Intembauzyo 64
Kumweendelezi wanyimbo. Lwiimbo lwa Devedi
1 Nentongooka, O Leza, swiilila jwi lyangu, kuzwa kuli sinkondoma
uundikonga, ububambe buumi bwangu.
2 Kuzwa kubabi bandikanza undisise, undisise kuzwa kuli baabo bayobeka bacita zibi.
3 Milaka yabo baliikwenga mbuli mapanga, beeleka majwi aabo mbuli mivwi.
4 Bafusa mivwi yabo, kuzwa mobayubide, biifusa kumuntu uutakwe mulandu,
katalibambilide balamuyasa, tabayoowi pe.
5 Mumakanze aabo mabi balamuyuminizya, baamba mbobateya tukole tusisidwe,
balati, “Ino nguni uunga watubona?”
6 Zitaluleme nzyobakanza kabati, “Ono twajana nzila.”
Masimpe moyo amiyeeyo yamuntu ilipilingene.
7 Leza uyoobafusa mivwi yakwe, bayoowida aansi waakubayasa.
8 Nguuyoocita kuti milaka yabo ikababukile beni,
boonse bayoobabona kabanyonyooka bayoopukusa mitwe,
bayoopukusa mitwe cakubasampaula.
9 Aawo bantu boonse bayooyoowa, bayooambilizya milimo ya Leza,
akaambo kaziyoocitika bayoozingimana.
10 Baluleme abatijile ku Mwami Leza akusekelela,
abamutembaule boonse aabo baluleme mumyoyo.