Intembauzyo 78
Masikili. Lwa Asafu
1 Amumvwe kwiisya kwangu, nobantu bangu, majwi ngeamba mwaaswiilile.
2 Ndakamwaambila zikozyanyo, ndamwaambila zintu zisisidwe zyakaindi aakaindi.
3 Zintu eezyo nzitwakamvwa akuziba, zintu eezyo zyakatwaambila basikale besu.
4 Tatukoozisisa kubana besu, tuyooambila zyalani liciboola milimo
iitembaulika, iitembaulika ya Mwami Leza azya nguzu zyakwe,
kubikkilizya azigambya eezyo nzyaakacita.
5 Wakapa mbeta kuli Jakobo, wabikka mulawo mu Isilayeli,
mulawo ooyo ngwaakalailila basikale besu kuti baiisye bana babo.
6 Kutegwa zyalani eelyo liciboola likazibe, bakazibe bana aabo batana
zyalwa, mukuti abalo bakaiisye bana babo.
7 Ndendilyo nibayoosyoma muli Leza, tabakalubi milawo yakwe pe,
nkaako banooibamba.
8 Tabakooyooba mbuli basikale babo,
aabo bakali zyalani lizangila Leza,
likatazya, zyalani lyatakali kusyomeka kuli Leza,
zyalani lyakali aamyoyo mibi.
9 Baalumi bamusyobo wa Efulemu bakajisi mata bakatija mubuzuba bwankondo.
10 Tiibakabamba cizuminano ca Leza, bakakaka kweenda mumalailile aakwe.
11 Bakaluba ceeco ncaakacita, zigambya eezyo zyaakabacitila.
12 Wakacita maleele basikale babo kabalibwenene, wakaacita munyika
ya Ijipiti amucuundu ca Zowani.
13 Wakaandaanya lwizi, wabazubusya, maanzi wakaabunganya mbuli bwaanda.
14 Isikati wakabeenzya akkumbi, masiku wakabeenzya amusumpuululu wa mulilo.
15 Wakabaandwida mandomba munkanda, wabapa maanzi manji mbuli aalwizi.
16 Mumundomba wakagwisya tulonga twamaanzi, maanzi akakunka mbuli mulonga.
17 Pele bakacili kumubisizya, bakazangila Sijulu wamajulu munkanda.
18 Bakamusunka caali Leza, bakakumbila zilyo nzibakafwide nkosya.
19 Bakasampaula Leza kabati,
“Sena Leza ulakonzya kutupa zyakulya munkanda muno?
20 Naakauma ndomba maanzi akapoomoka, milonga yakazula.
Sena ono Leza ulakonzya kutupa zyakulya munkanda muno?
Sena ulakonzya kupa bantu bakwe nyama?”
21 Lino Mwami Leza naakamvwa wakanyema kapati,
mulilo wakavutukila bantu ba Jakobo, bukali bwakwe bwakabukila Baisilayeli.
22 Nkaambo tiibakasyoma muli Leza, tiibakasyoma mukuvuna kwakwe.
23 Nikuba boobo wakalailila julu, wakajula milyango yajulu.
24 Wakalosya mana kuti bantu balye, wakalosya maila aakujulu.
25 Bantu bakalya zilyo zyabangelo, bakakkuta azilyo eezyo nzyaakabatumina.
26 Wakacita kuti luuwo lwakujwe luunge kuzwa kujulu,
wakeenzya luuwo lwakumusanza munguzu zyakwe.
27 Eeyo nyama njaakabalosezya, yakaloka mbuli lusuko,
bakali bayuni banji mbuli musenga wakunkomwe yalwizi.
28 Wakacita kuti bawide muzivuka zyabo, kabazingulukide matente aabo.
29 Bakalya, bakkuta, balilekela, kayi wakabapa ncibakafwide nkosya.
30 Pele kabatana mana kulya, kabacitamfuna,
kabacitamfuna zyeezyo nzibakafwide nkosya,
31 Leza wakababukila mubukali bwakwe,
akati kabo wajaya balombwana balimvwide,
wanyonyoona bakubusi Baisilayeli.
32 Nikuba boobo bakacili buya bubisya, naakacita zigambya tiibakamusyoma pe.
33 Wakabamanizya aabo mumazuba aabo kabanyina ancobajisi,
yakamanina mukuyoowa myaka yabo.
34 Kufumbwa ciindi ncaakabajaya bamwi babo, bakasyaala bakali kumulangaula,
bakali kupiluka kulinguwe kabeempede akulikombya.
35 Bakayeeya kuti Leza ndendomba lyamayubilo aabo,
kuti Leza Sijulu wamajulu ngomumuni wabo.
36 Pele balikunga bamupaila buyo aamilomo yabo,
basola kumucenga amilaka yabo.
