Izaya 15

Leza uyoonyonyoona cisi ca Mowabu

¹ Ngaaya makani aacisi ca Mowabu. Akaambo kakuti munzi wa Aa wazundwa mubuzuba bomwe buyo cisi ca Mowabu coolwa, canyonyoonwa mubusiku bomwe buyo! Kii mu Mowabu woolwa, wanyonyoonwa mubusiku bomwe buyo! ² Baku Diboni bainka kucikombelo cabo, bainka kumalende aabo kuti bakalilile nkuko. Cisi ca Mowabu cilila minzi ya Nebo a Medeba. Boonse balikulwidwe. Zilezu zyabo boonse zilinyweedwe. ³ Basama masaka aakuusa mutuzila. Atala aaziluli amuzisambalilo boonse balalila, akweema. ⁴ Baku Hesyiboni aku Eleyale baloompolola, majwi aabo alamvwigwa mane kuyoosika ku Jahazi. Nkaako basilumamba baku Mowabu baloompolola, akaambo kakuti batyompwa kapati. ⁵ Ndililila baku Mowabu, bantu babo batija mbaabo baakusika ku Zowaa, akuyoosika ku Egilatisyelisyiya. Mane mbaabo baakusika ku Luhiti, baya bulila. Mumugwagwa uuya ku Holonaimu baya bweema akaambo kakunyonyoonwa kwabo. ⁶ Kalonga ka Nimulimu kakayuminina, abwizu bwamumbali lyako bwakayuma, taacikwe amani. Taakwe abwizu butete busyeede pe. ⁷ Aboobo lubono oolo ndubakajisi akuluyobola, bayoosola kuluzubusya kukalonga kamikumbuzu. ⁸ Majwi aakulila kwabo alayooma kuminyinza ya Mowabu, kweema kwabo kulalimvwisya aku Egilaimu. Kulila kwakulyeetezya kwabo kulalimvwisya ku Biyaelimu. ⁹ Maanzi aaku Dimoni azwide bulowa, nikuba boobo baku Dimoni ndicibabikkide cimbi ciinda ceeci, syuumbwa uyoovwaampila baku Mowabu batijide, aabo basyeede mucisi eeci.