Intembauzyo 138
Lwiimbo lwa Devedi
1 Njookutembaula amoyo wangu woonse, O Mwami Leza, njooimba nyimbo zyakukutembaula akati kabaleza.
2 Njookotama nkelangide kuŋanda yako iisalala,
njootembaula zina lyako akaambo kaluyando akusyomeka kwako,
walidumya zina lyako amajwi aako kwiinda zintu zyoonse.
3 Ciindi nindakakwiita wakandimvwa, wakandiyumya akundipa camba.
4 Boonse bamami baansi bayookutembaula, O Mwami Leza, nkaambo majwi ngookakanana bakaamvwa.
5 Bayooimba kabalumbaizya zina lyako, O Mwami Leza,
bayooimba nkaambo bulemu bwa Mwami Leza mbupati.
6 Nikuba kuti Mwami Leza ulikujulu, batete myoyo ulibabwene,
ulabalanga akubabona balisumpula kabacili buyo kulaale.
7 Nikuba kuti njenda akati kamapenzi, yebo ulandibamba,
utandabika janza lyako kulibaabo bandilwana bakali, ulandivuna ajanza lyako lyalulyo.
8 Mwami Leza ulandicitila nzyaakasyomezya,
luyando lwako, O Mwami Leza, ndwalyoonse alyoonse.
Milimo eeyi njookacita amaanza aako utiileki pe.