37 Tiibakali kusyomeka kulinguwe,
tiibakakakatila cizuminano cakwe.
38 Nikuba boobo walo wakali kubeengelela,
wakalekelela zibi zyabo akutabajaya,
bunji bwaziindi wakali kulijata taakali kubanyemena buzwide pe.
39 Wakayeeya kuti aaba mbantu buyo,
bali mbuli luuwo lwiindilila lutabooleli alimwi.
40 Bunji bwaziindi bakamuzangila munkanda,
bamuusya nsoni mucimpayuma.
41 Bunji bwaziindi bakali kutepaula Leza,
bakakatazya Uusalala wa Isilayeli.
42 Tiibakali kuyeeya zya nguzu zyakwe nzyaakabanunuzya,
buzuba oobo naakabanununa kuzwa kuli basikubadyaminina.
43 Buzuba oobo mbwaakatondezya maleele Muijipiti,
ambwaakatondezya zigambya zyakwe mucuundu ca Zowani.
44 Maanzi aamilonga yabo wakaasandula aba bulowa,
tiibakakonzya kunywa maanzi pe.
45 Wakabatumina makata-makata aanzinini zyakabakatazya,
abacula banji bakanyonyoona cisi cabo.
46 Wakaaba zisyango zyabo ku nsozi, waaba zilimwa zyabo kucikwikwi.
47 Wakanyonyoona misaansa yabo acivula mabwe, mikuyu yabo yakaandwa mpeyo.
48 Ŋombe zyabo zyakaumwa civulamabwe, zivubwa zyabo zyakaandwa ndabo.
49 Wakabakalalila kapati, wabanyemena,
wakabavungila moyo wabaletela mapenzi,
eezi kulimbabo zyakali mbuli nkamu yabangelo iinyonyoona.
50 Taakalesya bukali bwakwe akubaleka buyo,
kubaleka buyo kuti kabapona, pele wakabaletela cuumo.
51 Wakauma bana boonse bakusaanguna ba Baijipiti,
bana babulombe bwabo baciinga ca Hamu.
52 Bantu bakwe wakabagwisya mbuli butanga,
wakabasolweda munkanda mbuli beembezi.
53 Tiibakayoowa nkaambo wakabeenzya kabotu,
basinkondonyina lwizi lwakabamena.
54 Wakabatola waakubasisya kunyika yakwe iisalala,
kunyika yatukundu eeyo njaakazunda mwini,
wakiizunda ajanza lyakwe lyalulyo.
55 Wakatanda bamasi kuzwa kuli mbabo,
nyika yabamasi wabaabila kuti ibe lukono lwabo,
wabikka misyobo ya Isilayeli muminzi yabo.
56 Pele bakatepaula Leza,
bazangila Sijulu wamajulu, mbeta zyakwe tiibakazibamba pe.
57 Bakaleya-leya, kabatasyomeki mbubonya bwakali basikale babo,
bakali mbuli buta bugodyomene.
58 Bakamunyemya akaambo kamalende aabo,
wakabijilwa akaambo kamituni yabo.
59 Lino Leza naakabamvwa wakanyema kapati,
Baisilayeli wakabakakila limwi.
60 Wakasiya cikombelo cakwe caku Syilo,
tente ndyaakayakide akati kabantu.
61 Wakalekela kuti bbokesi lyakwe litolwe abasinkondonyina,
basinkondonyina bakatola bbokesi lyabulemu bwakwe.
62 Wakaaba bantu bakwe kuti bajaigwe apanga,
wakabaaba nkaambo wakabanyemena.
63 Nkondo yakali kubbebba mbuli mulilo yakanyonyoona bakubusi babo,
banakalindu babo bakanyina alwiimbo lwabwiinga.
64 Bapaizi babo bakajaigwa apanga, bamukabafu babo tiibakabalila pe.
65 Lino Leza wakabuka mbuli muntu wali koona, mbuli muntu wakakoledwe waini.
66 Wakauma basinkondonyina akubatanda, wakabausya nsoni zitamani.
67 Wakakaka balunyungu lwa Josefa, taakasala musyobo wa Efulemu.
68 Wakasala musyobo wa Juda, cilundu ca Ziyoni eeco ncaakali kuyandisya.
69 Wakayaka cikombelo cakwe cisalala a zilundu zilamfu,
mbuli nyika eeyo njaakabikka akutamani.
70 Wakasala Devedi mubelesi wakwe, wakamugwisya kuzimpati zyambelele.
71 Wamugwisya kuzwa kukweembela mbelele,
kuti abe mweembezi wabantu ba Jakobo,
bantu Baisilayeli bali ndukono lwakwe.
72 Lino Devedi wakabeembela amoyo uukkede,
wakabasolweda ajanza lyakwe caluzibo.