Intembauzyo 102
Kukomba kwamuntu uupenzegwa ciindi ncajisi mapenzi ku Mwami Leza
1 O Mwami Leza, komvwa kukomba kwangu, umvwe kulila kwangu kwakuyanda lugwasyo.
2 Utandifutatili ciindi camapenzi, cenjeka kutwi kwako kuli ndime,
ufwambaane kundivuwa mubuzuba mbwekwiita.
3 Mazuba aangu ayanguluka mbuli busi, mubili wangu ulapya mbuli makala aanyeka.
4 Moyo wangu wapya, wapusama mbuli bwizu, ndaluba akulya koonse,
taakwe cakulya ciza kumoyo.
5 Ndamana akaambo kakutongela kwangu kupati, ndasyaala mafuwa aalo.
6 Ndaba mbuli kkumbatamisamu lyamunkanda, ndaba mbuli tumba wamumatongo.
7 Ndoona bulanga, ndaba mbuli muyuni uukkede alikke ansonje.
8 Buzuba boonse basinkondoma balandisampaula, aabo bandinonga balandisinganya.
9 Twe lyaba ncecakulya cangu, cakulya ncenywidilizya aamisozi.
10 Nkaambo kabukali bwako bupati, wandibweza, wandisowa.
11 Mazuba aangu aba mbuli cimvule cakumazuba, ndapusama mbuli bwizu.
12 Pele yebo, O Mwami Leza, ulikkede acuuno cako cabwami akutamani,
zina lyako lilaya kumazyalani oonse.
13 Nyamuka umubede aankumbu Ziyoni, nkaambo ciindi calweetelelo.
Ciindi cakweengelela casika.
14 Nkaambo bantu bawo baluuyanda nikuba kuti wakanyonyoonwa,
balaankumbu anguwo nikuba kuti wakaba lusuko lwalo.
15 Bamasi bayoolemeka zina lya Mwami Leza, bami boonse baansi bayookulemeka.
16 Mwami Leza uyooyakulula Ziyoni, uyoolibonya mubulemu bwakwe.
17 Nguuyoovuwa kukomba kwabantu baide kwiingaila, takavoolozyi kulomba kwabo.
18 Makani aaya alembelwa zyalani liciboola,
kuti bantu batana zyalwa bakatembaule Mwami Leza.
19 Kuzwa kucikombelo cakwe cisalala kujulu, Mwami Leza wakalanga ansi,
kuzwa kujulu wakalanga anyika.
20 Wakamvwa kutongela kwabaange, wakaangununa baabo bapedwe milandu yalufu.
21 Bantu baambilizye zina lya Mwami Leza mu Ziyoni, abamutembaule mu Jelusalemu.
22 Ciindi bantu baansi nibayoobungana antoomwe, abakakombe Mwami Leza.
23 Nikuba kuti ndicili muyumu, Leza wakakosola buumi bwangu,
wakatwentanya mazuba aangu.
24 Lino ndakati, “O Leza wangu utanditoli, utatwentanyi mazuba aangu,
utaatwentanyi yebo ooliwo kwamazyalani oonse.”
25 Kumatalikilo nduwe wakaanza ntalisyo zyanyika, julu mmilimo yamaanza aako.
26 Zyoonse eezi ziyooloba, pele yebo unooliko, zyoonse ziyookulumpana
mbuli cisani, uyoozisowa mbuli madelu-delu.
27 Yebo unooliwo mbubonya, myaka yako tiimani pe.
28 Bana bababelesi bako bazookkala kumbele lyako, lunyungu lwako
luzookkalilila kumbele lyako.