Izaya 18
Leza uyoosubula cisi ca Kusyi
1 Maawe kunyika iisokonya mababa acikwikwi kutobelezya milonga ya Kusyi, 2 eeco citumya batumwa mulwizi, mumato amabu. Kamuya nobatumwa bafwambaana, kubantu balamfu bamibili miteteete, bantu bayoowegwa kufwiifwi akulaale, musyobo mulwani. Kubantu baamba mulaka uutamvwigwi, balaanyika iiandaanyizidwe amilonga. 3 Nywebo nyoonse nobantu bamunyika, nywebo nomukkede anyika, ndembela yaakwiimikwa azilundu, muyooibona, mweembo waakulila muyooumvwa. 4 Mboobu mbwandaambila Mwami Leza, “Ndinooumwide buyo pele nkelangilide kuzwa mucilawo cangu, mbuli busensa zuba, mbuli buloka mume nokukasaala. 5 Ciindi cakutebula kacitanasika malanga-langa amana, acikwezuzyo, uyoogonka akusowa mitabi iilengelela. 6 Mitumba iyoosiilwa bayuni bamuzilundu kuti balye, abanyama bamusokwe, nkabela bayuni banooyoolya mitumba yabo mainza oonse, abanyama bamusokwe mupeyo woonse.” 7 Kuciindi eeco zipego zinooyooletwa ku Mwami Leza Singuzuzyoonse, kuzwa kubantu balamfu, bamibili miteteete. Bantu bayoowegwa kufwiifwi akulaale musyobo mulwani. Baamba mulaka uutamvwigwi. Kubantu balaanyika iiandaanyizidwe amilonga. Zipego ziyooletwa kucilundu ca Ziyoni, kubusena bubandwa zina lya Mwami Leza Singuzuzyoonse.