Hosiya 5

¹ Nobapaizi nywebo amumvwisye makani aaya! Nobantu ba Isilayeli, amumvwisisisye! Nobamukwasyi wamwami nywebo, amuswiilile! Cisubulo cilamusikila nkaambo mwakali kakole ku Mizipa, mwakali kanyandi kucilundu ca Tabo. ² Bazangi basakana muzibi zyabo, nkabela ndiyoobasubula boonse. ³ Ndibazi bantu ba Efulemu, iiyi Baisilayeli tabakonzyi kulisisa kulindime. Baefulemu tabasyomeki, Baisilayeli balisofwaazya.

Hosiya mbwaakabacenjezya kuti batakombi mituni

⁴ Milimo yabo mibi yasinka nzila yabo kuti batapilukili kuli Leza. Tabajisi moyo wakusyoma, nkabela tabamuzi Leza. ⁵ Kulisumpula kwa Isilayeli kwabapindamukila. Iiyi, Efulemu uyoolebwa azinyonyoono zyakwe, awalo Juda, mbubonya. ⁶ Bantu balapaizya mbelele aŋombe mukulangila Leza, pele tabakonzyi kumujana pe nkaambo wabafutatila. ⁷ Tiibakasyomeka ku Mwami Leza cakuti abalo bana mbobajisi tabali babo pe. Lino sikunyonyoona uyoobanyonyoona antoomwe amyuunda yabo mwezi kuutanakkala.

Lumamba akati ka Juda a Isilayeli

⁸ “Amulizye myeembo yalumamba mu Gibeya! Amusibe anyeele mu Lama. Amubacenjezye bantu bamu Betihaveni! Amusolole noba Benjamini, aswebo nkotuli!” ⁹ Efulemu uyooba tongo mubuzuba bwakusubulwa. Ngambilizya masimpe kuli ndinywe nyoonse Nobaisilayeli.

¹⁰ Leza ulati, “Ndanyema nkaambo basololi ba Juda bacita nkondo kuti batantamune munyinza. Nkaako njoobalobya myoo mubukali bwangu mbuli zambangulwe lyamaanzi. ¹¹ Efulemu wadyamininwa, wasubulwa nkaambo wakali kumvwa zyabantu. ¹² Aboobo njoonyonyoona Efulemu mbubonya mbuli mapempya mbwaanyonyoona zisani. Njooba mbuli dondamwaka kubantu ba Juda.

¹³ “Lino bantu ba Efulemu nibakabona kuciswa kwabo, aba Juda nibakabona kuti balijisi zilonda, Baefulemu bakaya ku Asiliya, abalo Bajuda bakatumya majwi ku mwami mupati kuti abagwisye. Pele walo taakwe naakabasilika naa kuponya zilonda zyabo. ¹⁴ Njoobavwaampila Baefulemu mbuli syuumbwa, njoobavwalamina ba Juda mbuli cinkomwana casyuumbwa. Mebo lwangu njoobakwamauna akubasiya. Ciindi ndaakubakukumuna, taakwe uuyoobavuna pe.

¹⁵ “Njoopilukila kubusena bwangu kusikila bantu bangu bakapenge kupengela limwi akutalika kundiyandaula. Mumapenzi aabo bayoondivwenta.”