Izaya 17

Leza uyoosubula Baasiliya a Baisilayeli

¹ Ngaaya makani aamba zyamunzi wa Damasikasi. “Bona munzi wa Damasikasi, tuuciyoobi munzi alimwi, pele uyooba cilwi buyo. ² Minzi yaku Alowe iyoosyaala kakunyina uulimo iyooba ngamacelelo aamatanga, nkwayoobutila, taakwe uyooayamina pe. ³ Minzi iikwabilidwe iyoozimaana mu Efulemu, babulelo bwaku Damasikasi basyeede baciinga ca Baalamu, bayooba abulemu mbuli bwa Baisilayeli.” Mbwaamba Mwami Leza Singuzuzyoonse. ⁴ “Mubuzuba oobo bulemu bwa Jakobo buyoobbuluka. Kuneneya kwakwe kuyoomana. ⁵ Buyooba mbuli buzuba mutebuzi naya kuyobolola maila aaimvwi, akwaatebula. Buyooba mbuli buzuba muntu navulula mukkuti lya Lefaimu. ⁶ Nikuba boobo maila amwi ayoosyaala, mbuli litikinyizigwa muoliva, kulasyaala obilo otatwe ampela. One naa osanwe mumutabi iizyede kapati.” Mbwaamba Mwami Leza, Leza wa Isilayeli. ⁷ Mubuzuba oobo bantu bayoolangila ku Mulengi wabo, bayoolangilila kuli Uusalala wa Isilayeli. ⁸ Tabakooyoolangilila kuzipaililo eezyo nzibakalipangila pe, mituni yaleza mukaintu Asyela iyooba yabuyo. Zipaililo zyabo zyatununkilizyo eezyo nzibakayaka, ziyooba zyabuyo. ⁹ Mubuzuba oobo minzi yabo yankwakwa, eeyo njibakatijide Baisilayeli, iyooba mbuli masena oomo mumenede lumpote abuvuna-vuna. Yoonse iyoosyaala buyo kakunyina uulimo. ¹⁰ Nobaisilayeli, mwamuluba Leza wakamuvuna a kumukwabilila mbuli mwaala muyumu. Musyanga myuunda ya malende kuti kamukombela mumo baleza bambi. ¹¹ Pele nikuba isyuuke akulangazya mubuzuba mbubonya oobo mbumwaisyanga taakwe ncomwali kunootebula pe. Nimwali kujisi mapenzi amalwazi aatasilikiki.

Yazundwa misyobo yabasinkondonyina

¹² Bona bukali bwamisyobo minji, mbakali mbuli lwizi luukapaika! Bona kunyongana kwabantu, balavuuma mbuli buvuuma maanzi manji. ¹³ Nikuba kuti bantu kabayoba mbuli maanzi aavuuma, kuti wabanyemena balatijila kulaale. Balabbubbulwa aluuwo mbuli bungu mutulundu, mbuli masanga libbubbula guwo. ¹⁴ Lyaba kumangolezya balayoowa! Bwayanda kuca, batija. Mbociyooba akuli baabo batusaala, mbociyooba kuli baabo batunyanga lubono.