Intembauzyo 129
Lwiimbo lwa kutanta
1 Basinkondoma balandipenzya kuzwa nkecili mukubusi, Isilayeli aambe boobo.
2 Basinkondoma balandipenzya kuzwa nkecili mukubusi, nikuba boobo taakwe nibakandizunda.
3 Kusule ooku ndaamibunda mbuli bulimo, kusule ooku ndaatunkolola tulamfu.
4 Pele Mwami Leza mubululami bwakwe wakosoola ntambo zyabasizibi zyandijisi.
5 Boonse basulide Ziyoni, aabo bamusulaika bapiluke kabafwide nsoni.
6 Ababe mbuli bwizu bumena aciluli caŋanda, kabutana akukomena bulapusama.
7 Uutebula waamba kuti atebule tabuzuzyi ajanza pe, awalo sikujwa abujwa tabupangi akakama pe.
8 Aabo bainda munsi-munsi aakooko bataambi kuti,
“Mwami Leza amuleleke, naa kuti, ‘Twamuleleka muzina lya Mwami Leza.’”