Intembauzyo 16
Mikitamu ya Devedi
1 O Leza, kondikwabilila, ciyubilo cangu nduwe.
2 Ndakati ku Mwami, “Nduwe Mwami Leza wangu,
zibotu zyoonse nzejisi zizwa kuli nduwe.”
3 Kwaamba basalali balaanyika aano, balalemekwa aaba, nkaako ndabotelwa.
4 Baliletela mapenzi manji aabo batandila baleza bambi,
nsikonzyi kupedaamwi ambabo cipaizyo cabulowa,
nsikozyi kwiita mazina aabaleza babo mukukomba pe.
5 Lukono lwangu O Mwami Leza nduwe ookandipa,
wakandipa ankomeki yazileleko zyangu.
Uundikkazika kabotu nduwe.
6 Minyinza yangu yakwakwabukila mumasena mabotu,
alwalo lukono lwangu lulandibotelezya kapati.
7 Mwami Leza ndilamulumbaizya mbwali nguundilailila,
awalo moyo wangu ulandicenjezya naaba masiku.
8 Ndilizi kuti Mwami Leza mpali lyoonse,
taakwe cikonzya kundizyangamya nkaambo uli munsi lyangu.
9 Nkaako moyo wangu ulatangala,
mulaka wangu awalo ulalumbaizya,
ndikwabilidwe ncenciceeco ncelikkalide.
10 Tokooyoondisiya mwacivumwe,
tokaleki ooyo uusyomeka wako kuti abole.
11 Nzila yabuumi nduwe ookanditondezya,
uyoonditangazya kapati ooko nkobede,
kujanza lyako lyalulyo ndiyookondwa lyoonse alyoonse.