Intembauzyo 18
Intembauzyo ya Devedi
Mweendelezi wanyimbo, lwa Devedi mubelesi wa Mwami Leza Majwi aalwiimbo oolu wakaimbila Mwami Leza ciindi naakamuvuna kuzwa kuli basinkondonyina boonse akuli Saulu.
1 Nduwe nguzu zyangu O Mwami Leza nkankakaako ncekuyanda.
2 Mwami Leza ngomwaala acisitilizyo cangu cindivuna,
ngonguwe ndomba amayubilo aangu, ulandifutula anguzu zyakwe,
nentobo acikwabilizyo cangu.
3 Ndamwiita Mwami Leza, ulandifutula kuzwa kuli basinkondoma,
nkaako aalumbaizigwe Mwami Leza.
4 Kundizingulukide ngozi zyalufu,
kundikukulula fwipi-fwipi linyonyoona.
5 Zyandizinguluka ngozi zya kwacivumwe,
kundiboolela tukole twalufu.
6 Mumapenzi aangu ndakalilila Mwami Leza,
ndakalilila Leza wangu kuti andigwasye,
wakamvwa jwi lyangu kuzwa kuŋanda yakwe,
wakaswiilila kulila kwangu kwalugwasyo.
7 Yakazyangama akuzungaana nyika,
ntalisyo zyazilundu zyakatenkaana,
zyakayuntaana nkaambo Leza wakanyema.
8 Kwakali kuunta busi mumpemo zyakwe,
mulilo uusyukuta wakali kuvwilima mukanwa mwakwe,
mulinguwo mwakali kuzwa makala aasalala.
9 Wakaandula julu, waza ansi,
kunsi lyamaulu aakwe kwakali makumbi aasiya.
10 Wakatanta bakelebu wauluka, amababa aaluuwo wapeeluka.
11 Musinze wakali muvumbilide, akali muzingulukide makumbi
mapati, makumbi mapati aazwide maanzi.
12 Mukubala kwakwe mwakali kuzwa ndabo acivulamabwe,
zyakali kwiinda mumakumbi aakamuzingulukide aayo.
13 Wakazuma kuzwa kujulu Mwami Leza,
lyakandindima jwi lyausumpukide.
14 Basinkondonyina bakamwaika naakafusa mivwi yakwe,
zyakabatandaanya ndabo mpati.
15 Tako lyalwizi lyakalibonya,
ntalisyo yanyika yakakkala aatuba,
eeci cakali ciindi nookatapatila basinkondonyoko,
ciindi muuya wamumpemo zyako nuwakabafula.
16 Kuzwa kujulu Mwami Leza wakalandabika janza,
wandijata akundinuna kuzwa mumaanzi malamfu.
17 Kuzwa kuli basinkondoma basinguzu wakandivuna,
kundivuna kuzwa kuli baabo bandilwana, balaanguzu kwiinda ndime.
18 Nkelaapenzi bakandilwana,
pele Mwami Leza wakandikwabilila.
19 Abusena bubotu mpaakandibikka,
cakamubotela kuti andivune.
20 Bweelede bululami bwangu mbwaandicitila Mwami Leza,
mukuti nsijisi kaambo wandilumbula.
21 Nzila zya Mwami Leza nzyebamba lyoonse,
nsiindakabisya kwiinda mukusiya Leza wangu.
22 Milawo yakwe njindakaswiilila lyoonse,
malailile aakwe nsiindakaasusya pe.
23 Nsijisi kampenda kuli nguwe, ndalibamba kuzwa kububi.
24 Kweendelana abululami bwangu, Mwami Leza wandilumbula.
Mukuti nsijisi kaambo kulinguwe, wandipa bweelede.
25 Kuli baabo bakusyoma, O Mwami Leza, ulasyomeka.
Ubacitila kabotu aabo banyina kampenda.
26 Zisalala nzyocitila baabo balondokede,
aabo bapilingene ulibacenjelede.
27 Mwami Leza ufutula babombede,
aabo balisumpula ulababombya.
28 Munzenge wabuumi bwangu Mwami Leza nguuuyasya,
mudima nguuusandula kuti ube mumuni.
29 Ndilakonzya kulwana mpi niiba buti nondigwasya,
zikwabilizyo zyabo ndazipola.
30 Nzila zyakwe zililondokede, aalo majwi aakwe alasyomeka,
nentobo yabaabo bayubila muli nguwe.
31 Alikke Mwami Leza ngo Leza,
mwaala wakuyubila kunze lyakwe taaku.
32 Uundipede nguzu ngu Leza,
ngonguwe uupa kuti nzila zyangu zilondoke.
33 Maulu aangu waayumya mbuli aanjeleele,
nimuba mumajeleele ndakonzya kwiima.
34 Ngonguwe uundiiisya kulwana nkondo,
ndakonzya kufusa abuta bwamukuba.
35 Antobo yako yalufutuko ulandisinkilizya,
janza lyako lyalulyo lilandikwabilila.
Ulalanga ansi kuti undikomezye.
36 Nzila yangu nguuikwakwabula, kuti intabi nesyikuka.
37 Ndakalikubeenzya basinkondoma ndabatandaanya,
nsiindakali kupiluka kusikila ndabanyonyweeda limwi.
38 Ndakabapwayaula cakuti tiibakabuka limbi pe,
amaulu aangu ndemwini ndakabalyatauka.
39 Nguzu zyakulwanya nkondo nguwakandipa,
nguwakapa kuti nnzunde basinkondoma.
40 Nguwakacitya kuti basinkondoma banditije,
bandicimwa ndakabanyonyweeda limwi.
41 Bakalilila lugwasyo, wakakonzya kubagwasya taakwe pe,
akaka doono ku Mwami Leza, pele taakwe nakabavuna pe.
42 Mbuli lusuko lupepaulwa aluuwo mbwindakabasila,
mbuli ntimba munzila mbundakabadyaminina.
43 Kuzwa kuli baabo bakali kundilwana wakandivuna,
nguwakapa kuti ndilele zisi zyoonse,
kwandibelekela bantu mbindatakazi.
44 Majwi aangu balaaswiilila mbubaamvwida buyo,
cakuyoowa bamasi balandikotamina.
45 Balatuntuma kalibalekede, balaza kuzwa muziyubilo zyabo.
46 Mwami Leza muumi. Mukuti ngomwaala uundikwabilila aalemekwe,
abwaambilizigwe bupati bwa Leza uundivuna.
47 Nguundibweedezezya basinkondoma, nguundizundila bazwamasi.
48 Kuzwa kuli basinkondoma nguundifutula,
nguwandizundya basinkondoma,
kuzwa kuli baabo bapyopyongene wandivuna.
49 Nkaako O Mwami Leza njookulumbaizya kubazwamasi,
munyimbo njoolumbaizya zina lyako.
50 Nduwe oopa kuti mwami wako azunde,
nduwe ooyandisisya munanike wako,
Devedi alunyungu lwakwe kwalyoonse alyoonse.