Intembauzyo 107
BBUKU LYASANU
(Intembauzyo 107—150)
Bubotu bwa Mwami Leza
1 Amumulumbe Mwami Leza nkaambo mmubotu, luyando lwakwe lutazungaani talumani.
2 Aabo Mwami Leza mbaakanununa baambe boobo,
aabo mbaakanununa kuzwa kuli babalwana.
3 Baambe aabo mbaakaboozya kuzwa kumasi aaandeene-andeene,
kuzwa kujwe akumbo, kuzwa kunyika akumusanza.
4 Bamwi bakali kutuntulika munkanda,
kabatuntulika mucimpayuma taakwe nibakajana munzi wakukkala.
5 Bakafwa nzala anyota, myoyo yabo yakawizuka.
6 Lino mumapenzi aabo bakalilila Mwami Leza,
walo wakabafutula kuzwa kumakatazyo aabo.
7 Wakabasolweda munzila iiluzi, kusikila nibakajana munzi wakukkala.
8 Amulumbe Mwami Leza akaambo kaluyando lwakwe lutazungaani,
akaambo kamilimo yakwe iigambya njaakacitila bantu.
9 Bafwide nyota ulabanywisya bamvwa, bafwide nzala ulabasanina bakkuta zintu zibotu.
10 Akaambo kakuzangila Leza bamwi bakkede mumudima uusiya mbi,
balaangilwe balapenga munketani.
11 Bapenga boobo nkaambo bakazangila majwi aa Leza,
bakasampaula kulailila kwa Sijulu wamajulu.
12 Nkaako wakabaaba kuli bakali kubapa milimo iiminya, bakali kuwa,
pele kwakanyina uubagwasya.
13 Babone boobo bakalilila Mwami Leza mumapenzi aabo,
walo wakabavuna kuzwa mumakatazyo aabo.
14 Wakabagwisya mumudima, mumusinze uusiya mbi,
wakatyoloola nketani zyabo.
15 Aalumbwe Leza akaambo kaluyando lwakwe lutazungaani,
akaambo kamilimo yakwe iigambya njaakacitila bantu.
16 Nguutyoloola zijazyo zyamukuba, nguukosoola mingwala yalubulo.
17 Akaambo kanzila zyabo zyabuzangi bamwi bakafubaala,
mbabo aabo bakapenzegwa akaambo kazibi zyabo.
18 Bakali kusesemwa kulya cilyo cili coonse, bakalaafwiifwi kufwa.
19 Mumapenzi aabo bakalilila Mwami, walo wakabavuna kuzwa kumakatazyo aabo.
20 Amalailile aakwe Leza wakabaponya, wabavuna kuti batanyonyooki.
21 Abamulumbe Mwami Leza akaambo kaluyando lwakwe lutazungaani,
akaambo kamilimo yakwe iigambya njaakacitila bantu.
22 Abamupe zipaizyo zyakulumba, abalungulule zyamilimo yakwe munyimbo zyalutangalo.
23 Bamwi bakeenda mulwizi amato, bakali kuyoosambala mumaanzi malamfu.
24 Bakiibona milimo ya Mwami Leza, bakiibona milimo yakwe iigambya mumpisi zyamaanzi.
25 Akanane buyo kwakabuka guwo libbubbulisya, lyakayuntaanya mayuwe.
26 Mato akawaalilwa mujulu amayuwe, amane akadumpukila mumaanzi malamfu,
bantu bakali mumo bakalenguka.
27 Bakali kudadalika akuzeenkana mbuli bantu bakoledwe,
luzibo lwabo lwa maanzi lwakaba lwabuyo.
28 Lino mumapenzi aabo bakalilila Mwami Leza, walo wakabagwisya mumakatazyo aabo.
29 Wakabatamika guwo bataa, mayuwe aumuna zi.
30 Guwo nilyakabatama bakakondwa, walo wakaakubasisya kucito nkubakali kuya.
31 Abalumbe Leza akaambo kaluyando lwakwe lutazungaani,
akaambo kamilimo yakwe iigambya njaakacitila bantu.
32 Abamulumbaizye mumbungano yabantu, bamutembaule munkamu yabapati.
33 Wakayuminizya milonga yaba nkanda, tusensa tukunka twaba cimpayuma.
34 Yali nyika yambolezi caba cikula, yaba cikula nkaambo kabubi
bwabaabo bakkede mulinjiyo.
35 Wiisandula nkanda aba maziba aamaanzi,
yali nyika njumu twaba tusensa twamaanzi.
36 Nkonkukooko nkwaakaleta basinzala kuti bakkale,
nkonkukooko nkubakajana munzi wakukkala.
37 Bakasyanga myuunda, bazikkila misaansa, zyalo zyakazyala kapati.
38 Wakabaleleka nkabela bakavula kapati, wakavuzya aŋombe zyabo.
39 Kumane bakatalika kuceya, bakoomba akaambo kakudyamininwa,
bakausa akunjila mumapenzi mapati.
40 Wakaleta masampu kuli balemenede, kuli baabo bakali kubadyaminina.
Wakabaingaizya munkanda mutakwe nzila.
41 Pele babulide wakabagwisya mumapenzi aabo, wakavuzya mikwasyi yabo
mbuli matanga aavubwa.
42 Baluleme balabona akusekelela, pele babi boonse balaumuzigwa.
43 Kufumbwa musongo, amvwisye zintu eezi, ayeeye luyando lwa Mwami Leza lutazungaani.