Intembauzyo 66
Kumweendelezi wanyimbo. Lwiimbo
1 Amupozomoke cakutangala kuli Leza, amupozomoke nobantu banyika yoonse.
2 Amumwiimbile nkaambo kabulemu bwa zina lyakwe,
amumulemeke, mumutembaule.
3 Amwaambile Leza kuti, “Milimo yako ilagambya, nguzu zyako nzipati
cakuti basinkondonyoko balalinyansya kulinduwe.
4 Nyika yoonse ilakukomba, ilakutembaula, itembaula zina lyako.”
5 Amuboole, mubone ncaacita Leza, milimo yakwe ilagambya akati kabantu.
6 Nguwakacita lwizi kuti lube nyika njumu,
bantu bakazubuka mulonga amaulu, ooko twakasekelela mulinduwe.
7 Ulalela anguzu zyakwe kukabe kutamani, meso aakwe alangilila misyobo
kuti bazangi batamubukili.
8 Nobantu, amutembaule Leza wesu, akumvwigwe buyo mbwatembaulwa.
9 Nguutubamba mubuumi bwesu, nguucita kuti maulu eesu atatezemuki.
10 Watusunka, yebo, O Leza, mbuli busalazigwa nsiliva mbootusalazya.
11 Watubikka muntolongo, watuteya akakole, kusule watubbazika zibbudu zyesu.
12 Wacita kuti bantu batwide amitwe yesu nduwe, twakainda mumaanzi
amumulilo, wakatusisya kubusena bwaceyo.
13 Azipaizyo zyakutenta njoonjila muŋanda yako, njoozuzukizya zikonke zyangu kulinduwe.
14 Zikonke eezyo nzindakalyaambilila akusyomezya ndemwini,
ndakalyaambilila nindakali mumapenzi.
15 Njoopaizya banyama baneneede, bweema bwa bagutu, bapoho abwa mpongo.
16 Nywebo nyoonse nomuyoowa Leza amuboole muswiilile,
iimmwaambile nzyaakandicitila mebo.
17 Ndakoompolola kuli nguwe, ndakamutembaula amulaka wangu.
18 Nindakasisa cinyonyoono mumoyo wangu, Mwami Leza naatakandiswiilila.
19 Leza wakateelela, wakamvwa kukomba kwangu.
20 Aalumbwe Leza nkaambo taakaka kukomba kwangu,
taagwisya luyando lwakwe lutazungaani kulindime.