Intembauzyo 17
Kukomba kwa Devedi
1 Kukomba kululeme kokuswiilila O Mwami Leza,
kokuswiilila kulila kwangu,
kutwi kwako kucenjekele kukukomba kwangu.
Kukomba ooku takuzwi mumilomo yalweeno.
2 Uluukosola bweelede mulandu wangu,
nkaambo ulibwene kuti ndiluleme.
3 Moyo wangu uluuzi nkaambo ulandilingula masiku,
nokuba kuti wandisola buti ulajana kuti nsilubizizye pe.
Zibi ziteelede nsizyaambi aasyoonto.
4 Nsyaambi zibi mbuli bantu bamwi,
munzila zyalupyopyongano nsijaniki.
5 Ntobela buyo nzila nzyako lyoonse, kunyina aneleya taaku.
6 Ulandivuwa O Leza ndakwiita,
cenjekela kulindime kutwi kwako,
komvwa kukomba kwangu.
7 Luyando lwako lugambya lutondezye,
ulabafutula ajanza lyako lyalulyo kuzwa
kuli basinkondonyina, aabo bayubila mulinduwe.
8 Ndikwabilile mbubonya mbokwabilila liso lyako,
undivumbilile mucimvule camababa aako.
9 Kondikwabilila kuzwa kubabi bayanda kundilwana,
bajayi basinkondoma balindizingulukide.
10 Mbayumu myoyo tabakwe lubomba, baambauzya kasampu-sampu.
11 Balikunditobela, lino bandizinguluka,
balangaula nzila yakuti banduusizye ansi.
12 Mbuli syuumbwa uulindila ncati vumpe mbobabede,
mbuli syuumbwa uuyubilide wabutambo mbobabede.
13 Akaka O Mwami Leza nyamuka, swaangana abasinkondoma aaba,
ndivune kuzwa kubabi aaba, bazunde apanga lyako.
14 Kuzwa kubantu babi baliboobu, ndifutule ajanza lyako, akaka O Mwami Leza.
Mbantunsi, bulumbu bwabo mbuumi buno bulikke.
Amapenzi ngobabikkilide basubwide limwi.
Akaka naalikunga ajatikizya abana babo mane do akubana babana babo.
15 Mukuti ndiluleme ndiyoobubona busyu bwako,
njookkomana kukubona ndaakubusigwa.