Izaya 10

¹ Maawe kuli baabo babikka milawo iitaluleme, aabo balemba malailile aadyaminina bantu bangu, ² kusinkila bacete kuti kabatali kwayi, balabeteka bantu bangu badyaminidwe cakutalulama. Baabonena kuli bamukabafu, banyanga bamusyaala lubono lwabo. ³ Ino muyoocita buti mubuzuba Leza mbwayoomusubula? Muyoocita buti ciindi natikamuletele mapenzi kuzwida kunyika yakulaale? Muyootijila kuli ni kuti mukagwasigwe? Ino muyoosiila ni mbono zyanu? ⁴ Muyoojaigwa munkondo akuyootolwa mubuzike. Nikuba boobo bukali bwa Mwami Leza tabunamana pe, janza lyakwe licivuumukide.

Leza mbwaakabelesya muleli mupati waku Asiliya

⁵ Maawe kulinduwe O Asiliya. Nduwe ngwendibelesya mbuli musako wangu wakutunduluzya aabo bandibisizya. ⁶ Ndakutuma kuti ukalwane musyobo uutalemeki Leza, ndakutuma kuti ukalwane bandinyemya. Ndakutuma kuti ukasaale lubono lwabo akuyoobalyataula mbuli matope munzila. ⁷ Pele walo takanzi boobo alimwi tayeeyi boobo pe, makanze aakwe ngakuti anyonyoone, ncayanda nkunyonyweedalimwi misyobo minji ilobe. ⁸ Waamba kuti, “Basilutwe bangu bankondo mbaamami boonse. ⁹ Ndakazunda minzi ya Kalino a Kaakemisyi, minzi ya Hamati a Aapadi, minzi ya Samaliya a Damasikasi. ¹⁰ Ndakazunda malelo manji aakomba mituni ajanza lyangu. Ndakaazunda aajisi mituni minji kwiinda yaminzi ya Jelusalemu a Samaliya. ¹¹ Mbuli mbundakanyonyoona munzi wa Samaliya antoomwe amituni yawo, mbubona oobo mbwendiyoonyonyoona munzi wa Jelusalemu amituni yawo.”

¹² Lino Mwami Leza aakumana kucita ceeco ncayanda kucilundu ca Ziyoni amunzi wa Jelusalemu uyooti, “Ono ndiyanda kusubula mwami waku Asiliya akaambo kakulikankaizya akulisumpula kwakwe.” ¹³ Kayi ulati, “Ndakacita eezi akaambo kanguzu zyajanza lyangu akabusongo bwangu, nkaambo ndaamaanu. Asiliya ulati, ‘Ndakamwaya minyinza ndakabanyanga mbono zyabo, ndakalwana anguzu mbuli zyamupoho akuzunda bami babo.’ ¹⁴ Mbuli bujatwa citeente, mbubonya oobo ambebo ndakabweza mbono zyamisyobo eeyo. Mbubonya mbuli bantu mbobabweza mayi aasiigwa, mbubonya oobo ndakayobolola zisi zyoonse, taakwe cakali kubbubba, nokuba kulila.” ¹⁵ Eelyo Mwami Leza wakaamba kuti, “Sena keembe kalakonzya kulidunda kuti nkakacita mulimo mupati kwiinda ooyo uukabelesya? Noliba saha, sena ndipati kwiinda ooyo uulibelesya? Musako tuuli nguubweza muntu, pele muntu nguubweza!”

¹⁶ Lino Mwami Leza Singuzuzyoonse uyootumina bulwazi oobo buzoocisa zinkuntumina zyabasilumamba bakwe. Mumibili yabo kuyooba mulilo uutazimiki. ¹⁷ Leza, nguwe mumuni wa Isilayeli uyooba ngomulilo. Leza Uusalala wa Isilayeli uyooba mabanga-banga aamulilo aayookonzya kutenta zyoonse mubuzuba bomwe buyo, naaba mamvwa azisonso. ¹⁸ Zisaka zyakwe zyeebelwa amyuunda yambolezi, yoonse iyoosyukuta amulilo mbuli bumana muntu uuciswa. ¹⁹ Kuyoosyaala buyo masamu mace cakuti naba mwana ulakonzya kwaabala.

Basyeede Baisilayeli

²⁰ Mubuzuba oobo Baisilayeli basyeede, aabo bacili baumi balunyungu lwa Jakobo, tabaciyoomusyomi ooyo wakabakoma. Pele bayoosyoma Mwami Leza Uusalala wa Isilayeli. ²¹ Basyeede ba Jakobo bayoopilukila, bayoopilukila kuli Leza wabo Singuzuzyoonse. ²² Nkaambo nikuba kuti bantu bako O Isilayeli kabali banji mbuli musenga wakulwizi, bace buyo mbabayoojoka. Bantu babambilidwe lunyonyooko oolo lubeelede. ²³ Iiyi ncobeni, Mwami Leza Singuzuzyoonse uyooleta lunyonyooko kunyika yoonse, mbubonya mbuli mbwaakaamba kuti uyookucita ooku.

Mwami Leza mbwayoosubula cisi ca Asiliya

²⁴ Mboobu mbwaamba Mwami Leza Singuzuzyoonse ulati, “Nywebo nobantu bangu nomukkala mu Ziyoni, mutayoowi Baasiliya pe, aabo bamuuma amusako, aabo bamukonga ankoli mbuli bwakali kucita Baijipiti. ²⁵ Mukaindi kaniini buyo ndilaleka kumunyemena, bukali bwangu bulabukila mbabo kuti banyonyoonwe. ²⁶ Imebo lwangu, nde Mwami Leza Singuzuzyoonse, ndiyoobakwabbaula answepu mbuli mbundakauma Bamidiyani kumwaala waku Olebu, ndiyootondezya musako wangu atala amaanzi mbuli mbundakacita ku Ijipiti. ²⁷ Mubuzuba oobo ndiyoomwaangununa kuzwa munguzu zya Baasiliya tamuciyoominwi, ajoko lyabo lili munsingo liyootyolwa.”

Mbubakasaalwa

²⁸ Basinkondonyoko bali mu Aiyati! Bainda kale Migiloni! Basiya bulilu bwabo ku Mikimasyi. ²⁹ Baisotoka kale nzila, bati, “Tuyooonena ku Geba.” Bantu bamumunzi wa Lama bakakankama. Bamumunzi wa Saulu waku Gibeya batija. ³⁰ Amulilisye nobantu baku Galimu! Amuswiilile nobantu baku Laisya! Amumvwe nywebo nobantu baku Anatoti! ³¹ Bantu baku Madimena baku Gebimu bayuba. ³² Sunu bayooimina ku Nobu, bayoovunga ntuku, kuvungila cilundu ca Ziyoni, kalundu ka Jelusalemu. ³³ Bona, Mwami Leza Singuzuzyoonse uyoobatyola, uyoobalosya mbuli mitabi yagonkwa kuzwa kuzinyina. Basikulisumpula abaabo balinonomona bayoogonkwa akutolwa aansi. ³⁴ Mwami Leza uyoobatema bakawe mbuli butemwa cisaka akeembe, Lebanoni uyooolwa kumbele lya Singuzu.