Intembauzyo 21
Lwiimbo lwa Devedi Kumweendelezi wanyimbo
1 O Mwami Leza, mwami ulasekelela munguzu zyako,
ulatangala kapati nkaambo nduwe oomuzundya.
2 Eeco cisukeme moyo wakwe ncomupa,
eeco ncakumbila toomwiima pe.
3 Wamupa buumi mbwaakakukumbila,
amutwe wamusamika musini wangolida iini-ini.
4 Wakakukumbila buumi eelyo yebo wakamupa,
wakamupa buumi bwalyoonse alyoonse.
5 Walemenena nkaambo kakuti wakamuzundya,
bulemu abwami nduwe oomusamika.
6 Kwaambisya wamupa zileleko zitamani,
ulamubotezya nkaambo lyoonse ulaanguwe.
7 Mukuti mwami usyoma mu Mwami Leza,
amuluyando lwa Sijulu wamajulu lutamani,
mwami takazungaanyizigwi pe.
8 Lilabajata basinkondonyoko janza lyako,
lilabakwempula bakulwana janza lyako lyalulyo.
9 Uyoobasowela mubbibi lyamulilo ciindi waakulibonya,
uyoobamena Mwami Leza mubukali bwakwe, uyoobasyukutya mulilo wakwe.
10 Lunyungu lwabo uyoolunyonyoona kuzwa munyika,
uyoolobya bana babo kuzwa mucisi.
11 Nikuba kuti bayeeya zyakukubisizya,
nikuba kuti balaamakanze mabi, taaku nibayoozwidilila pe.
12 Baakubona kuti walibambila mivwi yakubayasa eeci ciyoocita kuti bakutije.
13 Munguzu zyako O Mwami Leza uyootembaulwa,
tulaimba nyimbo zyakutembaula nguzu zyako.