Leza, nkabela uyooswiilila kukomba kwabo, eelyo uyoobaponya.

²³ Mubuzuba oobo kuyooba mugwagwa mupati uuzwida ku Ijipiti kuyoosika ku Asiliya. Baasiliya banooyooboola ku Ijipiti abalo Baijipiti banooyooinka ku Asiliya. Baijipiti bayookomba antoomwe a Baasiliya.

²⁴ Mubuzuba oobo Baisilayeli bayookomba kabali zisi zyotatwe a Baijipiti a Baasiliya, lino eeci ciyooba cileleko kunyika yoonse. ²⁵ Mwami Leza Singuzuzyoonse uyoobaleleka, uyooti, “Bantu bangu Baijipiti, Baasiliya mbindakalenga, a Baisilayeli lukono balelekwe.”