Intembauzyo 68
Kumweendelezi wanyimbo. Lwiimbo lwa Devedi
1 Aanyamuke Leza amwaye basinkondonyina, batije aabo bamulwana.
2 Ubatande bamwaike mbubumwaika busi luuwo lwaunga, beenzemuke
mbuli bunzuka buli munsi aamulilo, babi abalobe kumbele lyako.
3 Baluleme babotelwe akusekelela, kumbele lya Leza abakondwe akutangala.
4 Amumwiimbile Leza, mutembaule zina lyakwe,
amumulumbaizye ooyo uutantide amakumbi,
ngu Mwami Leza ndezina lyakwe eelyo, amusekelele kumbele lyakwe.
5 Nguugwasya bamukabafu, ngowisi bamucaala, ngu Leza uukkala mubusena bwakwe busalala.
6 Leza nguupa munzi kulibaabo baumbaalidwe, nguuangununa baange
kuti balyeendelele cakutangala, bazangi ubakkazika mucimpayuma.
7 O Leza, ciindi ncookasolweda bantu bako, nokainda munkanda,
8 kwakawa mvula kuzwa kujulu, nyika yakazungaana,
mvula yakawa kumbele lya Leza waku Sinayi, Leza wa Isilayeli.
9 O Leza, yakawisya mvula mpati, wakabukulusya nyika yako yakakulumpede.
10 Bantu bako bakakkala mulinjiyo, babulide wakabaabila kuzwa mumaila aako manji.
11 Mwami wakaambilizya majwi aakwe, mbanji baakanana makani aaya.
12 “Bamami ampi balatija calubilo, muzivuka bakaintu baabana zisaalwa.
13 Mababa aanziba yangu ivumbilidwe nsiliva,
alimwi mapepe aayo avumbilidwe ngolida iisyobedwe.
Nkaambo nzi bakasyaala kabalede akati kazimpati zyambelele?”
14 Lino Singuzuzyoonse naakamwaisya bami munyika eeyo,
kwakaba mbuli caanda cawida Zalumoni.
15 Zilundu zyaku Basyani zileebeka, zileebeka zilundu zilamfu eezyo.
16 Ino mulanga buti aamunyono, nozilundu zilamfu,
kucilundu Leza ncasalide kuti kalela kuzwa nkuko, ooko Leza nkwanookkede kwalyoonse alyoonse?
17 Nkalaki zya Leza zili makumi aali zyuulu, azyuulu-zyuulu,
Mwami waboola kuzwa ku Sinayi, wanjila mucikombelo cakwe cisalala.
18 Yebo, nookatanta mujulu kutola baange, wakatambula zipego kuzwa kubantu,
kuzwa kubantu bazangi, mukuti yebo, O Mwami Leza, ukkale kooko.
19 Aalumbwe Leza mufutuli wesu, nguutunyamwida mikuli yesu lyoonse.
20 Leza wesu ngu Leza uufutula, nguutuvuna kuzwa kulufu, ngo Mwami Leza weendelezya.
21 Masimpe Leza uyoopwayaula basinkondonyina, aabo balikankaizya muzinyonyoono.
22 Mwami wakati, “Njoobapilusya kuzwa ku Basyani, njoobapilusya kuzwa kumpisi yalwizi.
23 Kuti usanzye zituta zyako mubulowa bwabo, kuti bamyankute babwa bako cibe caabilo cabo abalo.”
24 Balabona, O Mwami Leza, mbonjila, balabona mbonjila mucikombelo cako,
cikombelo cako cisalala O Leza, Mwami wangu.
25 Kumbele kuli baimbi, kwamana kuli basituntimbwa,
musule aabaabo kuli basimbi balizya nsakalala.
26 Mumbungano mpati amumutembaule Leza, amumutembaule mumbungano ya Baisilayeli.
27 Nguulya musyoonto wa Benjamini, wabasolweda nguwe musyoonto,
njeeyo nkamu yabasololi ba Juda, mbaabo basololi ba Zebuluni aba Nafutali.
28 Bonya nguzu zyako, O Leza, mbubonya mbuli mbookacitide kusaanguna,
tondezya nguzu, O Leza.
29 Akaambo kaŋanda yako iili mu Jelusalemu, bami balakuletela zipego.
30 Tapatila banyama bakkala mumatete,
nkamu yabapoho akati kaboombe bamisyobo-misyobo,
babombye kusikila bakuletele zikoto zyansiliva,
bamwaye aabo bayandisya nkondo.
31 Kuyooboola batumwa kuzwa ku Ijipiti, nyika ya Kusyi iyoolibombya kuli Leza.
32 Amwiimbile Leza nozisi zyaansi, amumutembaule Mwami.
33 Nguuendela kujulu lyakale-kale, ngonguwe uuzuma ajwi pati.
34 Amwaambilizye nguzu zya Leza ooyo uulemekwa mu Isilayeli,
ulaanguzu zili kujulu.
35 Mucikombelo cako cisalala ulayoosya, O Leza,
ulapa nsana anguzu kubantu bakwe. Aalumbwe Leza.