Hosiya 6

Bantu baamba zyakuyanda kupilukila

¹ Amuboole tubweede ku Mwami Leza. “Watukwamauna pele uyootuponya. Watucubbaula, pele uyooanga zicisa zyesu. ² Kwakaindi kasyoonto ulatusinsimuna, kwainda buyo mazuba obilo naa otatwe ulatubusya kuti tukabe aabuumi kumbele lyakwe. ³ ‘Atuyume-yume kuti tumuzibe Leza.’ Uyoosika ncobeni kulindiswe mbuli bucedo. Kuboola kwakwe kuyooba cileleko mbuli mvula ntuluka iitesya nyika.”

⁴ Lino Leza wakaamba kuti, “Nywebo no Baefulemu ani mmucite buti? Nywebo nobantu ba Juda ani mmucite buti? Luyando lwanu kulindime lulazimaana mbuli sikunku, lulafwambaana kumana mbuli mume lizwa zuba. ⁵ Aboobo ndamupandaula mbuli nkuni kwiindilila muncenjezyo zyabasinsimi. Ndamujaya amajwi aangu. Kubeteka kwangu kwaboneka antangalala mbuli bulaba mvula. ⁶ Ncobeni ncenjandisya nduyando lwini-lwini, kutali zipaizyo buyo pe. Njanda kuti bantu bandizibe mebo nde Leza mubusena bwakwiide kupa zipaizyo zyakutenta.

⁷ “Pele bantu aaba bakatyola cizuminano cangu mbuli Adamu. Nibakacita boobo, bakacita zyakutasyomeka. ⁸ Giliyadi mmunzi wabasizibi, baide kujayana-jayana. ⁹ Mbuli bafumpi mbobayubilila abalo bapaizi mbobabungana kuti kabajaya bantu munzila iiya ku Syekemu. Masimpe, bacita zyabugandanga. ¹⁰ Akati kabantu ba Isilayeli ndabona zisesemya. Baefulemu bacita bwaamu, Baisilayeli balisofwaazya mukukomba mituni. ¹¹ Anywebo no Bajuda, muyootebula cisubulo.