Hosiya 4
Leza mbwaakabapa mulandu Baisilayeli
1 Nobantu Baisilayeli amuswiilile majwi aa Mwami Leza nkaambo wamupa mulandu nomukkala munyika eeyi. Mulandu ooyo ngwakuti, mucisi oomu bantu tabasyomeki, banyina luzyalo, alimwi tabajisi luzibo lwa Leza. 2 Bantu balakonka cakubeja, kucenga, kujaya, kubba, akucita zyabumambe. Zinyonyoono zyavulisya, baide kujayana-jayana. 3 Nkaako kuyooba cilanga mucisi, aboobo zili mumo ziyoopengana. Banyama, bayuni, answi zyoonse ziyoofwa.
Leza mbwaakatongookela bapaizi
4 Mwami Leza ulati, “Taakwe muntu nabani weelede kukazya, kutabi umwi uumupa mulandu, nkaambo mulandu uli akati kandinywe andime nobapaizi babeji. 5 Mulalebwa sikati amasiku, abalo basinsimi mbubonya buyo. Ncenciceeco nceyoonyonyoona Isilayeli banyoko. 6 Bantu bangu balanyonyooka nkaambo tabandizi pe. Njookaka kuti mukandibelekele mbuli bapaizi nkaambo mwakaka kwiisya zyandime. Mwakaka milawo yangu, aboobo ambebo njookaka bana banu.
7 “Bapaizi bavula, bavuzya zinyonyoono. Njoosandula bulemu bwabo kuti bube busofwaazi. 8 Bavuba nkaambo kakubisya kwabantu bangu alimwi bayanda kuti baindilizye mukubisya ooku.
9 “Lino bapaizi mbubuli bantu njoobasubula abalo. Njoobasubula nkaambo kabukkale bwabo bubi akubabweedezezya milimo yabo eeyo. 10 Banoolya pele tabanookkuti banoocita bumambe tabakoonoozyala, nkaambo basiya Mwami Leza bayandaula baleza bambi.”
Leza wanyema azyakukomba baleza bamwi
11 Bwaamu abukolwi zimana maanu! 12 Bantu bangu babuzya mutuni wacisamu, alimwi balasonda ankoli yabo. Muuya wabwaamu wabasowa, aboobo nibasiya Leza wabo baba batasyomeki. 13 Balapa zipaizyo azilundu, balatenta tununkilizyo atulundu-lundu munsi aamisamu yamalende, nkaambo kakuti ilaazimvule zibotu. Nkankakaako bana banu basimbi ncibaba baamu, abalo bamukabana banu baba basimamambe. 14 Pele nsikoobasubula bana banu basimbi nkaambo kabwaamu, bamukabana banu nkaambo kabumambe. Kayi nywebo nobaalumi mweenda abaamu alimwi mulapaizya abakaintu baamu bakucikombelo ca Baali. Bantu banyina maanu bayoonyonyooka.
15 Nikuba kuti Baisilayeli tabasyomeki, bantu Bajuda batajaninwi mulandu ooyu pe. Batainki kukukomba ku Giligali naa ku Betihaveni. Batakakonkezyi limbi ooko muzina lya Mwami Leza uupona. 16 Baisilayeli tabaswiilili bali mbuli mpwizi nzangi. Ino inga Mwami Leza uyoobasanina buti mbuli bana bambelele mumweemvwe? 17 Bantu ba Efulemu balipa kumituni, aayo ngaabo beni! 18 Bamana kunywa, balacita bumambe. Bayandisya ziusya nsoni kwiinda kulilemeka. 19 Bayoogwisigwa mbuli cintu cipepaulwa aluuwo, alimwi bayoousigwa nsoni nkaambo kazipaizyo zyabo zyakunze.