Intembauzyo 55
Kumweendelezi wanyimbo. Aimbye bwiimbwa lwiimbo lwazingwali-ngwali lwa Masikili ya Devedi
1 O Leza, swiilila kukomba kwangu, utakaki kukumbila kwangu.
2 Undimvwe, undiingule, ndatongela, ndazingwa mumapenzi aangu.
3 Ndatongela akaambo kazyaamba basinkondoma,
akaambo kakundipenzya nkobandipenzya basizibi,
balindisulide akundiletela mapenzi mubukali bwabo.
4 Ndapenga kapati mumoyo, kuyoowa lufu kwandeenzya.
5 Ndiyoowede, ndakankama kapati, ndavwindingana mumanyongwe.
6 Ndakati, “Nicali cibotu nindali mbuli nziba, amababa nindauluka nkeyoolyookezya.
7 Ncobeni nindaya kulaale, nkeyookkala munkanda.
8 Nindafwambaanina kuciteente cangu, kulaale kuzwa kuguwo libbubbula eeli.”
9 Banyonganye O Mwami Leza, kuti batamvwani,
nkaambo mumunzi kuli mazwanga ankondo.
10 Aluuzingulikide masiku a Sikati, auzuzya mazwanga amapenzi.
11 Mukati kamunzi muli lunyonyooko lutaambiki,
mumazila aawo kuli buyo kukongana akutamikizyanya.
12 Nindakakatila, nikwali kuti sinkondoma uundilwana nguundisampaula.
Nindayuba, nikwali kuti uundilwana nguwandibukila.
13 Pele nduwe, ngwindali kuti mweenzuma, mulongwaangu.
14 Yebo ngutwali kumvwana limwi, ngutwali kweenda limwi amakamu aabantu kuŋanda ya Leza.
15 Kabatazi basinkondoma alubaboolele lufu, abazikkwe bulanga,
baye kwacivumwe, kayi bubi buli akati kabo.
16 Pele mebo njita nduwe, O Mwami Leza, uundivuna.
17 Kube kumangolezya, cifumo-fumo naa sikati,
ndamulilila mukupenga awalo ulamvwa jwi lyangu.
18 Munkondo njobandilwana nguundivuna kuti intalicisi,
nikuba kuti bavule buti bandilwana.
19 Leza uukkede acuuno cakwe mane kukabe kutamani uyoobamvwa akubatundulula,
aabo bataleki nzila zyabo, aabo batayoowi Leza.
20 Mweenzuma wabuka kulwana balongwe bakwe, watyola cizuminano cakwe.
21 Kukanana kwakwe kwakali kubotu mbuli mabisi,
ani wakali lutide mumoyo wakwe, majwi aakwe akali mbuli tufuta,
pele akali kukosola mbuli mapanga aabosya.
22 Tola makatazyo aako ku Mwami Leza, walo nguuyookukwabilila,
taleki kuti baluleme banjile mumapenzi.
23 Mudindi lyalunyonyooko moyoowaala babi, O Mwami Leza, myaka yabaabo
batila bulowa akucenga iyootwentana, iyootwentana ikabe cisela, pele mebo nnsyoma nduwe.