Intembauzyo 72
Lwa Solomoni
1 O Leza, iisya mwami kuti abeteke bweelede, iisya mwanaa mwami zyabululami bwako.
2 Nayoobeteka bantu bako buluzi, uyoolulamika mukukosola milandu yabapenzegwa.
3 Nyika eeyi yatulundu iyooletela bantu lusumpuko,
lusumpuko lwabululami mukuti bayoolikkalila.
4 Bapenzegwa akati kabantu uyoobakwabilila, uyoobafutula babulide,
uyoopwayaula babadyaminina.
5 Uyookkalilila mbuli zuba, mbuli mwezi kwamazyalani oonse.
6 Uyooba mbuli mvula yawida abwizu bugonkedwe,
mbuli lunywaanywa luwida anyika.
7 Buyooba kabotu bulemu mumazuba aakwe, bunoozwidilide mbubonya bukkalilide mwezi.
8 Uyoolela kuzwa kulwizi lumwi kuyoosika kuli lumwi,
kuzwa kumulonga kuyoosikila kumulonganyina.
9 Misyobo iikkala munkanda iyoomukotamina, basinkondonyina bayoozundwa, bayoolya vu.
10 Bami baku Taasyisyi, bakunsumbu zili kulaale, bayootela kuli nguwe.
Bayooleta zipego kuli nguwe bami baku Syeba aku Seba.
11 Bami boonse bayoomufugamina, misyobo yoonse iyoomumanina milimo.
12 Aabo babulide, bamulilaukila ulabavuna, ulabagwasya bacete, aabo batajisi.
13 Uleetelela bateteete, babulide, uvuna babulide kuzwa kulufu.
14 Uyoobavuna kuzwa kukudyamininwa amapyopyongano,
nkaambo buumi bwabo mbuyandisi kulinguwe.
15 Aongole apegwe ngolida iizwa ku Syeba, bantu kabamukombela lyoonse,
kabamulemeka buzuba boonse.
16 Maila avule mucisi coonse, afwefweme atala aatulundu,
micelo yawo ivule mbuli yaku Lebanoni, abeke mbuli bwizu musokwe.
17 Izina lyakwe alikkalilile lyoonse, kanooliwo lyoonse mbubonya bukkalilide zuba.
Kwiindila mulinguwe misyobo yoonse iyoolelekwa, bayoomwaamba kuti ulilelekedwe.
18 Mwami Leza wa Isilayeli, aatembaulwe, nkaambo walo alikke nguucita milimo iigambya.
19 Lyoonse alyoonse akutembaulwe buyo zina lyakwe lyabulemu,
abuzuzye nyika yoonse bulemu bwakwe. Akube boobo! Akube boobo!
20 Aawa mpaamanina kukomba Devedi mwanaa Jese.